Padma Purana · Chapter 6.149

mahādeva uvāca/
tīrthādasmātparaṃ tīrthaṃ mālārkāṃtarataḥ sthitam /
caṃdaneśvaramāgacchedāmodasthānamuttamam

duḥśāsanasya rudhiraṃ pītvā bhīmo mahābalaḥ /
pratijñāmātmanaḥ sarvāṃ pūrayitvā sudāruṇām

karābhyāṃ rudhirāktābhyāṃ draupadyāḥ keśabaṃdhanam /
kṛtvā dattvā dvijātibhyo tīrthayātrāṃ tato'gamat

sābhramatyāstaṭe ramye gato vai bhrātṛbhiḥ saha /
ānītaḥ sābhramatyāṃ yaḥ svargāccaṃdanapādapaḥ

sa tu liṃgatayā jātaḥ puṇyatīrthaprabhāvataḥ /
tatra snātvā ca pītvā ca kṛtvā vai pitṛtarpaṇam

na naro nirayaṃ gacchedrudralokamavāpnuyāt /
caṃdaneśaṃ tato dṛṣṭvā viśveśaṃ lokaśaṃkaram

pūjayecca yathāśaktyā yatra gatvā na śocati /
yatra kaivartako rājā pūjāṃ kṛtvā hyanekaśaḥ

sa gataḥ śivalokaṃ taṃ yatra gatvā na śocati /
majjaṃti ṛṣayo yatra yatra devaḥ sanātanaḥ

sākṣādviṣṇuḥ paramātmā nityaṃ tiṣṭhati bhūtidaḥ /
iyaṃ sābhramatī dhanyā dhanyo viśveśvaraḥ prabhuḥ

yatra tīrthānyanekāni jātāni bhuvi pārvati /
atra cāmardakīpuṇyaiḥ phalairnānāvidhaiḥ śubhaiḥ

karttavyamarghadānaṃ ca vidhinā tatra suṃdari

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde caṃdaneśvaramāhātmyaṃ nāmaikonapaṃcāśadadhikaśatatamo'dhyāyaḥ