Padma Purana · Chapter 6.159

mahādeva uvāca/
tasmāddūratare devi siddhakṣetramanuttamam /
aniruddho vṛtaḥ pūrvaṃ uṣārthe citralekhayā

nīto bāṇāsurapuraṃ tiṣṭhati sma gṛhe purā /
pāśairbāṇaiśca saṃruddhaḥ koṭarākṣīmathāsmarat

sākṣādyā vaiṣṇavī śaktiḥ sadā rakṣaṇa tatparā /
seyaṃ devī nadītīre kṛṣṇenātra pratiṣṭhitā

jitvā bāṇāsuraṃ saṃkhye dvārakāṃ pratigacchatā /
aniruddhasya stotreṇa sākṣātsāṃnidhyamāgatā

tatra tīrthe naraḥ snātvā varṣamekaṃ prayatnataḥ /
koṭarākṣīmukhaṃ dṛṣṭvā lakṣmīmāpnoti puṣkalām

siddhatīrthe naraḥ snātvā dṛṣṭvā koṭaravāsinīm /
siṃhayuktena yānena rudraloke mahīyate

yasyāṃ vai smaraṇādeva muktaḥ so'pi varānane /
atoye'tra pragacchaṃti te narā muktibhāginaḥ

tatra gatvā viśeṣeṇa snānaṃ kṛtvā tu pārvati /
koṭarākṣyāstataḥ stotraṃ paṭhedvai buddhipūrvakam

koṭarākṣī viśvarūpā mahāmāyā balādhikā /
tripurā tripuraghnī ca śivā vai śivarūpiṇī

kanyā sārasvatī proktā durgā durgatihāriṇī /
bhairavī bhairavākṣī ca lakṣmī devī janapriyā

etāni bahudhoktāni nāmāni ca sureśvari /
ye paṭhaṃti naraśreṣṭhāste yāṃti śivasannidhau

aniruddhakṛtaṃ stotraṃ ye japaṃti manīṣiṇaḥ /
mucyaṃte kaṣṭabaṃdhātte satyaṃsatyaṃ varānane

tīrthānāṃ paramaṃ tīrthaṃ koṭarānirmitaṃ bhuvi /
darśanādeva naśyaṃti pāpānāṃ rāśayastathā

iti śrīpādmemahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe koṭarātīrthaṃ nāmaikonaṣaṣṭyadhikaśatatamo'dhyāyaḥ