Padma Purana · Chapter 6.115

sūta uvāca/
ityuktvā vāsudevo'sau satyabhāmāmatipriyām /
sāyaṃsaṃdhyādikaṃ kartuṃ jagāma jananīgṛham

evaṃ prabhāvaḥ proktoyaṃ kārtikaḥ pāpanāśanaḥ /
viṣṇupriyakaro nityaṃ bhuktimuktipradaḥ sadā

harijāgaraṇaṃ prātaḥ snānaṃ tulasisevanam /
udyāpanaṃ dīpadānaṃ vratānyetāni kārtike

paṃcakairvratakairebhiḥ saṃpūrṇaṃ kārtikavratam /
phalaṃ prāpnoti tatproktaṃ bhuktimuktiphalapradam

ṛṣaya ūcuḥ/
viṣṇoḥ priyo'tiphaladaḥ prokto'yaṃ romaharṣaṇe /
kārtikasya vidhiḥ samyakpāvanaḥ pāpanāśanaḥ

avaśyameva karttavyaḥ prāpya duḥkhanivāraṇaḥ /
mokṣārthibhirnaraḥ samyagbhogakāmairathāpivā

evaṃ sthite yathākaścidvratasthaḥ saṃkaṭe sthitaḥ /
durgāraṇyasthito vāpi vyādhibhiḥ paripīḍitaḥ /
kathaṃ tena prakartavyaṃ kārtikavratakaṃ śubham

sūta uvāca/
yasmādatyaṃtaphaladaṃ kartavyaṃ tu yathā naraiḥ /
tatsarvaṃ kathayiṣye'haṃ śṛṇudhvaṃ munipuṃgavāḥ

viṣṇoḥ śivasya vā kuryādālaye harijāgaram /
śivaviṣṇugrahābhāve sarvadevālayeṣvapi

durgāraṇyasthito yaśca yadi vā yadgato bhavet /
kuryāttadāśvatthamūle tulasīnāṃ vaneṣvapi

viṣṇunāmapradhānānāṃ gāyanādviṣṇusannidhau /
gosahasrapradānasya phalaṃ prāpnoti mānavaḥ

vādyakṛtpuruṣaścāpi vājapeyaphalaṃ labhet /
sarvatīrthāvagāhotthaṃ nartakaḥ phalamāpnuyāt

sarvametallabhetpuṇyaṃ teṣāṃ tu dravyadaḥ pumān /
praśaṃsādarśanābhyāṃ hi tatṣaḍaṃśamavāpnuyāt

āpadgato yadāpyaṃbho na labhetsnapanāya saḥ /
vyādhito vā punaḥ kuryādviṣṇornāmāpamārjanam

udyāpanavidhiṃ kartuṃ na śakto yo vrate sthitaḥ /
brāhmaṇānbhojayecchaktyā vratasaṃpūrṇahetave

yasmādatyaṃtaphalado na tyājyaḥ sarvadā naraiḥ /
avyaktarūpiṇo viṣṇoḥ svarūpaṃ brāhmaṇā bhuvi

tatsaṃtuṣṭyā susaṃtuṣṭaḥ sarvadā syāṃ na saṃśayaḥ /
aśakto dīpadāne tu paradīpaṃ prabodhayet

teṣāṃ vā rakṣaṇaṃ kuryādvātādibhyaḥ prayatnataḥ /
abhāve tulasīnāṃ tu pūjayedvaiṣṇavaṃ dvijam

yasmātsaṃnihito viṣṇuḥ svabhakteṣveva sarvadā /
sarvābhāve vratī kuryādbrāhmaṇānāṃ gavāmapi

sevāṃ vāśvatthavaṭayorvratasaṃpūrṇahetave

ṛṣaya ūcuḥ /
kathaṃ tvayāśvatthavaṭau gobrāhmaṇasamau kṛtau /
sarvebhyo'pi tarubhyastau kasmātpūjyatarau kṛtau

sūta uvāca/
aśvattharūpī bhagavānviṣṇureva na saṃśayaḥ /
rudrarūpī vaṭastadvatpālāśo brahmarūpadhṛk

darśanaṃ pūjanaṃ sevā teṣāṃ pāpaharā smṛtā /
duḥkhāpadvyādhiduṣṭānāṃ vināśakaraṇī dhruvam

ṛṣaya ūcuḥ/
kathaṃ vṛkṣatvamāpannā brahmaviṣṇumaheśvarāḥ /
etatkathaya sarvajña saṃśayo'tra mahānhi naḥ

sūta uvāca/
pārvatīśivayordevaiḥ surataṃ kurvatoḥ kila /
agnirbrāhmaṇarūpeṇa preṣito vighnakṛtpurā

tataḥ sā pārvatī kruddhā śaśāpa tridivaukasaḥ /
ratotsavasukhabhraṃśātkaṃpamānā ruṣā tadā

pārvatyuvāca/
kṛmikīṭādayopyete jānaṃti surataṃ sukham /
tadvighnakaraṇāddevā hyudbhijjatvamavāpsyatha

sūta uvāca/
evaṃ sā pārvatī devānaśapatkruddhamānasā /
tasmādvṛkṣatvamāpannāḥ sarve devagaṇāḥ kila

tasmādimau viṣṇumaheśvarāvubhau babhūvaturbodhivaṭau munīśvarāḥ /
bodhistvagādārkidine spṛśatvamaspṛśyatāmarkajaviṣṭiyogāt

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārttikamāhātmye aśvatthavaṭapraśaṃsanaṃnāma paṃcadaśādhikaśatatamo'dhyāyaḥ