Padma Purana · Chapter 6.114

śrīkṛṣṇovāca/
tato dhaneśvaraṃ nītvā nirayānpretapo'bravīt /
pradarśayiṣyaṃstānsarvānyamasyānucarastadā

pretapa uvāca/
paśyemānnirayānghorāndhaneśvara mahābhayān /
yeṣu pāpakarā nityaṃ pacyaṃte yamakiṃkaraiḥ

taptavālukanāmāyaṃ nirayo ghoradarśanaḥ /
yasminnete dagdhadehāḥ kraṃdaṃte pāpakāriṇaḥ

atithīnvaiśvadevānte kṣutkṣāmānāgatāngṛhe /
ye nārcaṃti narāste hi pacyaṃte svena karmaṇā

gurvagnibrāhmaṇāndevāṃstathā mūrddhābhiṣiktakān /
tāḍayaṃti padā ye vai te nirdagdhāṃghrayastvime

ṣaḍbhedastveṣanirayo nānāpāpaiḥ prapadyate /
tathaiva cāṃdhatāmisro dvitīyo nirayo mahān

paśya sūcīmukhairdeho bhidyate pāpakarmaṇā /
krimibhirghoravaktraiśca tatsaṃparkāgamairdvija

asāvapi sthitaḥ ṣoḍhā śvakākamṛgapakṣibhiḥ /
paramarmabhido martyāḥ pacyaṃte teṣu pāpinaḥ

tṛtīyaḥ krakaco hyeṣa nirayo ghoradarśanaḥ /
yatreme krakacairmartyāḥ pāṭyaṃte pāpakāriṇaḥ

asipatravanādyaistu ṣaṭprakāro vyavasthitaḥ /
patnīputrādibhirye vai viyogaṃ kārayaṃti hi

iṣṭairanyairapi parānpacyaṃte ta ime narāḥ /
asipatraiśchidyamānā chedabhītyā palāyitāḥ

pacyaṃte pāpinaḥ paśya kraṃdamānā itastataḥ /
argalākhyo mahāghoraścaturtho nirayo hyayam

paśya nānāvidhaiḥ pāśairābadhya yamakiṃkaraiḥ /
mudgarādyairvadhyamānāḥ kraṃdaṃte te ca pāpinaḥ

sajjanānbrāhmaṇādyāṃśca viruṃdhaṃtīha ye narāḥ /
kaṃṭhagrahādyaiste pāpāḥ pacyaṃte yamakiṃkaraiḥ

asāvapi hi ṣaḍbhedo vadhabhedādibhiḥ sthitaḥ /
kūṭaśālmalināmānaṃ nirayaṃ paśya paṃcamam

yatrāṃgāranibhā ete śālmalyādyāḥ sthitā dvija /
yatra ṣoḍhā vipacyaṃte yātanābhirime narāḥ

paradārā paradravya paradroha ratāḥ sadā /
raktapūyamimaṃ paśya ṣaṣṭhaṃ nirayamadbhutam

adhomukhā vipacyaṃte yatra pāpakṛto narāḥ /
abhakṣyabhakṣakā niṃdā paiśunyādi ratā ime

bhajyamānā vadhyamānāḥ kraṃdaṃte bhairavānsvarān /
ṣaṭprakārairvigaṃdhāḍhyairasāvapi ca saṃsthitaḥ

kuṃbhīpākaḥ saptamo'yaṃ nirayo ghoradarśanaḥ /
ṣoḍhāstailādibhirdravyairdhaneśvara vilokaya

mahāpātakino yatra kvathyaṃte yamakiṃkaraiḥ /
bahūnyabdasahasrāṇi sonmajjananimajjanaiḥ

catvāriṃśanmitānetāndvyadhikānpaśya rauravān /
akāmātpātakaṃ śuṣkaṃ kāmādārdramudāhṛtam

ārdraśuṣkādibhiḥ pāpairdviprakārānavasthitān /
caturaśītisaṃkhyākaiḥ pṛthagbhedairavasthitān

yatprakīrṇamapāṃkteyaṃ malinīkaraṇaṃ tathā /
jñātibhraṃśakaraṃ tadvadupapātakasaṃjñakam

atipāpaṃ mahāpāpaṃ saptadhā pātakaṃ smṛtam /
ebhiḥ saptasu pacyaṃte nirayeṣu yathākramam

kārtikavratibhiryasmātsaṃsargo hyabhavattava /
tatpuṇyopacayādete nirhṛtā nirayāḥ khalu

śrīkṛṣṇa uvāca/
darśayitveti nirayānpretapastamathāharat /
dhaneśvaraṃ yakṣalokaṃ paścādāsītsa tatra hi

dhanadasyānugaḥ so'yaṃ dhanayakṣeti sa smṛtaḥ /
yadākhyāyākarottīrthamayodhyāyāṃ tu gādhijaḥ

evaṃ prabhāvaḥ khalu kārtiko'yaṃ muktiprado muktikaraśca yasmāt /
prayātyanekārjitapātako'pi vratasthasaṃdarśanato'pi muktim

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye dhaneśvaropākhyāne caturdaśādhikaśatatamo'dhyāyaḥ