Scripture Library

Padma Purana · Chapter 6.127

6.127.1

kārtavīrya uvāca/
hetunā kena viprarṣe māghasnāne mahādbhutaḥ /
prabhāvo varṇyate nūnaṃ tanme kathaya suvrata

6.127.2

gatapāpo yadekena dvitīyena divaṃ gataḥ /
vaiśyo'sau māghapuṇyena brūhi me tatkutūhalam

6.127.3

dattātreya uvāca/
nisargātsalilaṃ medhyaṃ nirmalaṃ śucipāṃḍuram /
malahaṃ puruṣavyāghra drāvakaṃ dāhanāśanam /
tārakaṃ sarvabhūtānāṃ poṣaṇaṃ jīvanaṃ ca yat

6.127.4

āpo nārāyaṇodevaḥ sarvavedeṣu paṭhyate /
grahāṇāṃ ca yathā sūryo nakṣatrāṇāṃ yathā śaśī /
māsānāṃ ca tathā māghaḥ śreṣṭhaḥ sarveṣu karmasu

6.127.5

makarasthe ravau māghe prātaḥ kāle tathā'male /
goṣpade'pi jale snānaṃ svargadaṃ pāpināmapi

6.127.6

yogo'yaṃ durlabho rājaṃstrailokye sacarācare /
asminyoge tvaśakto'pi snāyādyadi dinatrayam

6.127.7

dadyātkiṃcidaśakto'pi daridrābhāvavāṃcchayā /
trisnānenāpi māghasya dhanino dīrghajīvinaḥ

6.127.8

paṃca vā sapta vāhāni caṃdravadvardhate phalam /
saṃprāpte makarāditye puṇye puṇyaprade nṛṇām

6.127.9

satkāryāstithayaḥ sarvā snānadānādi karmasu /
kartāraṃ dāpayaṃtīha hyakṣayaṃ śāśvataṃ padam

6.127.10

tasmānmāghe bahiḥ snāyādātmano hitakāmyayā /
athātaḥ saṃpravakṣyāmi māghasnānavidhiṃ param

6.127.11

kartavyo niyamaḥ kaścidvratarūpī narottamaiḥ /
phalātiśayahetorvai kiṃcidbhojyaṃ tyajedbudhaḥ

6.127.12

bhūmau śayīta hotavyamājyaṃ tilavimiśritam /
trikālaṃ cārcayedviṣṇuṃ vāsudevaṃ sanātanam

6.127.13

dātavyo dīpako'khaṃḍo devamuddiśya mādhavam /
iṃdhanaṃ kaṃbalaṃ vastramupānatkuṃkumaṃ ghṛtam

6.127.14

tailaṃ kārpāsakoṣṭhaṃ ca tūlīṃ tūlavaṭīṃ paṭīm /
annaṃ caiva yathāśakti deyaṃ māghe narādhipa

6.127.15

suvarṇaṃ rattikāmātraṃ dadyādvedavide tathā /
taddānamakṣayaṃ rājansamudra iva sarvadā

6.127.16

parasyāgniṃ na seveta tyajeccaiva pratigraham /
māghāṃte bhojayedviprānyathāśakti narādhipa

6.127.17

deyā ca dakṣiṇā tebhya ātmanaḥ śreya icchatā /
ekādaśīvidhānena māghasyodyāpanaṃ tathā

6.127.18

kartavyaṃ śraddadhānena hyakṣayya svargavāṃchayā /
anaṃtapuṇyāvāptyarthaṃ viṣṇusaṃprītihetave

6.127.19

makarasthe ravau māghe goviṃdācyutamādhava /
snānenānena bho deva yathoktaphalado bhava

6.127.20

iti maṃtraṃ samuccārya snāyānmaunī samāhitaḥ /
vāsudevaṃ hariṃ kṛṣṇaṃ mādhavaṃ ca smaretpunaḥ

6.127.21

gṛhe'pi sajalaṃ kuṃbhaṃ vāyunā niśipīḍitam /
tatsnānaṃ tīrthasadṛśaṃ sarvakāmaphalapradam

6.127.22

tatra vratena dātavyaṃ sānnaṃ copaskarānvitam /
tatsnānasya prabhāveṇa naro na nirayaṃ vrajet

6.127.23

taptena vāriṇā snānaṃ yadgṛhe kriyate naraiḥ /
ṣaḍabdaphaladaṃ taddhi makarasthe divākare

6.127.24

bahiḥ snānaṃ tu vāpyādau dvādaśābdaphalaṃ smṛtam /
taḍāge dviguṇaṃ rājannadyāṃ caiva caturguṇam

6.127.25

śatadhā devakhāteṣu śatadhā tu mahānade /
śataṃ caturguṇaṃ rājanmahānadyāśca saṃgame

6.127.26

sahasraguṇitaṃ sarvaṃ tatphalaṃ makare ravau /
gaṃgāyāṃ snānamātreṇa labhate mānavo nṛpa

6.127.27

gaṃgāyāṃ ye'vagāhaṃti māghamāse nṛpottama /
caturyugasahasraṃ tu na pataṃti surālayāt

6.127.28

dinedine sahasraṃ tu suvarṇānāṃ viśāṃpate /
tena dattaṃ tu gaṃgāyāṃ yo māghe snāti mānavaḥ

6.127.29

śatena guṇitaṃ māghe sahasraṃ rājasattama /
nirdiṣṭamṛṣibhiḥ snānaṃ gaṃgāyāmunasaṃgame

6.127.30

pāpaughabhūribhārasya dāhārthe ca prajāpatiḥ /
prayāgaṃ vidadhe bhūpa prajānāṃ ca hite sthitaḥ

6.127.31

śṛṇu sthānamidaṃ samyaksitāsita jalaṃ kila /
pāparūpa paśūnāṃ ca brahmaṇā vihitaṃ purā

6.127.32

sitāsitajale majjedapi pāpaśatānvitaḥ /
makarasthe ravau māghe naiva garbheṣu majjati

6.127.33

sūnārato'pi yo martyaḥ prayāge snānamācaret /
māghemāsi naravyāghra sa yāti paramaṃpadam

6.127.34

sitāsitā tu yā dhārā sarasvatyāvigarbhitā /
tanmārgaṃ viṣṇulokasya sṛṣṭikartā sasarja vai

6.127.35

dustarā vaiṣṇavī māyā devairapi sudurjayā /
prayāge dahyate sā tu māghe māsi narādhipa

6.127.36

tejomayeṣu lokeṣu bhuktvā bhogānanekaśaḥ /
paścāccakriṇi līyaṃte prayāge māgha majjanāt

6.127.37

upaspṛśati yo māghe makarārke sitāsite /
na tatpuṇyaṃ ca saṃkhyātuṃ citragupto'pi vetyalam

6.127.38

sannimajjati yo māghe makarastha sitāsite /
tasya puṇyasya māhātmyaṃ vaktuṃ brahmāpi na kṣamaḥ

6.127.39

saṃvatsaraśataṃ sāgraṃ nirāhārasya yatphalam /
prayāge māghamāse tu tryahasnānasya tatphalam

6.127.40

svarṇabhārasahasreṇa kurukṣetraravigrahe /
yatphalaṃ labhate māghe veṇyāḥ snānāddine dine

6.127.41

rājasūyasahasrasya rājannavikalaṃ phalam /
sitāsite tu māghe ca snānānāṃ bhavati dhruvam

6.127.42

pṛthivyāṃ yāni tīrthāni puryaḥ sapta ca yāḥ punaḥ /
veṇyāṃ snātuṃ samāyāṃti māghemāsi nṛpottama

6.127.43

sarvatīrthāni kṛṣṇāni pāpināṃ saṃgadoṣataḥ /
bhavaṃti śuklavarṇāni prayāge māghamajjanāt

6.127.44

ākalpasaṃcitaṃ pāpaṃ janmabhiryannarairnṛpa /
tadbhavedbhasmasānmāghe snātānāṃ ca sitāsite

6.127.45

vāṅmanaḥkāyajaṃ pāpaṃ narasya vilayaṃ vrajet /
prayāge māghamāse tu tryahasnātasya niścitam

6.127.46

prayāge māghamāse yastryahaṃ snāti ca mānavaḥ /
pāpaṃ tyaktvā divaṃ yāti jīrṇāṃ tvacamivoragaḥ

6.127.47

kurukṣetrasamā gaṃgā yatrakutrāvagāhitā /
tasmāddaśaguṇā puṇyā yatra viṃdhyena saṃgatā

6.127.48

tasmācchataguṇā gaṃgā kāśyāmuttaravāhinī /
kāśyāḥ śataguṇāḥ proktā gaṃgāyāmunasaṃgame

6.127.49

sā sahasraguṇā tāsāṃ bhavetpaścimavāhinī /
yā rājandarśanādeva brahmahatyāpahāriṇī

6.127.6.127.50

yā paścādvāhinī gaṃgā kāliṃdyā saha saṃgatā /
haṃti koṭikṛtaṃ pāpaṃ sā māghe nṛpa durlabhā

6.127.51

yatkathyate'mṛtaṃ rājansā veṇī bhuvi kīrtitā /
tasyāṃ māghe muhūrtaṃ tu devānāmapi durlabham

6.127.52

brahmāviṣṇurmahādevo rudrādityamarudgaṇāḥ /
gaṃdharvā lokapālāśca yakṣakinnarapannagāḥ

6.127.53

aṇimādiguṇaiḥ siddhā ye cānye tattvavādinaḥ /
brahmāṇī pārvatī lakṣmīḥ śacī menāditirditiḥ

6.127.54

sarvāstā devapatnyaśca tathā nāgāṃganā nṛpa /
ghṛtācī menakā raṃbhā urvaśī ca tilottamā

6.127.55

gaṇā hyapsarasāṃ sarve pitṝṇāṃ ca gaṇāstathā /
snātumāyāṃti te sarve māghe veṇyāṃ narādhipa

6.127.56

kṛte yuge svarūpeṇa kalau pracchannarūpiṇaḥ /
prayāge māghamāse tu tryahasnānasya yatphalam

6.127.57

nāśvamedhasahasreṇa tatphalaṃ labhate bhuvi /
tryahasnānaphalaṃ māghe purā kāṃcanamālinī

6.127.58

rākṣasāya dadau bhūpa tena muktaḥ sa pāpakṛt /
kārtavīrya uvāca /
bhagavanrākṣasaḥ ko'sau sā kā kāṃcanamālinī

6.127.59

kathaṃ dattavatī dharmaṃ kathaṃ vā tasya sadgatiḥ /
etatkathaya yogīṃdra atrisaṃtānabhāskara /
yadi tvaṃ manyase śrāvyaṃ paraṃ kautūhalaṃ hi me

6.127.60

dattātreya uvāca/
śṛṇu rājanvicitraṃ tvamitihāsaṃ purātanam /
yasya smaraṇamātreṇa vājapeyaphalaṃ labhet

6.127.61

apsarārūpasaṃpannā nāmnā kāṃcanamālinī /
prayāge māghamāse sā snātvā yāti harālayam

6.127.62

nikuṃje girirājasya tiṣṭhatā girirūpiṇā /
dṛṣṭā gaganamārūḍhā tena vṛddhena rakṣasā

6.127.63

tejasvinī suhemābhā suśroṇī dīrghalocanā /
caṃdrānanā sukeśī ca pīnonnatapayodharā

6.127.64

tāṃ dṛṣṭvā rūpasaṃpannāmuvāca rākṣasastadā /
kā tvaṃ kamalapatrākṣi kuta āgamyate tvayā

6.127.65

ārdraṃ ca vasanaṃ kasmātsārdrā te kabarī kutaḥ /
kutra āgamyate bhīru kutaste khecarī gatiḥ

6.127.66

kena puṇyena vā bhadre tava tejomayaṃ vapuḥ /
atīvarūpasaṃpannaṃ saṃbhūtaṃ ca manoharam

6.127.67

tvadvastrabiṃdupātena mama mūrdhni sulocane /
kṣaṇena hyagamacchāṃtiṃ krūraṃ me mānasaṃ sadā

6.127.68

nīrasya mahimā ko'yametadvyākhyātumarhasi /
tvaṃ me śīlavatī bhāsi nākṛtirnirguṇā bhavet

6.127.69

apsarā uvāca/
śrūyatāmapsarāścāhaṃ bho rakṣaḥ kāmarūpiṇī /
prayāgataścāgatā'haṃ nāmnā kāṃcanamālinī

6.127.70

ārdraḥ parikaro me'taḥ susnātā'haṃ sitāsite /
gaṃtavyaṃ tu mayā rakṣaḥ kailāse tu nagottame

6.127.71

tatrāste pārvatīnāthaḥ surāsurasupūjitaḥ /
veṇīvāriprabhāveṇa rakṣaste krūratā gatā

6.127.72

jātāhaṃ yena puṇyena gaṃdharvasya sumedhasaḥ /
kanyakā divyarūpā tu tatsarvaṃ kathayāmi te

6.127.73

kaliṃgādhipate rājñastvahamāsīcca veśyakā /
rūpalāvaṇyasaṃpannā saubhāgyamadagarvitā

6.127.74

anyāsāṃ yuvatīnāṃ ca tatpure'haṃ śiromaṇiḥ /
tajjanmani mayā rakṣo bhuktvā bhogānyathecchayā

6.127.75

mohitaṃ tatpuraṃ sarvaṃ mayā yauvanasaṃpadā /
ratnāni ca vicitrāṇi bhūṣaṇāni dhanāni ca

6.127.76

vāsāṃsi citrarūpāṇi karpūrāgurucaṃdanam /
etaccopārjitaṃ sarvaṃ mayā mohanarūpayā

6.127.77

nāhaṃ jānāmi hemnoṃtaṃ svanivāse niśācara /
saṃsevaṃte yuvāno me caraṇau kāmapīḍitāḥ

6.127.78

mayā te vaṃcitāḥ sarve sarvasvena tu māyayā /
anyonyaspardhābhāvena mṛtāḥ kecittu kāminaḥ

6.127.79

itthaṃ tannagare ramye sakale me gatistadā /
prāpte tu vārddhake kāle śuśoca hṛdayaṃ mama /
na dattaṃ na hutaṃ japtaṃ na vrataṃ caritaṃ mayā

6.127.80

nārādhito mayā devaścaturvargaphalapradaḥ/
na mayā pūjitā devī durgā durgatināśinī /
sarvapāpaharo viṣṇurna smṛto bhogalubdhayā

6.127.81

na ca saṃtarpitā viprā na kṛtaṃ prāṇināṃ hitam /
aṇumātramidaṃ puṇyaṃ na kṛtaṃ ca pramādataḥ

6.127.82

pātakaṃ tu kṛtaṃ bhadra tena me dahyate manaḥ /
bahudhaivaṃ vilapyāhaṃ brāhmaṇaṃ śaraṇaṃ gatā

6.127.83

brahmaṇyaṃ vedavidvāṃsaṃ tasya rājñaḥ purohitam /
sa hi pṛṣṭo mayā rakṣaḥ kathaṃ me niṣkṛtirbhavet

6.127.84

pāpasyāsya dvijaśreṣṭha kathaṃ yāsyāmi sadgatim /
svenaiva karmaṇā taptāṃ varākīṃ dīnamānasām

6.127.85

pāpapaṃkanimagnāṃ tvaṃ māmuddhara kacagrahaiḥ /
mayi kāruṇyaṃjaṃ vāri varṣaharṣadṛśā dvija

6.127.86

sajjane sādhavaḥ sarve sādhuḥ sādhurasajjane /
ityasau madvacaḥ śrutvā cakārānugrahaṃ mayi

6.127.87

dvija uvāca/
niṣiddhācaraṇaṃ jāne sarvaṃ te'haṃ varānane /
kuru me satvaraṃ vākyaṃ yāhi kṣetraṃ prajāpate

6.127.88

tatra gatvā kuru snānaṃ tena pāpakṣayastava /
sarvaṃ manogataṃ bhadre tvadīyaṃ śocitaṃ mayā

6.127.89

nāhamanyatprapaśyāmi yatte pāpapraṇāśanam /
prāyaścittaṃ paraṃ tīrthe snānaṃ ca ṛṣibhiḥ smṛtam

6.127.90

kiṃtu tīrthe tyajedbhīru manasāpyaśubhaṃ kṛtam /
prayāgasnānaśuddhā tvaṃ svargaṃ yāsyasi niścitam

6.127.91

prayāgasnānamātreṇa nṛṇāṃ svargo na saṃśayaḥ /
anyadeśakṛtaṃ pāpaṃ tatkṣaṇādeva bhāmini

6.127.92

prayāge vilayaṃ yāti pāpaṃ tīrthakṛtaṃ vinā /
śṛṇu bhīru purā śakro gautamasya munervadhūm

6.127.93

dṛṣṭvā kāmavaśaṃ prāptastāṃ gato guptakāmukaḥ /
ugreṇa tena pāpena tadaiva janitaṃ phalam

6.127.94

ṛṣistrīgaṃturiṃdrasya tasyāśca puratastadā /
kutsitaṃ garhitaṃ jātamiti lajjākaraṃ vapuḥ

6.127.95

tadbhartuḥ śāpamāhātmyātsahasrabhagacihnitam /
adhomukhastato bhūtvā devarājo vinirgataḥ

6.127.96

niniṃda svakṛtaṃ karma so'bhibhūtaḥ salajjitaḥ /
meroḥ śirasi toyāḍhye śatayojanavistṛte

6.127.97

tatra gatvā praviṣṭastu hemāṃbhoruhakorake /
tatrastho garhayannityamātmānaṃ manmathaṃ tathā

6.127.98

dhiktāṃ kāmātmatāṃ loke sadyaḥ pātakadāyinīm /
yayā hi narakaṃ yāti sarvalokavigarhitaḥ

6.127.99

āyuḥ kīrtiryaśodharma dhairya dhvaṃsakarī tathā /
dhiṅmanmathaṃ durācāramāpadāṃ niyataṃ padam

6.127.6.127.100

dehasthaṃ durdamaṃ śatrumasaṃtuṣṭaṃ sadāvaśam /
itthaṃvādini pracchanne vāsave padmasadmani

6.127.101

ākhaṃḍalaṃ vinā bhīru devaloko na śobhate /
tato devāḥ sagaṃdharvā lokapālāḥ sakinnarāḥ

6.127.102

śacyā saha samāgamya papracchuste bṛhaspatim /
bhagavanbalabhiddevaṃ naiva jānīmahe vayam

6.127.103

kva tiṣṭhati gataḥ kutra kutra vā mṛgayāmahe /
na nākaḥ śobhate tena vinā devagaṇaiḥ saha

6.127.104

suputreṇa vinā yadvatkulaṃ śrīmadguṇānvitam /
upāyaściṃtyatāṃ sadyaḥ svarloke yena śobhate

6.127.105

sanāthaḥ suśriyāyukto na vilaṃbo'tra yujyate /
iti teṣāṃ vacaḥ śrutvā gururvacanamabravīt

6.127.106

jāne'haṃ svāparādhena lajjayā yatra tiṣṭhati /
rabhasā labdhakāryasya bhuṃkte sa maghavā phalam

6.127.107

nṛṇāṃ nītiparityāgādvipākāḥ syurbhayaṃkarāḥ /
aho rājyamadairmattaḥ kṛtyākṛtyamaciṃtayan

6.127.108

kṛtavānniṃdyamānaṃ hi dṛṣṭādṛṣṭakṣayaṃkaram /
kurvaṃti bāliśā yatra daivopahatabuddhayaḥ

6.127.109

aparādhādyathājanma syādihāmutra niṣphalam /
adhunā tatra gacchāmo yatra śakraḥ sa tiṣṭhati

6.127.110

ityuktvā nirgatāḥ sarve bṛhaspatipurogamāḥ /
dṛṣṭvā sarasi vistīrṇe svarṇapaṃkajakānanam

6.127.111

tuṣṭuvurdevarājānaṃ prabodho yena jāyate /
tato guroḥ prabodhena nirgataḥ padmakuḍmalāt

6.127.112

dīnānano virūpastu vrīḍākuṃcitalocanaḥ /
jagrāha caraṇāviṃdro gurostasyāgrajanmanaḥ

6.127.113

trāhi māṃ niṣkṛtiṃ brūhi pāpasyāsya bṛhaspate /
devarājavacaḥ śrutvā jagau vipro bṛhaspatiḥ

6.127.114

śṛṇu deveṃdra vakṣye'hamupāyaṃ pāpanāśanam /
prayāgasnānamātreṇa tatkṣaṇādeva pātakāt

6.127.115

mucyase devarājatvaṃ tatra yāmaḥ sahaiva te /
atha purodhasā sārdhamāgatya balamardanaḥ

6.127.116

sasnau sitāsite tīrthe sadyo mukto hyaghaistataḥ /
atha devagurustasmai prasannastu varaṃ dadau

6.127.117

prayāgasnānamātreṇa kṣīṇaṃ pāpaṃ tvayānagha /
kṣīṇapāpasya te śakra matprasādena satvaram

6.127.118

sahasrametadyonīnāṃ sahasraṃ syāddṛśāṃ tava /
tadaiva dvijavākyena śuśubhe ca śacīpatiḥ

6.127.119

locanānāṃ sahasreṇa paṃkajairiva mānasam /
atha vṛṃdārakaiḥ sarvairṛṣibhiścābhipūjitaḥ

6.127.120

gaṃdharvaiḥ stūyamānastu gataḥ śakro'marāvatīm /
itthaṃ sadyo vipāpo'bhūtprayāge pākaśāsanaḥ

6.127.121

yāhi tvamapi kalyāṇi prayāgaṃ devasevitam /
sadyaḥ pāpavināśāya tathā svargataye dṛḍham

6.127.122

iti tasya vacaḥ śrutvā setihāsaṃ samaṃgalam /
tadaiva saṃbhramāpannā natvā pādau dvijasya tu

6.127.123

tyaktvā baṃdhujanaṃ sarvaṃ dāsadāsīgṛhaṃ tathā /
sakalānviṣayānrakṣo viṣagrāsāniva sphuṭam

6.127.124

vapuśca kṣaṇavidhvaṃsi paśyaṃtī nirgatā hyaham /
narakārṇavasaṃpāta dāruṇāṃtara vahninā

6.127.125

hṛdaye kuṇapavyāghra tadā tattapyamānayā /
mayā gatvā kṛtaṃ snānaṃ māghe māsi sitāsite

6.127.126

tasya snānasya māhātmyaṃ śṛṇu vṛddhaniśācara /
tryahātpāpakṣayo jātaḥ saptaviṃśatibhirdinaiḥ

6.127.127

śeṣairme yadabhūtpuṇyaṃ tena devatvamāgatā /
ramamāṇā tu kailāse girijāyāḥ priyā sakhī

6.127.128

jātismarā tathā jātā prayāgasya prabhāvataḥ /
smṛtvā prayāgamāhātmyaṃ māghe māghe vrajāmyaham

6.127.129

iti rākṣasa yatpṛṣṭaṃ tvayā vismitacetasā /
tanmayā kathitaṃ sarvaṃ caritaṃ prītaye tava

6.127.130

matprītaye caritraṃ svaṃ tvaṃ brūhi mama rākṣasa /
karmaṇā kenajāto'si virūpo'tibhayaṃkaraḥ

6.127.131

śmaśrulo dīrghadaṃṣṭraṃśca kravyādo girigahvare /
rākṣasa uvāca/
iṣṭaṃ dadāti gṛhṇāti guhyaṃ vadati pṛcchati

6.127.132

prītyā hi sajjano bhadre tacca sarvaṃ tvayi sthitam /
tvayā saṃbhāvito nūnaṃ manye'haṃ vāmalocane

6.127.133

bhāvinī niṣkṛtiḥ sadyastvayāsya krūrakarmaṇaḥ /
ato vakṣyāmi te bhadre duṣkṛtaṃ yatsvayaṃkṛtam

6.127.134

nivedya sajjane duḥkhaṃ tataḥ sarvasukhī bhavet /
śṛṇu suśroṇyahaṃ kāśyāṃ bahvṛco vedapāragaḥ

6.127.135

jātaḥ purā dvijaḥ śreṣṭhaḥ kule mahati nirmale /
rājñāṃ duṣkṛtināṃ bhīru śūdrāṇāṃ ca tathā viśām

6.127.136

vārāṇasyāṃ kṛto ghoro mayā duṣṭapratigrahaḥ /
bahudhā bahudhā vāraṃ niṣiddhaḥ kutsito bahu

6.127.137

cāṃḍālasyāpi na tyakto mayā duṣṭapratigrahaḥ /
anyacca pātakaṃ tatra mamābhūnmūḍhacetasaḥ /
tannāsti duṣkṛtaṃ karma mayā yatra na yatkṛtam

6.127.138

anyacca śrūyatāṃ doṣaḥ kṣetrasya varavarṇini /
avimukte'ṇumātraṃ yattadaghaṃ merutāṃ vrajet /
na dharmastu mayā kaścitsaṃcitastatra janmani

6.127.139

tato bahutithe kāle mṛtastatraiva śobhane /
avimuktaprabhāveṇa na cāhaṃ narakaṃ gataḥ

6.127.140

avimukte mṛtaḥ kaścinnarakaṃ neti kilbiṣī /
avimukte kṛtaṃ kiṃcitpāpaṃ vajrī bhaveddṛḍham

6.127.141

vajralepena pāpena tena me janma rākṣasam /
raudraṃ krūrataraṃ pāpaṃ saṃbhūtaṃ himaparvate

6.127.142

dvirjāto gṛdhrayonau prāktrirvyāghro dviḥ sarīsṛpaḥ /
ekavāramulūkastu viḍvarāhastataḥ param

6.127.143

idaṃ tu daśamaṃ janma rākṣasaṃ mama bhāminī /
atītāni sahasrāṇi varṣāṇi mama janmanaḥ

6.127.144

nāsti me niṣkṛtirbhadre etasmādduḥkhasāgarāt /
atra triyojanaṃ subhrūrnirjaṃtu hi mayā kṛtam

6.127.145

anāgasāṃ ca bhūtānāṃ bahūnāṃ ca kṛtaḥ kṣayaḥ /
karmaṇā tena me subhrūrdahyate satataṃ manaḥ

6.127.146

tvaddarśanasudhāsiktaṃ gataṃ śaityaṃ mano mama /
tīrthaṃ phalati kālena sadyaḥ sādhusamāgamaḥ

6.127.147

ataḥ satsaṃgatiṃ subhrūḥ praśaṃsaṃti manīṣiṇaḥ /
etatte kathitaṃ sarvaṃ svaduḥkhaṃ hṛdgataṃ mayā

6.127.148

viralaḥ sajjanaḥ subhrūḥ svātmā yasya na khidyate /
jānāsyatrocitaṃ tvaṃ hi kiṃcinno vacmyataḥ param

6.127.149

asya duḥkhodadheḥ pāraṃ kathaṃ yāmīti ciṃtayan /
sajjanānāṃ samā bhūtiḥ sarveṣāmupajīvanam

6.127.6.127.150

kṣīrārṇavaḥ payo datte haṃsāya na bakāya kim /
dattātreya uvāca/
iti tasya vacaḥ śrutvā dayārdrīkṛtamānasā

6.127.151

dharmadāne matiṃ kṛtvā jagau kāṃcanamālinī /
kariṣye niṣkṛtiṃ rakṣa idānīṃ khalu mā śucaḥ

6.127.152

pratijñāṃ tu dṛḍhāṃ kṛtvā yatiṣye tava muktaye /
bahavo hi kṛtā māghā varṣe varṣe yathāvidhi

6.127.153

śraddhāpūrvaṃ mayā bhadra brahmakṣetre sitāsite /
tāṃ vadāmi tu saṃkhyātiṃ tasya dharmasya rākṣasa

6.127.154

gūḍho dharmo hi kartavya ityūcurvibudhā janāḥ /
ārte dānaṃ praśaṃsaṃti munayo vedavādinaḥ

6.127.155

sāgare varṣato bhadra kiṃ meghasya phalaṃ bhavet /
anubhūtaṃ mayā rakṣaḥ svayaṃ tatpuṇyajaṃ phalam

6.127.156

tattu dāsyāmi te mitra sadyaḥ pāpavināśanam /
niṣpīḍyātha tato vastraṃ jalaṃ kṛtvā karāṃbuje

6.127.157

dadau sā māghajaṃ puṇyaṃ tasmai vṛddhāya rakṣase /
śṛṇu rājanvicitraṃ hi prabhāvaṃ māghadharmajam

6.127.158

tadaivaṃ prāpya tatpuṇyaṃ vimuktā rākṣasī tanuḥ /
saṃbhūto devatākārastejo bhāskaravigrahaḥ

6.127.159

devayānaṃ samārūḍhaḥ saharṣotphullalocanaḥ /
dyotamānastadā vyomni bhāsayanprabhayā diśaḥ

6.127.160

divyarūpadharo reje dvitīya iva bhāskaraḥ /
tato'bhinaṃdayāmāsa satāṃ kāṃcanamālinīm

6.127.161

bhadre vettīśvaro devaḥ karmaṇāṃ yaḥ phalapradaḥ /
tattvayopakṛtaṃ sarvaṃ yatra me nāsti niṣkṛtiḥ

6.127.162

idānīmapi kāruṇyātprasīdānugrahaṃ kuru /
śikṣāṃ vidhehi me devi sarvanītimayīṃ śubhām

6.127.163

sarvadharmakarīṃ nūnaṃ na kurve pātakaṃ yathā /
tāṃ śrutvā tvadanujñātaḥ paścādyāmi surālayam

6.127.164

dattātreya uvāca/
etanniśamya tenoktaṃ priyaṃ dharmamayaṃ vacaḥ /
atiprītyābravīddharmaṃ rājankāṃcanamālinī

6.127.165

dharmaṃ bhajasva satataṃ tyaja bhūtahiṃsāṃ sevasva sādhupuruṣānjahi kāmaśatrum /
anyasya doṣaguṇakīrtanamāśu hitvā satyaṃ vadārcaya hariṃ vraja devalokam

6.127.166

dehe'sthimāṃsarudhire svamatiṃ tyaja tvaṃ jāyāsutādiṣu sadā mamatāṃ vimuṃca /
paśyāniśaṃ jagadidaṃ kṣaṇabhaṃguraṃ hi vairāgyabhāvarasiko bhava yoganiṣṭhaḥ

6.127.167

prītyā mayā nigaditaṃ tava dharmamārgaṃ citto nidhehi sakalaṃ bhavaśīlayuktaḥ /
saṃtyajya rākṣasatanuṃ dhṛtadevadeho jyotirmayo vraja yathāsukhamāśu nākam

6.127.168

śrutvādharmaṃ tato hṛṣṭaḥ saṃtuṣṭo rākṣaso'bravīt /
bhavapramuditā nityaṃ sarvadā śivamastu te

6.127.169

ācandrārkaṃ ramasva tvaṃ kailāse śivasannidhau /
umayā'khaṃḍitaṃ prema tavāstu varavarṇini

6.127.170

dharmaniṣṭhā taponiṣṭhā mātastvaṃ bhava sarvadā /
māstu lobhaḥ śarīre te āpannārti sadā hara

6.127.171

ityuktvā tu praṇamyātha satāṃ kāṃcanamālinīm /
jagāma rākṣasaḥ svargaṃ gaṃdharvairbahubhiḥ stutaḥ

6.127.172

devakanyāstadāgatya vavarṣuḥ puṣpavṛṣṭibhiḥ /
tasyāḥ kāṃcanamālinyā mūrdhni harṣasamākulāḥ

6.127.173

tāmāliṃgya tataḥ procuḥ kanyakāstu priyaṃ vacaḥ /
kṛtaṃ bhadre tvayā citraṃ rākṣasasya vimokṣaṇam

6.127.174

duṣṭasyāsya bhayātkaścidviśatyasminna kānane /
adhunā nirbhayā hyatra vicarāmo yathāsukham

6.127.175

śrutvā tadvacanaṃ rājaṃstāsāṃ kāṃcanamālinī /
hṛṣṭā tenaiva dānena kṛtakṛtyā tadā satī

6.127.176

taṃ rākṣasaṃ kāṃcanamālinīvarā gandharvakanyā parimocya satvaram /
krīḍaṃtyamūbhiḥ prayayau harālayaṃ prītyā sapūrṇā ca paropakārayā

6.127.177

saṃvādamenaṃ varakanyakeritaṃ bhaktyā paraṃ yaḥ śṛṇuyācca mānavaḥ /
na bādhyate jātu sadā sa rākṣasairdharme matistasya bhṛśaṃ hi jāyate

6.127.127

iti śrīpādme mahāpurāṇe paṃcapaṃcāśatsāhasryāṃ saṃhitāyā/
muttarakhaṇḍe māghamāsamāhātmye dilīpavasiṣṭhasaṃvāde rākṣasamokṣonāma saptaviṃśatyadhikaśatatamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0