Padma Purana · Chapter 6.148

mahādeva uvāca/
sābhramatyāstaṭe tīrthaṃ gayātīrthamanuttamam /
citrāṃgavadanaṃ nāma mālārkādhiṣṭhitaṃ śubham

kalpapādapasaṃtānairmaṃdāraiścopaśobhitam /
cūtaniṃbakadaṃbaiśca kāśmaryaśvatthatiṃdukaiḥ

tasmādapaharetkuṣṭhaṃ yojanasmṛtivibhramāt /
yasya saṃjāyate kuṣṭhaṃ tasya mālārkako haret

yā tu vedoktavidhinā nārī tatrābhiṣiṃcati /
mṛtavatsā'thavā vaṃdhyā putraṃ prāpnoti sācirāt

saṃdhyāsnānaṃ japo homaḥ svādhyāyo devatārcanam /
kṛtaṃ bhāskarabhaktena mālārke hyakṣayaṃ bhavet

atra gatvā tu deveśi śrīravervratamācaret /
ihaloke sukhaṃ bhuktvā raverlokaṃ hi yāti vai

mṛtavatso hi rājarṣistatra gatvā'karottapaḥ /
sa rājā prāptavānputraṃ śrīmālārkaprasādataḥ

atra gatvā viśeṣaṇa upavāsī jiteṃdriyaḥ /
mālārkaṃ pūjayedyo vai muktibhāgī bhaveddhruvam

vasiṣṭhapramukhāviprā devā iṃdrādayaḥ sadā /
nivasaṃti suraśreṣṭhe mālārke ravisannidhau

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde mālārkatīrthaṃ nāma aṣṭacatvāriṃśadadhikaśatatamo'dhyāyaḥ