પદ્મ પુરાણ · અધ્યાય 6.243

શંકર ઉવાચ-
અથ તસ્મિન્દિને પુણ્યે શુભલગ્ને શુભાન્વિતે ।
મંગલસ્યાભિષેકાર્થં મંગલં ચક્રિરે જનાઃ

વસિષ્ઠો વામદેવશ્ચ જાબાલિરથ કશ્યપઃ ।
માર્કંડેયશ્ચ મૌદ્ગલ્યઃ પર્વતો નારદસ્તથા

એતે મહર્ષયસ્તત્ર જપહોમપુરસ્સરમ્ ।
અભિષેકં શુભં ચક્રુર્મુનયો રાજસત્તમમ્

નાનારત્નમયે દિવ્યે હેમપીઠે શુભાન્વિતે ।
નિવેશ્ય સીતયા સાર્દ્ધં શ્રિયા ઇવ જનાર્દનમ્

સૌવર્ણકલશૈર્દિવ્યૈર્નાનારત્નમયૈઃ શુભૈઃ ।
સર્વતીર્થોદકૈઃ પુણ્યૈર્માઙ્ગલ્યદ્રવ્યસંયુતૈઃ

દૂર્વાગ્રતુલસીપત્રપુષ્પગંધસમન્વિતૈઃ ।
મંત્રપૂતજલૈઃ શુદ્ધૈર્મુનયઃ સંશિતવ્રતાઃ

અજપન્વૈષ્ણવાન્સૂક્તાન્ચતુર્વેદમયાન્શુભાન્ ।
અભિષેકં શુભં ચક્રુઃ કાકુત્સ્થં જગતઃ પતિમ્

તસ્મિન્શુભતમે લગ્ને દેવદુંદુભયો દિવિ ।
વિનેદુઃ પુષ્પવર્ષાણિ વવૃષુશ્ચ સમંતતઃ

દિવ્યાંબરૈર્ભૂષણૈશ્ચ દિવ્યગંધાનુલેપનૈઃ ।
પુષ્પૈર્નાનાવિધૈર્દિવ્યૈર્દેવ્યા સહ રઘૂદ્વહઃ

અલંકૃતશ્ચ શુશુભે મુનિભિર્વેદપારગૈઃ ।
છત્રં ચ ચામરં દિવ્યં ધૃતવાન્લક્ષ્મણસ્તદા

પાર્શ્વે ભરતશત્રુઘ્નૌ તાલવૃંતૌ વિરેજતુઃ ।
દર્પણં પ્રદદૌ શ્રીમાન્રાક્ષસેંદ્રો વિભીષણઃ

દધાર પૂર્ણકલશં સુગ્રીવો વાનરેશ્વરઃ ।
જામ્બવાંશ્ચ મહાતેજાઃ પુષ્પમાલાં મનોહરામ્

વાલિપુત્રસ્તુ તાંબૂલં સકર્પૂરં દદૌ હરેઃ ।
હનુમાન્દીપકાં દિવ્યાં સુષેણશ્ચ ધ્વજં શુભમ્

પરિવાર્ય મહાત્માનં મંત્રિણઃ સમુપાસિરે ।
સૃષ્ટિર્જયંતો વિજયઃ સૌરાષ્ટ્રો રાષ્ટ્રવર્દ્ધનઃ

અકોપો ધર્મપાલશ્ચ સુમંત્રો મંત્રિણઃ સ્મૃતાઃ ।
રાજાનશ્ચ નરવ્યાઘ્રા નાનાજનપદેશ્વરાઃ

પૌરાશ્ચ નૈગમા વૃદ્ધા રાજાનં પર્યુપાસત ।
ઋક્ષૈશ્ચ વાનરેંદ્રૈશ્ચ મંત્રિભિઃ પૃથિવીશ્વરૈઃ

રાક્ષસૈર્દ્વિજમુખ્યૈશ્ચ કિંકરૈશ્ચ સમાવૃતઃ ।
પરે વ્યોમ્નિ યથા લીનો દૈવતૈઃ કમલાપતિઃ

તથા નૃપવરઃ શ્રીમાન્સાકેતે શુશુભે તદા ।
ઇંદીવરદલશ્યામં પદ્મપત્રનિભેક્ષણમ્

આજાનુબાહું કાકુત્સ્થં પીતવસ્ત્રધરં હરિમ્ ।
કંબુગ્રીવં મહોરસ્કં વિચિત્રાભરણૈર્યુતમ્

દેવ્યા સહ સમાસીનમભિષિક્તં રઘૂત્તમમ્ ।
વિમાનસ્થાઃ સુરગણા હર્ષનિર્ભરમાનસાઃ

તુષ્ટુવુર્જયશબ્દેન ગંધર્વાપ્સરસાં ગણાઃ ।
અભિષિક્તસ્તતો રામો વસિષ્ઠાદ્યૈર્મહર્ષિભિઃ

શુશુભે સીતયા દેવ્યા નારાયણ ઇવ શ્રિયા ।
અતિમર્ત્યતયાભીત ઉપાસિતું પદાંબુજમ્

દૃષ્ટ્વા તુષ્ટાવ હૃષ્ટાત્મા શંકરો હૃષ્ટમાગતઃ ।
કૃતાંજલિપુટો ભૂત્વા સાનંદો ગદ્ગદાકુલઃ ।
હર્ષયન્સકલાન્દેવાન્મુનીનપિ ચ વાનરાન્

મહાદેવ ઉવાચ-
નમો મૂલપ્રકૃતયે નિત્યાય પરમાત્મને ।
સચ્ચિદાનંદરૂપાય વિશ્વરૂપાય વેધસે

નમો નિરંતરાનંદ કન્દમૂલાય વિષ્ણવે ।
જગત્ત્રયકૃતાનંદ મૂર્ત્તયે દિવ્યમૂર્ત્તયે

નમો બ્રહ્મેંદ્રપૂજ્યાય શંકરાભયદાય ચ ।
નમો વિષ્ણુસ્વરૂપાય સર્વરૂપનમોનમઃ

ઉત્પત્તિસ્થિતિસંહારકારિણે ત્રિગુણાત્મને ।
નમોસ્તુ નિર્ગતોપાધિસ્વરૂપાય મહાત્મને

અનયા વિદ્યયા દેવ્યા સીતયોપાધિકારિણે ।
નમઃ પુંપ્રકૃતિભ્યાં ચ યુવાભ્યાં જગતાં કૃતે

જગન્માતાપિતૃભ્યાં ચ જનન્યૈ રાઘવાય ચ ।
નમઃ પ્રપંચરૂપિણ્યૈ નિષ્પ્રપંચસ્વરૂપિણે

નમો ધ્યાનસ્વરૂપિણ્યૈ યોગિધ્યેયાત્મમૂર્ત્તયે ।
પરિણામાપરીણામરિક્તાભ્યાં ચ નમોનમઃ

કૂટસ્થબીજરૂપિણ્યૈ સીતાયૈ રાઘવાય ચ ।
સીતા લક્ષ્મીર્ભવાન્વિષ્ણુઃ સીતા ગૌરી ભવાન્શિવઃ

સીતા સ્વયં હિ સાવિત્રિ ભવાન્બ્રહ્મા ચતુર્મુખઃ ।
સીતા શચી ભવાન્શક્રઃ સીતા સ્વાહાનલો ભવાન્

સીતા સંહારિણી દેવી યમરૂપધરો ભવાન્ ।
સીતા હિ સર્વસમ્પત્તિઃ કુબેરસ્ત્વં રઘૂત્તમ

સીતા દેવી ચ રુદ્રાણી ભવાન્રુદ્રો મહાબલઃ ।
સીતા તુ રોહિણી દેવી ચંદ્રસ્ત્વં લોકસૌખ્યદઃ

સીતા સંજ્ઞા ભવાન્સૂર્યઃ સીતા રાત્રિર્દિવા ભવાન્ ।
સીતાદેવી મહાકાલી મહાકાલો ભવાન્સદા

સ્ત્રીલિઙ્ગેષુ ત્રિલોકેષુ યત્તત્સર્વં હિ જાનકી ।
પુન્નામ લાંછિતં યત્તુ તત્સર્વં હિ ભવાન્પ્રભો

સર્વત્ર સર્વદેવેશ સીતા સર્વત્ર ધારિણી ।
તદાત્વમપિચત્રાતુંતચ્છક્તિર્વિશ્વધારિણી

તસ્માત્કોટિગુણં પુણ્યં યુવાભ્યાં પરિચિહ્નિતમ્ ।
ચિહ્નિતં શિવશક્તિભ્યાં ચરિતં તવ શાંતિદમ્

આવાં રામ જગત્પૂજ્યૌ મમ પૂજ્યૌ સદા યુવામ્ ।
ત્વન્નામજાપિની ગૌરી ત્વન્મંત્રજપવાનહમ્

મુમૂર્ષોર્મણિકર્ણ્યાં તુ અર્દ્ધોદકનિવાસિનઃ ।
અહં દિશામિ તે મંત્રં તારકં બ્રહ્મદાયકમ્

અતસ્ત્વં જાનકીનાથ પરબ્રહ્માસિ નિશ્ચિતમ્ ।
ત્વન્માયામોહિતાસ્સર્વે ન ત્વાં જાનંતિ તત્વતઃ

ઈશ્વર ઉવાચ-
ઇત્યુક્તઃ શંભુના રામઃ પ્રસાદપ્રવણોઽભવત્ ।
દિવ્યરૂપધરઃ શ્રીમાનદ્ભુતાદ્ભુતદર્શનઃ

તથા તં રૂપમાલોક્ય નરવાનરદેવતાઃ ।
ન દ્રષ્ટુમપિશક્તાસ્તે તેજસં મહદદ્ભુતમ્

ભયાદ્વૈ ત્રિદશશ્રેષ્ઠાઃ પ્રણેમુશ્ચાતિભક્તિતઃ ।
ભીતા વિજ્ઞાય રામોઽપિ નરવાનરદેવતાઃ ।
માયામાનુષતાં પ્રાપ્ય સ દેવાનબ્રવીત્પુનઃ

રામચંદ્ર ઉવાચ-
શૃણુધ્વં દેવતા યો માં પ્રત્યહં સંસ્તુવિષ્યતિ ।
સ્તવેન શંભુનોક્તેન દેવતુલ્યો ભવેન્નરઃ

વિમુક્તઃ સર્વપાપેભ્યો મત્સ્વરૂપં સમશ્નુતે ।
રણે જયમવાપ્નોતિ ન ક્વચિત્પ્રતિહન્યતે

ભૂતવેતાલકૃત્યાભિર્ગ્રહૈશ્ચાપિ ન બાધ્યતે ।
અપુત્રો લભતે પુત્રં પતિં વિંદતિ કન્યકા

દરિદ્રઃ શ્રિયમાપ્નોતિ સત્વવાઞ્શીલવાન્ભવેત્ ।
આત્મતુલ્યબલઃ શ્રીમાઞ્જાયતે નાત્ર સંશયઃ

નિર્વિઘ્નં સર્વકાર્યેષુ સર્વારંભેષુ વૈ નૃણામ્ ।
યંયં કામયતે મર્ત્યઃ સુદુર્લભમનોરથમ્

ષણ્માસાત્સિદ્ધિમાપ્નોતિ સ્તવસ્યાસ્ય પ્રસાદતઃ ।
યત્પુણ્યં સર્વતીર્થેષુ સર્વયજ્ઞેષુ યત્ફલમ્ ।
તત્ફલં કોટિગુણિતં સ્તવેનાનેન લભ્યતે

ઈશ્વર ઉવાચ-
ઇત્યુક્ત્વા રામચંદ્રોઽસૌ વિસસર્જ મહેશ્વરમ્ ।
બ્રહ્માદિ ત્રિદશાન્સર્વાન્વિસસર્જ સમાગતાન્

અર્ચિતા માનવાઃ સર્વે નરવાનરદેવતાઃ ।
વિસૃષ્ટા રામચંદ્રેણ પ્રીત્યા પરમયા યુતાઃ

ઇત્થં વિસૃષ્ટાઃ ખલુ તે ચ સર્વે સુખં તદા જગ્મુરતીવહૃષ્ટાઃ ।
પરં પઠંતઃ સ્તવમીશ્વરોક્તં રામં સ્મરંતો વરવિશ્વરૂપમ્

।
ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે વિશ્વદર્શનં નામ ત્રિચત્વારિંશદધિકદ્વિશતતમોઽધ્યાયઃ