Padma Purana · Chapter 5.41

śeṣa uvāca
yuddhāya te susaṃnaddhāḥ śatrughnasya mahābalāḥ /
yayurvīramaṇeḥ sainyamadhye śauryasamanvitāḥ

śarānvimuṃcamānāste bhiṃdaṃtaḥ sainikānbahūn /
vyadṛśyaṃta raṇāṃtaḥsthāḥ śarāsanadharā narāḥ

aneke nihatāstatra gajā maṇimayā rathāḥ /
bhagnā vāhasametāśca dṛśyaṃte raṇamaṃḍale

vihitaṃ kadanaṃ teṣāṃ śrutvā rukmāṃgado balī /
rathe maṇimaye tiṣṭhanyayau yoddhuṃ sasainikān

śarāsane śarāndhāsyanniṣudhī akṣayau dadhat /
śoṇanetrāṃtaro bhīmo mahākopasamanvitaḥ

anekabāṇasaṃvignānkurvañchūrānsahasraśaḥ /
hāhākāraṃ kārayaṃstadyayau rukmāṃgado balī

rājaputraḥ svasadṛśaṃ balena yaśasā śriyā /
āhvayāmāsa śatrughnaṃ bhāratiṃ puṣkalaṃ balī

rukmāṃgada uvāca
āgaccha vīrakarmā tvaṃ mahābalaparākrama /
mayā yoddhuṃ tu balinā rājaputreṇa bhāsvatā

kimanyaistrāsitairvīra nihataiḥ koṭibhirnaraiḥ /
mayā samaṃ mahāyuddhaṃ vidhāya jayamāpnuhi

ityuktavaṃ taṃ tarasā prahasanpuṣkalo balī /
jaghāna vipule madhye vakṣasastīkṣṇaparvabhiḥ

tadamṛṣyanrājaputro mahācāpe dadhaccharān /
jaghāna daśabhirvīraṃ puṣkalaṃ vakṣasoṃ'tare

ubhau samarasaṃrabdhāvubhāvapi jayaiṣiṇau /
rejāte samare tau hi kumāratārakau yathā

bāṇāndhanuṣi saṃdhāya daśasaṃkhyānmahāśitān /
akarotpuṣkalo vīro virathaṃ rājaputrakam

caturbhiścaturovāhāndvābhyāṃ sūtamapātayat /
ekena dhvajametasya dvābhyāṃ syaṃdanarakṣakau

ekena hṛdi vivyādha rājaputrasya vegavān /
tadadbhutaṃ karma dṛṣṭvā sarve vīrāḥ pratoṣitāḥ

sacchinnadhanvā viratho hatāśvo hatasārathiḥ /
atyaṃtaṃ kopamāpannaḥ syaṃdanaṃ paramāviśat

sa sthitvā syaṃdanavare hayaratnena bhūṣite /
śarāsanaṃ mahaddhṛtvā sudṛḍhaṃ guṇapūritam

uvāca puṣkalaṃ vīraṃ rukmāṃgada idaṃ vacaḥ /
mahatparākramaṃ kṛtvā kva yāsyasi paraṃtapa

paśya me'dyaparākrāṃtiṃ yadbalena vinirmitām /
yatnāttiṣṭhasva bho vīra nayāmi tvadrathaṃ nabhaḥ

ityuktvā śaramatyugraṃ dadhāra svaśarāsane /
maṃtrayitvā tataścāstraṃ bhrāmakaṃ pauṣkale rathe

mumoca niśitaṃ bāṇaṃ svarṇapaṃkhaikaśobhitam /
tena bāṇena nīto'sya ratho yojanamātrakam

dhṛtaḥ kṛcchreṇa sūtena ratho babhrāma bhūtale /
kṛcchreṇa prāpya svasthānaṃ puṣkalaḥ paramāstravit

jagāda vacanaṃ taṃ vai bāṇaṃ bibhraccharāsane /
svargaṃ prāpnuhi vīrāgrya sarvadevaiśca sevitam

tvādṛśāḥ pṛthivīyogyā na bhavaṃti nṛpottama /
śatakratusabhāyogyāstadgaccha tvaṃ surālayam

ityuktvā sa mumocāstramākāśaprāpakaṃ mahat /
tena bāṇena saratho yayau khamanulomataḥ

sarvāṃllokānatikrāmanyayau sūryasya maṃḍalam /
tajjvālayā ratho dagdho hayasūtasamanvitaḥ

tatkarairdagdhabhūyiṣṭha kalevaraḥ suduḥkhitaḥ /
papāta caṃdracūḍaṃ sa dhṛtvā hṛdyasukhārdanam

bhūmau nipatitastatra karadagdhakalevaraḥ /
atyaṃtaṃ duḥkhamāpanno mumūrccha raṇamaṃḍale

tasminnipatite bhūmau mūrcchite rājaputrake /
hāhākāro mahānāsīttatra saṃgrāmamūrdhani

vairiṇo jayalakṣmīṃ te prāpuḥ puṣkalamukhyakāḥ /
palāyanaparā jātā vairiṇo hayarakṣakāḥ

tadā putrasya vai mūrcchāṃ dṛṣṭvā vīramaṇirnṛpaḥ /
prāyātsamaramadhyasthaṃ puṣkalaṃ kopapūritaḥ

tadā bhūmiścacāleyaṃ saparvatavanottamā /
śūrā vai harṣamāpannāḥ kātarā bhayapīḍitāḥ

cāpaṃ mahaddadhānaḥ sa iṣudhī akṣayāvapi /
roṣānniḥśvāsamāmuṃcannāhvayāmāsa vairiṇam

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe rukmāṃgadaparājaya puṣkalavijayonāma ekacatvāriṃśattamo'dhyāyaḥ