Padma Purana · Chapter 5.86

sūta uvāca-
iti tasya vacaḥ śrutvā nāradasya mahātmanaḥ /
aṃbarīṣaśca rājarṣirvismito vākyamabravīt

aṃbarīṣa uvāca-
mārgaśīrṣādikānmāsānhitvā puṇyānmahāmune /
sarvamāsādhikaṃ māsaṃ vaiśākhaṃ kiṃ praśaṃsasi

sarvebhyo'pyadhikaḥ kasmānmādhavo mādhavapriyaḥ /
ko vidhistatra kiṃ dānaṃ kiṃ tapaḥ kā ca devatā

tvatpādāṃbhojarajasā pāvitasya ca me mune /
upadeśaprasādena prasādaṃ kartumarhasi

dharmajño dharmamārgāṇāmuddhartāsi mahāmune /
tvameko'khilatattvārthavettā dharmopadeśakaḥ

kartopadeṣṭā maṃtā vānumaṃtāpi prayojakaḥ /
śāstravidbhirmunivara smaryaṃte samabhāginaḥ

vratasatratapodānairyatphalaṃ samavāpyate /
dharmopadeśanenaiva tatsarvamupalabhyate

tīrthasnānaṃ tapoyajñakarma yatkurute mune /
api tatphalabhāgīsyādyaḥ pravartayitā bhavet

yadyadācarati śreṣṭhastattadevetaro janaḥ /
sa yatpramāṇaṃ kurute lokastadanuvartate

tadarhati bhavāndharmamupadeṣṭuṃ tadadbhutam /
durllabho gurusaṃbodho deśakālopapattayaḥ

na kecana tathā bhāvāścetaḥ śītalayaṃtinaḥ /
rājyalābhādayo'pyete yathā tava samāgamaḥ

sūta uvāca-/
atha maṃdamṛdusmerasphuraddaṃtaprabhānugaḥ /
aṃbarīṣaṃ pratyuvāca nārado munisattamaḥ

nārada uvāca-/
śṛṇu rājanpravakṣyāmi hitāya jagatastava /
vidhirmādhavamāsasya yacchruto brahmaṇaḥ purā

durllabhaṃ bhārate varṣe janma tasmānmanuṣyatā /
mānuṣye durllabhe loke svasvadharmapravarttanam

tato'pi bhaktirbhūpāla vāsudeve'tidurllabhā /
tatrāpi durllabho māso mādhavo mādhavapriyaḥ

tamavāpya tato māsaṃ snānadānajapādikam /
kurvaṃti vidhinā ye tu dhanyāste kṛtino narāḥ

teṣāṃ darśanamātreṇa pāpino'pi vikilbiṣāḥ /
bhavaṃti bhagavadbhāvabhāvitā dharmakāṃkṣiṇaḥ

mādhave māsi yaiḥ snātaṃ prātarniyamasaṃyutaiḥ /
te koṭivarṣaparyaṃtaṃ krīḍaṃte naṃdane vane

yathā na vāridhisamo loke ko'pi jalāśayaḥ /
tathā māso na vaiśākhasadṛśo mādhavapriyaḥ

tāvatpāpāni tiṣṭhaṃti manuṣyāṇāṃ kalevare /
yāvatkilamaladhvaṃsī māso nāyāti mādhavaḥ

avaśiṣṭadinānyeva paṃcamāsasya tasya vai /
ekādaśīṃ samārabhya sarvamāsasamāni vai

vaiśākhe pūjito devo mādhavo madhuhā tu yaiḥ /
nānopacārai rājeṃdra taiḥ prāptaṃ janmanaḥ phalam

kiṃ kiṃ na durllabhataraṃ prāpyate māsi mādhave /
snānena parameśasya pūjanena yathāvidhi

na dattaṃ na hutaṃ japtaṃ na tīrthe maraṇaṃ kṛtam /
yairhi nārāyaṇo naiva dhyāto nikhilapāpahā

teṣāṃ janma nṛṇāṃ loke jñātavyaṃ niṣphalaṃ nṛpa /
dravyeṣu vidyamāneṣu kṛpaṇo yo bhavennaraḥ

adatvā mriyate yo hi tasya dravyaṃ nirarthakam /
tīrthasnānādi tapasā satkule janma labhyate

na dānena vinā bhūpa kiṃcidapyupatiṣṭhati /
vaiśākhasnānamāhātmyādapi paṃcadinātmakāt

satkule prāpyate janma vaibhavaṃ vividhaṃ tathā /
suputraḥ sukulaṃ bhūpa dhanadhānyaṃ varastriyaḥ

sujanmamaraṇaṃ cāpi subhogāḥ sukhameva ca /
sadā dāne'dhikā prītiraudāryaṃ dhairyamuttamam

prasādāttasya devasya viṣṇoścaiva mahātmanaḥ /
nārāyaṇasya jāyaṃte siddhayo bhūpa vāṃcchitāḥ

ūrje māsi tapo māsi mādhave mādhavapriye /
snātvā dāmodaraṃ bhaktyā mādhavaṃ madhusūdanam

viśeṣeṇa samabhyarcya datvā dānāni śaktitaḥ /
ehikaṃ sukhamāsādya naro haripadaṃ vrajet

anekajanmārjitapātakāvalī vilīyate mādhavamajjanena /
sūryodaye bhūpa yathā tamisraṃ vacaḥ svayaṃbhūridamādiśanme

cakāra viṣṇurvipulapracāraṃ māsasya vai mādhavasaṃjñakasya /
yamasya guptaṃ vacasā viciṃtya manuṣyalokaṃ gamitaṃ cakāra

tasmādasminsamāyāte mādhave māsi vaiṣṇavaiḥ /
snātvā puṇyajale tīrthe gaṃgāyāḥ pāvane nṛṇām

revāyā vā mahārāja yāmune śārade'thavā /
prātastvanudite bhānau vidhānena nṛpottama

pūjayitvā ca deveśaṃ mukuṃdaṃ madhusūdanam /
putrapautradhanaiḥ śreyo vāṃcchitāni sukhāni ca

anubhūya tapastvaṃte svargamakṣayamāpnuyāt /
evaṃ jñātvā mahābhāga madhusūdanamarcaya

snātvā samyagvidhānena vaiśākhe tu viśeṣataḥ /
devamārādhya govindaṃ nārāyaṇamanāmayam

prāpsyasi tvaṃ sukhaṃ putraṃ dhanāni ca hareḥ padam /
devadevaṃ namaskṛtya mādhavaṃ pāpanāśanam

prārabheta vratamidaṃ paurṇamāsyāṃ madhornṛpa /
yamaiśca niyamairyuktaḥ śaktyā kiṃcitpradāya ca

haviṣyabhugbhūmiśāyī brahmacaryavrate sthitaḥ /
kṛcchrāditapasā kṣāmo dhyāyannārāyaṇaṃ hṛdi

evaṃ prāpya ca vaiśākhīṃ dadyānmadhutilādikam /
bhojanaṃ dvijamukhyebhyo bhaktyā dhenuṃ sadakṣiṇām

acchidraṃ prārthayeccāpi tasya snānasya bhūsurān /
yathā lakṣmīḥ priyā bhūpa mādhavasya jagatpateḥ

tathaiva mādhavo māso madhusūdanavallabhaḥ /
evaṃ vidhiyuto martyaḥ snātvā dvādaśavatsaram

udyāpanaṃ carecchaktyā madhusūdanatuṣṭaye /
idaṃ mādhavamāsasya māhātmyaṃ kathitaṃ tava

yatpurā brahmaṇo vaktrācchrutamāsīnmayā nṛpa

iti śrīpadmapurāṇe pātālakhaṃḍe vaiśākhamāsamāhātmye ṣaḍaśītitamo'dhyāyaḥ