Padma Purana · Chapter 6.113

śrīkṛṣṇa uvāca/
purāvaṃtīpure vāsī vipra āsīddhaneśvaraḥ /
brahmakarmaparibhraṣṭaḥ pāpaniṣṭhaḥ sudurmatiḥ

rasakaṃbalacarmādi vikrayānṛtavarttanaḥ /
steyaveśyāsurāpānadyūtasaṃsaktamānasaḥ

deśāddeśāṃtaraṃ gacchankrayavikrayakāraṇāt /
māhiṣmatīṃ purīṃ yātaḥ kadācitsa dhaneśvaraḥ

mahiṣeṇa kṛtā pūrvaṃ tasmānmāhiṣmatībhavat /
yasyāṃ vaprataṭābhāti narmadā pāpanāśinī

kārtikavratinastatra nānāgrāmāgatānnarān /
sa dṛṣṭvā vikrayaṃ kurvanmāsamekamuvāsa ha

sa nityaṃ narmadātīre bhramanvikrayakāraṇāt /
dadarśa brāhmaṇānsnātānjapadevārcaneratān

kāṃścitpurāṇaṃ paṭhataḥ kāṃścittacchravaṇe ratān /
nṛtyagāyanavāditraviṣṇustavanatatparān

viṣṇumudrāṃkitānkāṃścinmālātulasidhāriṇaḥ /
dadarśa kautukāviṣṭastatra tatra dhaneśvaraḥ

nityaṃ paribhramaṃstatra darśanasparśabhāṣaṇāt /
vaiṣṇavānāṃ tathā viṣṇornāmaśrāvādi so'labhat

evaṃ māsaṃ sthitaḥso'tha kārtikodyāpane vidhau /
kriyamāṇe dadarśāsau bhaktairjāgaraṇaṃ hareḥ

paurṇamāsyāṃ tato'paśyadvividhaṃ pūjanādikam /
dakṣiṇā bhojanādyaṃ ca dīpadānaṃ vratasthitaiḥ

tato'rkāstamaye caivaṃ dīpotsavavidhiṃ tadā /
kriyamāṇaṃ dadarśāsau prītyarthaṃ tripuradviṣaḥ

tripurāṇāṃ kṛto dāho yatastasyāṃ śivena tu /
atastu kriyate tasyāṃ tithau bhaktairmahotsavaḥ /
mama rudrasya yaḥ kaścidaṃtaraṃ parikalpayet

tasya puṇyakriyāḥ sarvā niṣphalāḥ syurna saṃśayaḥ /
tatra nṛtyādikaṃ paśyanbabhrāma sa dhaneśvaraḥ /
tāvatkṛṣṇāhinā daṣṭo vikalaḥ sa papāta ha /
janāstaṃpati taṃ vīkṣya parivavruḥ kṛpānvitāḥ

tulasīmiśritaistoyaistanmukhaṃ siṣicustadā /
atha dehe parityakte taṃ baddhvā yamakiṃkarāḥ

bādhyamānaṃ kaśāghātairninyuḥ saṃyaminīṃ ruṣā /
citraguptastu taṃ dṛṣṭvā nirbhartsyāvedayattadā

yamāyatena bālyāttu karma yadduṣkṛtaṃ kṛtam /
citragupta uvāca/
naivāsya dṛśyate kiṃcidābālyātsukṛtaṃ kvacit

duṣkṛtaṃ śakyate vaktuṃ śatavarṣairna bhāskare /
pāpamūrtirayaṃ duṣṭaḥ kevalaṃ dṛśyate vibho

tasmādākalpamaryādaṃ niraye paripācyatām /
śrīkṛṣṇa uvāca/
niśamyetthaṃ vacaḥ krodhādyamaḥ prāha svakiṃkarān

darśayannātmanorūpaṃ kālāgnisadṛśaprabham /
yama uvāca/
bho pretāpanayasvainaṃ badhyamānaṃ svamudgaraiḥ

kuṃbhīpāke kṣipasvāśu tailakvathanaśabdite /
yāvatkṣiptastu tatrāsau tāvacchītalatāṃ yayau

kuṃbhīpāko yathā vahniḥ prahlādakṣepaṇātpurā /
taddṛṣṭvā mahadādaścaryaṃ pretapo vismayānvitaḥ

vegādāgatya tatsarvaṃ yamāyākathayattadā /
yamastu kautukaṃ śrutvā pretapena niveditam

āḥ kimetaditi procya samyagetadvicārayat /
tāvadabhyāgatastatra nāradaḥ prahasaṃstvaran

yamena pūjitaḥ samyaktaṃ dṛṣṭvā vākyamabravīt /
nārada uvāca/
naivāyaṃ nirayānbhoktuṃ kṣamaḥ savitṛnaṃdana

yasmādetasya saṃjātaṃ karma yannirayāpaham /
yaḥ puṇyakarmaṇāṃ kuryāddarśanasparśabhāṣaṇam

tatṣaḍaṃśamavāpnoti puṇyasya niyataṃ naraḥ /
asaṃkhyātaistusaṃsargaiḥ kṛtavāneṣa yaddhareḥ

kārtikavratibhirmāsaṃ tasmātpuṇyāṃśabhāgayam /
paricaryākarasteṣāṃ saṃpūrṇavratapuṇyabhāk

ato'syorjavratodbhūtapuṇyasaṃkhyā na vidyate /
kārttikavratināṃ puṃsāṃ pātakāni mahāṃtyapi

nāśayatyeva sarvāṇi viṣṇuḥ sadbhaktavatsalaḥ /
aṃte tannāmabhistoyaistulasīmiśritaistvayam

vaiṣṇavānugrahī yasmānnarake naiva pacyate /
tasmānnihatapāpo'yaṃ sadgatiṃ yātumarhati

ārdraiḥ śuṣkairyathāpāpairniraye bhogasaṃnidhiḥ /
prāpyate sukṛtaistadvatsvargabhogasya saṃnidhiḥ

tasmādakāmapuṇyo hi yakṣayonisthitastvasau /
vilokya narakānsarvānpāpabhogamavāpnuyāt

śrīkṛṣṇa uvāca/
ityuktvā gatavati nārade'tha sauristadvākyaśravaṇavibuddha tatsukarmā /
vipraṃ taṃ punaranayatsvakiṃkareṇa tānsarvānnirayagaṇānpradarśayiṣyan

iti śrīpādme mahāpurāṇe paṃcapaṃcāśatsāhastrasaṃhitāyāmuttarakhaṃḍe kārtikamāhātmye śrīkṛṣṇasatyabhāmāsaṃvāde dhaneśvaropākhyāne trayodaśādhikaśatatamo'dhyāyaḥ