Padma Purana · Chapter 6.147

mahādeva uvāca/
devi vai śrūyatāṃ tīrthaṃ devānāmapi durllabham /
khaḍgatīrthamiti khyātaṃ sarvapāpapraṇāśanam

khaḍgatīrthe naraḥ snātvā dṛṣṭvā khaṅgeśvaraṃ śivam /
na naro durgatiṃ gacchetsvargalokaṃ pragacchati

khaḍgadhāreśvaraṃ devaṃ yaḥ paśyati surottame /
kārtikyāṃ tu viśeṣeṇa pūjanaṃ tatra kārayet

ayaṃ viśveśvaro devaḥ sarvadā bhuvi vallabhe /
sarvaṃ dadāti sarveśo vāṃcchitārthapradāyakaḥ

vaiśākhe rājyakāmārthī yaḥ paśyati tamīśvaram /
tamarthaṃ labhate kṣipraṃ viśvanāthaprasādataḥ

puṣpairdhūpaiśca naivedyairdīpairvā naganaṃdini /
phalapradānairbilvaiśca viśveśaṃ pūjayettataḥ

dhanadhānyapradaṃ cāśu putrapautrādisaṃpadaḥ /
prāpyaṃte nātra saṃdehaḥ śrīviśveśvarapūjanāt

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde khaḍgatīrthaṃ nāma saptacatvāriṃśadadhikaśatatamo'dhyāyaḥ