Padma Purana · Chapter 6.243

śaṃkara uvāca-
atha tasmindine puṇye śubhalagne śubhānvite /
maṃgalasyābhiṣekārthaṃ maṃgalaṃ cakrire janāḥ

vasiṣṭho vāmadevaśca jābāliratha kaśyapaḥ /
mārkaṃḍeyaśca maudgalyaḥ parvato nāradastathā

ete maharṣayastatra japahomapurassaram /
abhiṣekaṃ śubhaṃ cakrurmunayo rājasattamam

nānāratnamaye divye hemapīṭhe śubhānvite /
niveśya sītayā sārddhaṃ śriyā iva janārdanam

sauvarṇakalaśairdivyairnānāratnamayaiḥ śubhaiḥ /
sarvatīrthodakaiḥ puṇyairmāṅgalyadravyasaṃyutaiḥ

dūrvāgratulasīpatrapuṣpagaṃdhasamanvitaiḥ /
maṃtrapūtajalaiḥ śuddhairmunayaḥ saṃśitavratāḥ

ajapanvaiṣṇavānsūktāncaturvedamayānśubhān /
abhiṣekaṃ śubhaṃ cakruḥ kākutsthaṃ jagataḥ patim

tasminśubhatame lagne devaduṃdubhayo divi /
vineduḥ puṣpavarṣāṇi vavṛṣuśca samaṃtataḥ

divyāṃbarairbhūṣaṇaiśca divyagaṃdhānulepanaiḥ /
puṣpairnānāvidhairdivyairdevyā saha raghūdvahaḥ

alaṃkṛtaśca śuśubhe munibhirvedapāragaiḥ /
chatraṃ ca cāmaraṃ divyaṃ dhṛtavānlakṣmaṇastadā

pārśve bharataśatrughnau tālavṛṃtau virejatuḥ /
darpaṇaṃ pradadau śrīmānrākṣaseṃdro vibhīṣaṇaḥ

dadhāra pūrṇakalaśaṃ sugrīvo vānareśvaraḥ /
jāmbavāṃśca mahātejāḥ puṣpamālāṃ manoharām

vāliputrastu tāṃbūlaṃ sakarpūraṃ dadau hareḥ /
hanumāndīpakāṃ divyāṃ suṣeṇaśca dhvajaṃ śubham

parivārya mahātmānaṃ maṃtriṇaḥ samupāsire /
sṛṣṭirjayaṃto vijayaḥ saurāṣṭro rāṣṭravarddhanaḥ

akopo dharmapālaśca sumaṃtro maṃtriṇaḥ smṛtāḥ /
rājānaśca naravyāghrā nānājanapadeśvarāḥ

paurāśca naigamā vṛddhā rājānaṃ paryupāsata /
ṛkṣaiśca vānareṃdraiśca maṃtribhiḥ pṛthivīśvaraiḥ

rākṣasairdvijamukhyaiśca kiṃkaraiśca samāvṛtaḥ /
pare vyomni yathā līno daivataiḥ kamalāpatiḥ

tathā nṛpavaraḥ śrīmānsākete śuśubhe tadā /
iṃdīvaradalaśyāmaṃ padmapatranibhekṣaṇam

ājānubāhuṃ kākutsthaṃ pītavastradharaṃ harim /
kaṃbugrīvaṃ mahoraskaṃ vicitrābharaṇairyutam

devyā saha samāsīnamabhiṣiktaṃ raghūttamam /
vimānasthāḥ suragaṇā harṣanirbharamānasāḥ

tuṣṭuvurjayaśabdena gaṃdharvāpsarasāṃ gaṇāḥ /
abhiṣiktastato rāmo vasiṣṭhādyairmaharṣibhiḥ

śuśubhe sītayā devyā nārāyaṇa iva śriyā /
atimartyatayābhīta upāsituṃ padāṃbujam

dṛṣṭvā tuṣṭāva hṛṣṭātmā śaṃkaro hṛṣṭamāgataḥ /
kṛtāṃjalipuṭo bhūtvā sānaṃdo gadgadākulaḥ /
harṣayansakalāndevānmunīnapi ca vānarān

mahādeva uvāca-
namo mūlaprakṛtaye nityāya paramātmane /
saccidānaṃdarūpāya viśvarūpāya vedhase

namo niraṃtarānaṃda kandamūlāya viṣṇave /
jagattrayakṛtānaṃda mūrttaye divyamūrttaye

namo brahmeṃdrapūjyāya śaṃkarābhayadāya ca /
namo viṣṇusvarūpāya sarvarūpanamonamaḥ

utpattisthitisaṃhārakāriṇe triguṇātmane /
namostu nirgatopādhisvarūpāya mahātmane

anayā vidyayā devyā sītayopādhikāriṇe /
namaḥ puṃprakṛtibhyāṃ ca yuvābhyāṃ jagatāṃ kṛte

jaganmātāpitṛbhyāṃ ca jananyai rāghavāya ca /
namaḥ prapaṃcarūpiṇyai niṣprapaṃcasvarūpiṇe

namo dhyānasvarūpiṇyai yogidhyeyātmamūrttaye /
pariṇāmāparīṇāmariktābhyāṃ ca namonamaḥ

kūṭasthabījarūpiṇyai sītāyai rāghavāya ca /
sītā lakṣmīrbhavānviṣṇuḥ sītā gaurī bhavānśivaḥ

sītā svayaṃ hi sāvitri bhavānbrahmā caturmukhaḥ /
sītā śacī bhavānśakraḥ sītā svāhānalo bhavān

sītā saṃhāriṇī devī yamarūpadharo bhavān /
sītā hi sarvasampattiḥ kuberastvaṃ raghūttama

sītā devī ca rudrāṇī bhavānrudro mahābalaḥ /
sītā tu rohiṇī devī caṃdrastvaṃ lokasaukhyadaḥ

sītā saṃjñā bhavānsūryaḥ sītā rātrirdivā bhavān /
sītādevī mahākālī mahākālo bhavānsadā

strīliṅgeṣu trilokeṣu yattatsarvaṃ hi jānakī /
punnāma lāṃchitaṃ yattu tatsarvaṃ hi bhavānprabho

sarvatra sarvadeveśa sītā sarvatra dhāriṇī /
tadātvamapicatrātuṃtacchaktirviśvadhāriṇī

tasmātkoṭiguṇaṃ puṇyaṃ yuvābhyāṃ paricihnitam /
cihnitaṃ śivaśaktibhyāṃ caritaṃ tava śāṃtidam

āvāṃ rāma jagatpūjyau mama pūjyau sadā yuvām /
tvannāmajāpinī gaurī tvanmaṃtrajapavānaham

mumūrṣormaṇikarṇyāṃ tu arddhodakanivāsinaḥ /
ahaṃ diśāmi te maṃtraṃ tārakaṃ brahmadāyakam

atastvaṃ jānakīnātha parabrahmāsi niścitam /
tvanmāyāmohitāssarve na tvāṃ jānaṃti tatvataḥ

īśvara uvāca-
ityuktaḥ śaṃbhunā rāmaḥ prasādapravaṇo'bhavat /
divyarūpadharaḥ śrīmānadbhutādbhutadarśanaḥ

tathā taṃ rūpamālokya naravānaradevatāḥ /
na draṣṭumapiśaktāste tejasaṃ mahadadbhutam

bhayādvai tridaśaśreṣṭhāḥ praṇemuścātibhaktitaḥ /
bhītā vijñāya rāmo'pi naravānaradevatāḥ /
māyāmānuṣatāṃ prāpya sa devānabravītpunaḥ

rāmacaṃdra uvāca-
śṛṇudhvaṃ devatā yo māṃ pratyahaṃ saṃstuviṣyati /
stavena śaṃbhunoktena devatulyo bhavennaraḥ

vimuktaḥ sarvapāpebhyo matsvarūpaṃ samaśnute /
raṇe jayamavāpnoti na kvacitpratihanyate

bhūtavetālakṛtyābhirgrahaiścāpi na bādhyate /
aputro labhate putraṃ patiṃ viṃdati kanyakā

daridraḥ śriyamāpnoti satvavāñśīlavānbhavet /
ātmatulyabalaḥ śrīmāñjāyate nātra saṃśayaḥ

nirvighnaṃ sarvakāryeṣu sarvāraṃbheṣu vai nṛṇām /
yaṃyaṃ kāmayate martyaḥ sudurlabhamanoratham

ṣaṇmāsātsiddhimāpnoti stavasyāsya prasādataḥ /
yatpuṇyaṃ sarvatīrtheṣu sarvayajñeṣu yatphalam /
tatphalaṃ koṭiguṇitaṃ stavenānena labhyate

īśvara uvāca-
ityuktvā rāmacaṃdro'sau visasarja maheśvaram /
brahmādi tridaśānsarvānvisasarja samāgatān

arcitā mānavāḥ sarve naravānaradevatāḥ /
visṛṣṭā rāmacaṃdreṇa prītyā paramayā yutāḥ

itthaṃ visṛṣṭāḥ khalu te ca sarve sukhaṃ tadā jagmuratīvahṛṣṭāḥ /
paraṃ paṭhaṃtaḥ stavamīśvaroktaṃ rāmaṃ smaraṃto varaviśvarūpam

/
iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde viśvadarśanaṃ nāma tricatvāriṃśadadhikadviśatatamo'dhyāyaḥ