પદ્મ પુરાણ · અધ્યાય 6.148

મહાદેવ ઉવાચ।
સાભ્રમત્યાસ્તટે તીર્થં ગયાતીર્થમનુત્તમમ્ ।
ચિત્રાંગવદનં નામ માલાર્કાધિષ્ઠિતં શુભમ્

કલ્પપાદપસંતાનૈર્મંદારૈશ્ચોપશોભિતમ્ ।
ચૂતનિંબકદંબૈશ્ચ કાશ્મર્યશ્વત્થતિંદુકૈઃ

તસ્માદપહરેત્કુષ્ઠં યોજનસ્મૃતિવિભ્રમાત્ ।
યસ્ય સંજાયતે કુષ્ઠં તસ્ય માલાર્કકો હરેત્

યા તુ વેદોક્તવિધિના નારી તત્રાભિષિંચતિ ।
મૃતવત્સાઽથવા વંધ્યા પુત્રં પ્રાપ્નોતિ સાચિરાત્

સંધ્યાસ્નાનં જપો હોમઃ સ્વાધ્યાયો દેવતાર્ચનમ્ ।
કૃતં ભાસ્કરભક્તેન માલાર્કે હ્યક્ષયં ભવેત્

અત્ર ગત્વા તુ દેવેશિ શ્રીરવેર્વ્રતમાચરેત્ ।
ઇહલોકે સુખં ભુક્ત્વા રવેર્લોકં હિ યાતિ વૈ

મૃતવત્સો હિ રાજર્ષિસ્તત્ર ગત્વાઽકરોત્તપઃ ।
સ રાજા પ્રાપ્તવાન્પુત્રં શ્રીમાલાર્કપ્રસાદતઃ

અત્ર ગત્વા વિશેષણ ઉપવાસી જિતેંદ્રિયઃ ।
માલાર્કં પૂજયેદ્યો વૈ મુક્તિભાગી ભવેદ્ધ્રુવમ્

વસિષ્ઠપ્રમુખાવિપ્રા દેવા ઇંદ્રાદયઃ સદા ।
નિવસંતિ સુરશ્રેષ્ઠે માલાર્કે રવિસન્નિધૌ

ઇતિ શ્રીપાદ્મેમહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે માલાર્કતીર્થં નામ અષ્ટચત્વારિંશદધિકશતતમોઽધ્યાયઃ