Padma Purana · Chapter 6.161

mahādeva uvāca/
somatīrthaṃ tato gacchedguptaṃ sābhramatītaṭe /
pātālāttatra nirgatya kālāgnirabhavadbhavaḥ

somatīrthe naraḥ snātvā dṛṣṭvā someśvaraṃ śivam /
somapānaphalaṃ sākṣādbhavatīti na saṃśayaḥ

rūpavānsubhago bhogī sarvaśāstraviśāradaḥ /
naro bhavati loke'sminparatra ca śivaṃ vrajet

atretihāsaṃ vakṣyāmi śṛṇu suṃdari tatvataḥ /
yaṃ śrutvā mucyate cātra brahmahatyādipātakāt

kauṣītakena ṛṣiṇā tapastaptaṃ viśeṣataḥ /
nirāhārī sa vai jātaḥ parṇāśanarataḥ param

vāyubhakṣastataḥ kurvannātmadhyānaparāyaṇaḥ /
evaṃ bahuyugaṃ tatra taptaṃ tena mahattapaḥ

kadāciddaivayogena suprasanno maheśvaraḥ /
yaṃ yaṃ prārthayase vipra tatsarvaṃ pradadāmyaham

kauṣītaka uvāca/
tava prasādāddeveśa atra liṃgaṃ prajāyatām /
atra someśvara iti khyāto devo bhaveddhruvam

yatra snātvā ca bhuktvā ca vāṃchitaṃ phalamāpnuyāt /
atra sthāne viśeṣeṇa rudrajāpyādikaṃ yadi

kārayaṃti naraśreṣṭhā dharmānarthāllam̐bhaṃti te /
aputro labhate putraṃ nirdhano labhate dhanam

rājyakāmī tu tadrājyaṃ labhate nātra saṃśayaḥ /
yadi cettvaṃ prasanno'si tatsarvaṃ dehi me prabho

īśvara uvāca/
tadā caiva sureśena sarvaṃ dattaṃ dvijanmane /
tadā prabhṛti tattīrthaṃ somaliṃgeti viśrutam

caṃdanairvā bilvapatraiye'rcayaṃti sadāśivam /
labhaṃte mānuṣe dehe saukhyaṃ putrādisaṃbhavam

somavāre tathā prāpte yo gacchati harālayam /
vāchitaṃ labhate nityaṃ somaliṃga prasādataḥ

atra gatvā tu yo devi yaddadāti phalādikam /
yayā kāmanayā caiva taṃ taṃ prāpnoti niścitam

śvetairvā karavīraiśca pārijātaistathā punaḥ /
ye'rcayaṃti ca taṃ devaṃ śrīmaheśaṃ pinākinam

te labhaṃte suraśreṣṭhe śaivaṃ padamanuttamam

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe somatīrthavarṇanaṃnāmaikaṣaṣṭyadhikaśatatamo'dhyāyaḥ