Padma Purana · Chapter 6.160

mahādeva uvāca/
asmāttīrthātparaṃ tīrthaṃ tīrtharājeti viśrutam /
saptanadyo vahaṃtyatra caṃdanodakamiśritam

anyatīrthācchataguṇaṃ snānaṃ cātra viśiṣyate /
devānāṃ pravaro devo yatrāste vāmanaḥ svayam

dvādaśyāṃ māghamāsasya dadyādyastiladhenukam /
vimuktaḥ sarvapāpebhyaḥ kulānāṃ tārayecchatam

pānīyamapyatra tilairvimiśraṃ dadyātpitṛbhyaḥ prayato manuṣyaḥ /
śrāddhaṃ kṛtaṃ tena samāḥ sahasraṃ rahasyametatpitaro vadaṃti

tīrthe'sminbhojayedyo vai brāhmaṇānguḍapāyasaiḥ /
ekasminbhojite vipre sahasraṃ bhojitaṃ bhavet

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe vāmanatīrthaṃ nāma ṣaṣṭyadhikaśatatamo'dhyāyaḥ