Padma Purana · Chapter 6.126

vasiṣṭha uvāca/
adhunā māghamāhātmyaṃ pravakṣyāmi nṛpottama /
pṛcchate kārtavīryāya dattātreyeṇa bhāṣitam

dattātreyaṃ hariṃ sākṣādvasaṃtaṃ sahya parvate /
papraccha taṃ dvijaṃ gatvā rājā māhiṣmatīpatiḥ

sahasrārjuna uvāca/
bhagavanyogināṃ śreṣṭha sarve dharmāḥ śrutā mayā /
māghasnānaphalaṃ brūhi kṛpayā mama suvrata

dattātreya uvāca/
śrūyatāṃ nṛpaśārdūla etatpraśnottaraṃ śubham /
brahmaṇoktaṃ purā hyetannāradāya mahātmane

tatsarvaṃ kathayiṣyāmi māghasnānaphalaṃ mahat /
yathādeśaṃ yathātīrthaṃ yathāvidhi yathākriyam

asminvai bhārate varṣe karmabhūmau viśeṣataḥ /
amāghasnāyināṃ nṝṇāṃ niṣphalaṃ janmakīrtitam

asūryaṃ gaganaṃ yadvadacandramuḍumaṃḍalam /
tadvannābhāti satkarma māghasnānaṃ vinā nṛpa

vratairdānaistapobhiśca na tathā prīyate hariḥ /
māghamajjanamātreṇa yathā prīṇāti keśavaḥ

na samaṃ vidyate kiṃcittejaḥ saureṇa tejasā /
tadvatsnānena māghasya na samāḥ kratujāḥ kriyāḥ

prītaye vāsudevasya sarvapāpāpanuttaye /
māghasnānaṃ prakurvīta svargalābhāya mānavaḥ

kiṃ rakṣitena dehena supuṣṭena balīyasā /
adhruveṇāpyaśucinā māghasnānaṃ vinā bhavet

asthistaṃbhaṃ snāyubaddhaṃ māṃsakṣataja lepanam /
carmāvanaddhaṃ durgaṃdhaṃ pātraṃ mūtrapurīṣayoḥ

jarāśokavipadvyāptaṃ rogamaṃdiramāturam /
rajasvalamanityaṃ ca sarvadoṣasamāśrayam

paropatāpitāpārtaṃ paradrohi paraṃ viṣam /
lolupaṃ piśunaṃ krūraṃ kṛtaghnaṃ kṣaṇikaṃ tathā

duṣpūraṃ durdharaṃ duṣṭaṃ doṣatrayasamanvitam /
aśucisrāvi sacchidraṃ tāpatrayavimohitam

nisargato'dharmarataṃ tṛṣṇāśata samākulam /
kāmakrodha mahālobha narakadvāra saṃsthitam

krimiviḍbhasmabhavati pariṇāme śunāṃ haviḥ /
īdṛkśarīraṃ vyarthaṃ hi māghasnānavivarjitam

budbudāiva toyeṣu pūtikā iva jaṃtuṣu /
jāyaṃte maraṇāyaiva māghasnānavivarjitāḥ

avaiṣṇavo hato vipro hataṃ śrāddhamayogi ca /
abrahmaṇyaṃ hataṃ kṣetramanācāraṃ hataṃ kulam

sadaṃbhaśca hato dharmaḥ krodhenaiva hataṃ tapaḥ /
adṛḍhaṃ ca hataṃ jñānaṃ pramādena hataṃ śrutam

gurvabhaktā hatā nārī brahmacārī tayā hataḥ /
adīpte'gnau hato homo hatā bhuṃktirasākṣikā

upajīvyā hatā kanyā svārthe pākakriyā hatā /
śūdrabhikṣo hato yāgaḥ kṛpaṇasya hataṃ dhanam

anabhyāsā hatā vidyā hato rājā virodhakṛt /
jīvanārthaṃ hataṃ tīrthaṃ jīvanārthaṃ hataṃ vratam

asatyā ca hatā vāṇī tathā paiśunyavādinī /
saṃdigdhaśca hato maṃtro vyagracitto hato japaḥ

hatamaśrotriye dānaṃ hato lokaśca nāstikaḥ /
aśraddhayā hataṃ sarvaṃ kṛtaṃ yatpāralaukikam

ihaloko hato nṝṇāṃ daridrāṇāṃ yathā nṛpa /
manuṣyāṇāṃ tathā janma māghasnānaṃ vinā hatam

makarasthe ravau yo hi na snātyanudite ravau /
kathaṃ pāpaiḥ pramucyeta kathaṃ sa tridivaṃ vrajet

brahmahā hemahārī ca surāpo gurutalpagaḥ /
māghasnāyī vipāpaḥ syāttatsaṃsargī ca paṃcamaḥ

māghamāse raṭaṃtyāpaḥ kiṃcidabhyudite ravau /
brahmaghnaṃ vā surāpaṃ vā kaṃpaṃtaṃ taṃ punīmahe

upapāpāni sarvāṇi pātakāni mahāṃtyapi /
bhasmībhavaṃti sarvāṇi māghasnānodyataṃ naram

kaṃpaṃti sarvapāpāni māghasnānasamāgame /
nāśakālo'yamasmākaṃ yadi snāsyati vāriṇi

evaṃ krośaṃti pāpāni dṛṣṭvā snānodyataṃ naram /
pāvakā iva dīpyaṃte māghasnānairnarottamāḥ

vimuktāḥ sarvapāpebhyo meghebhya iva caṃdramāḥ /
ārdraśuṣkaṃ laghusthūlaṃ vāṅmanaḥ karmabhiḥ kṛtam

māghasnānaṃ dahetpāpaṃ pāvakaḥ samidho yathā /
prāmādikaṃ ca yatpāpaṃ jñānājñānakṛtaṃ ca yat

snānamātreṇa tannaśyenmakarasthe divākare /
niṣpāpāstridivaṃ yāṃti pāpiṣṭhā yāṃti śuddhatām

saṃdeho nātra kartavyo māghasnāne narādhipa /
sarve'dhikāriṇo māghe viṣṇubhaktau yathā nṛpa

sarveṣāṃ svargado māghaḥ sarveṣāṃ pāpanāśanaḥ /
eṣa eva paro maṃtro hyetadeva paraṃ tapaḥ

prāyaścittaṃ paraṃ caitanmāghasnānamanuttamam /
nṛṇāṃ janmāṃtarābhyāsānmāghasnāne matirbhavet

adhyātmajñānakauśalyaṃ janmābhyāsādyathā nṛpa /
saṃsārakardamālepa prakṣālana viśāradam

pāvanaṃ pāvanānāṃ ca māghasnānaparaṃ nṛpa /
snāṃti māghe na ye rājansarvakāmaphalaprade

kathaṃ te bhuṃjate bhogāṃścaṃdrasūryagrahopamān /
śṛṇu rājanmahāścaryaṃ māghasnānaprabhāvajam

kubjikā nāma kalyāṇī brāhmaṇī bhṛguvaṃśajā /
bālavaidhavyaduḥkhārtā tapastepe sudustaram

viṃdhyapāde mahākṣetre revākapilasaṃgame /
tatra sā vratinī bhūtvā nārāyaṇaparāyaṇā

sadācāravatī nityaṃ nityaṃ saṃgavivarjitā /
jiteṃdriyā jitakrodhā satyavāgalpabhāṣiṇī

suśīlā dānaśīlā ca dehaśoṣaṇaśālinī /
pitṛdevadvijebhyaśca datvā huttvā tathānale

ṣaṣṭhe kāle ca sā bhuṅkte hyuṃcchavṛttiḥ sadā nṛpa /
kṛcchrātikṛcchra pārāka taptakṛcchrādibhirvrataiḥ

puṇyānnayati sā māsānnarmadāyāśca rodhasi /
evaṃ tayā tapasvinyā valkalinyā suśīlayā

sumahāsattvaśālinyā dhṛti saṃtoṣayuktayā /
ṣaṣṭirmāghāstayā snātā revākapilasaṃgame

tataḥ sā tapasā kṣīṇā tasmiṃstīrthe mṛtā nṛpa /
māghasnānajapuṇyena tena sā vaiṣṇave pure

uvāsa pramudā yuktā caturyugasahasrakam /
suṃdopasuṃdanāśāya paścātpadmabhavātpunaḥ

tilottameti nāmnā sā brahmaloke'vatāritā /
tena puṇyasyaśeṣeṇa rūpasyaikāyanaṃ yayau

ayonijābalāratnaṃ devānāmapi mohinī /
lāvaṇyahṛdanī tanvī sābhūdapsarasāṃ varā

nipuṇasya vidheḥ sraṣṭurnūnamāścaryakāriṇī /
tāmutpādya vidhātā vai tuṣṭo'nujñāṃ tadā dadau

eṇaśāvākṣi gaccha tvaṃ daityanāśāya satvaram /
tataḥ sā brahmaṇo lokādvīṇāmādāya bhāminī

gatā puṣkaramārgeṇa yatra tau devavairiṇau /
tatra snātvā tu revāyāḥ pavitre nirmale jale

paridhāyāṃbaraṃ raktaṃ baṃdhūkakusumaprabham /
raṇadvalayinīcāru siṃjanmekhalanūpurā

lolamuktāvalīkaṃṭhī calatkuṃḍalaśobhanā /
mādhavī kusumāpīḍā kaṃkelī viṭape sthitā

gāyaṃtī susvaraṃ sāpi pīḍayaṃtī tu vallakīm /
mūrcchayaṃtī svaraṣaṭkaṃ susnigdhaṃ komalaṃ kalam

itthaṃ tilottamā bālā tiṣṭhaṃtyaśokakānane /
dṛṣṭvā daityabhaṭairiṃdoḥ kaleva sukhadā hṛdi ५९pu/
tāṃ dṛṣṭvā vismitai rājansānaṃdaiḥ sainikairbhṛśam /
tvaramāṇairadṛṣṭvaiva gatvā suṃdopasuṃdayoḥ

kathitā saṃbhrameṇaiva varṇayitvā punaḥ punaḥ /
he daityau na vijānīmo devī vā dānavī nu kim

nāgāṃganātha vā yakṣī strīratnaṃ sarvathā tu sā /
yuvāṃ ratnabhujau loke ratnabhūtā hi sābalā

vartate nāti dūre'gre aśoke śokahāriṇī /
gatvā tāṃ paśyataṃ śīghraṃ manmathasyāpi mohinīm

iti senāpatīnāṃ tau śrutvā vācaṃ manoharām /
caṣakaṃ sīdhunastyaktvā vihāya jalasecanam

uttamastrīsahasrāṇi tyaktvā tasmājjalāśayāt /
śatabhārāyasīṃ krūrāṃ kāladaṃḍopamāṃ gadām

bhinnābhinnāṃ gṛhītvā tu javenābhiplutaṃ gatau /
yatra śṛṃgārasajjā sā haṃtuṃ caṃḍīva saṃsthitā

rājansaṃdhukṣayaṃtīva daityayormanmathānalam /
sthitvā tasyāḥ puro jālmau tadrūpeṇavimohitau

viśeṣānmadhunāmattāvūcatustauparasparam /
bhrātarvirama bhāryeyaṃ mamāstu varavarṇinī

tvamevārya tyajaitāṃ me bhāryāṃ tu madirekṣaṇām /
ityāgraheṇa saṃrabdhau mātaṃgāviva sonmadau

anyonyaṃ kālanirdiṣṭau gadayā jaghnatustadā /
parasparaprahāreṇa gatāsū patitau bhuvi

tau mṛtau sainikairdṛṣṭvā kṛtaḥ kolāhalo mahān /
kālarātrisamā keyaṃ hā kimetadupasthitam

evaṃ vadatsu sainyeṣu daityau suṃdopasuṃdakau /
pātayitvā gireḥ śṛṃge hrādinīva ttilottamā

prasthitā gaganaṃ śīghraṃ dyotayaṃtī diśo daśa /
devakāryaṃ tataḥ kṛtvā āgatā brahmaṇaḥ puraḥ

tatastuṣṭena devena vidhinā sānumoditā /
sthānaṃ sūryarathe dattaṃ tava caṃdrānane mayā

bhuṃkṣva bhogānanekāṃstvaṃ yāvatsūryoṃbare sthitaḥ /
itthaṃ sā brāhmaṇī rājanbhūtvā cāpsarasāṃ varā

bhuṃktedyāpi raverloke māghasnānaphalaṃ mahat /
tasmātprayatnato rājanśraddadhānaiḥ sadā naraiḥ

snātavyaṃ makarāditye vāṃcchadbhiḥ paramāṃ gatim /
nānavāpto'tra tasyāsti puruṣārtho hi kaścana

nākṣīṇaṃ pātakaṃ kaṃcinmāghe majjati yo naraḥ /
tulayaṃti na tenātra yajñāḥ sarve sadakṣiṇāḥ

māghasnānena rājeṃdra tīrthe caiva viśeṣataḥ /
na cānyatsvargadaṃ karma na cānyatpāpanāśanam

na cānyanmokṣadaṃ yasmānmāghasnānasamaṃ bhuvi

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe māghamāhātmye vasiṣṭhadilīpasaṃvāde māghasnānapraśaṃsāyāṃ suṃdopasuṃdadaityavadhonāma ṣaḍviṃśatyadhikaśatatamodhyāyaḥ