Padma Purana · Chapter 5.26

śeṣa uvāca/
śatrughnastadbalaṃ dṛṣṭvā bhīṣaṇākṛtimeghavat /
hastyaśvarathapādātairbahubhiḥ parivāritam

sumatiṃ pratyuvācedaṃ vacogaṃbhīraśabdayuk /
nānāvākyavicārajñaiḥ paṃḍitaiḥ parisevitaḥ

śatrughna uvāca/
sumate kasya nagaraṃ prāpto me hayasattamaḥ /
balametannirīkṣehaṃ payodadhitaraṃgavat

kasyaitadbalamuddharṣaṃ caturaṃgasamanvitam /
purato bhāti yuddhāya samupasthitamādarāt

etatsarvaṃ samācakṣva yathāvatpṛcchato mama /
yajjñātvā yuddhasaṃsthāyai nirdiśāmi svakānbhaṭān

iti vākyaṃ samākarṇya sumatiḥ śubhabuddhimān /
uvāca vacanaṃ prītaḥ śatrughnaṃ vairitāpanam

sumatiruvāca/
cakrāṃkā nagarī rājanvartate savidhe śubhā /
yasyāṃ saṃti narāḥ pāparahitā viṣṇubhaktitaḥ

tasyāḥ puryāḥ patirayaṃ subāhurdharmavittamaḥ /
tavāyaṃ purato bhāti putrapautrasamāvṛtaḥ

svadāranirato nityaṃ paradāraparāṅmukhaḥ /
viṣṇoḥ kathāsya karṇasthānā parārthaprakāśinī

parasvaṃ na samādatte ṣaṣṭhāṃśādadhikaṃ nṛpaḥ /
brāhmaṇā viṣṇubhaktyaiva pūjyaṃte tena dharmiṇā

nityaṃ sevārato viṣṇupādapadmamadhuvrataḥ /
eṣa svadharmanirataḥ paradharmaparāṅmukhaḥ

etasya balatulyaṃ hi na vīrāṇāṃ balaṃ kvacit /
putrasya patanaṃ śrutvā roṣaśokasamākulaḥ

caturaṃgasameto'yaṃ yuddhāya samupasthitaḥ /
tavāpi vīrā bahavo lakṣmīnidhimukhā amūn

jeṣyaṃti śastrasaṃghena nirdiśāśu paraṃ hi tān /
śatrughnastadvacaḥ śrutvā provāca svabhaṭānvarān

raṇaprāptibhavoddharṣapūrapūritamānasān /
krauṃcavyūho'dya racitaḥ subāhuparisainikaiḥ

mukhapakṣasthitā yodhāstānko bhetsyati śastravit /
yasya bhede nijā śaktiryo vīra vijayodyataḥ

sa gṛhṇātu madīyāddhi pāṇipadmācca vīṭakam /
tadā lakṣmīnidhirvīro jagrāha krauṃcabhedane

sarvaśastrāstravidvīrairbahubhiḥ parivāritaḥ /
uvāca vacanaṃ rājanyāsye'haṃ krauṃcabhedane

bhārgavaḥ pūrvamevāsītkrauṃcabhettā tathā hyaham /
tathānyaṃ vīramāvocatko'sya sārdhaṃ gamiṣyati

puṣkalaḥ pṛṣṭhatastasya yātuṃ cakre matiṃ tataḥ /
riputāpo nīlaratna ugrāśvo vīramardanaḥ

sarve śatrughnasaṃdeśādyayustatkrauṃcabhedane /
śatrughno'pi rathasthaśca sarvāyudhadharaḥ paraḥ

pṛṣṭhato'sya parīyāya bahubhiḥ sainikairvṛtaḥ /
tadā pracalitau dṛṣṭāvanyonyabalavāridhī

pralayaṃ kartumudyuktau jagataḥ sutaraṃgiṇau /
tadā bheryaḥ samājaghnurubhayoḥ senayordṛḍhāḥ

raṇabheryaḥ śaṃkhanādāḥ śrūyaṃte tatra tatra ha /
heṣaṃte vājinastatra garjaṃti dviradā bhṛśam

huṃ huṃ kurvaṃti vīrāgryā nadaṃti rathanemayaḥ /
tatra prakupitāḥ śūrāḥ subāhubaladarpitāḥ

chiṃdhi bhiṃdhīti bhāṣaṃto dṛśyaṃte bahavo raṇe /
evaṃbhūte raṇodyukte sainye śatrughnavairiṇoḥ

mukhasaṃsthaṃ suketuṃ taṃ lakṣmīnidhiruvāca ha /
lakṣmīnidhiruvāca/
janakasya sutaṃ viddhi lakṣmīnidhiriti smṛtam

sarvaśastrāstrakuśalaṃ sarvayuddhaviśāradam /
muṃcāśvaṃ rāmacaṃdrasya sarvadānavadaṃśituḥ

nocenmadbāṇanirbhinno yāsyase yamasādanam /
iti bruvaṃtaṃ vīrāgryaṃ suketuḥ sahasā tvaran

sajyaṃ cāpaṃ vidhāyāśu bāṇānmuṃcansthiro'bhavat /
te bāṇāḥ śitaparvāṇaḥ svarṇapuṃkhāḥ samaṃtataḥ

dṛśyaṃte vyāpinastatra raṇamadhye sudurbharāḥ /
tadbāṇajālaṃ tarasā nihatya /
lakṣmīnidhiścāpamathā tatajyam /
vidhāya tasyorasi bāṇaṣaṭkaṃ /
mumoca tīkṣṇaṃ śitaparvaśobhitam

tadbāṇāḥ subhujabhrāturhṛdayaṃ saṃvidārya ca /
gatāste bhuvi dṛśyaṃte rudhirāktā malīmasāḥ

tadbāṇabhinnahṛdayaḥ suketuḥ kopapūritaḥ /
jaghānaśaraviṃśatyā tīkṣṇayā nataparvayā

ubhau bāṇavibhinnāṃgāvubhau kṣatajaviplutau /
sainikaiḥ paridṛśyaṃte kiṃśukāviva puṣpitau

muṃcaṃtau bāṇakoṭīśca saṃdadhaṃtau tvarā śarān /
na kenāpi vilakṣyete laghuhastau mahābalau

kuṃḍalīkṛta saccāpau varṣaṃtau bāṇadhārayā /
navāṃbudāviva divi śakranirdeśakāriṇau

tayorbāṇā gajānvāhānnarāñchūrānvimastakān /
kurvaṃtaḥ kevalaṃ dṛṣṭā na ca saṃdhānamokṣayoḥ

pṛthivī subhaṭaiḥ pūrṇā sakirīṭaiḥ sakuṃḍalaiḥ /
dhanurbāṇakarai roṣasaṃdaṣṭādharayugmakaiḥ

tayoḥ prayuddhyatordarpātsarvaśastrāstravedinoḥ /
yuddhaṃ samabhavadghoraṃ devavismāpanaṃ mahat

saṃmardo'bhavadatyaṃtaṃ vīrakoṭividāraṇaḥ /
na kenacitkvaciddṛṣṭaṃ śarajālāṃtareṃ'baram

tasmiṃstu samaye lakṣmīnidhirvīro'rimardanaḥ /
bāṇāṃścāpe samādhatta vasusaṃkhyāndṛḍhāñchitān

caturbhisturagānvīraḥ suketoranayatkṣayam /
ekena dhvajamatyugraṃ ciccheda tarasā hasan

ekena sāratheḥ kāyācchirobhūmāvapātayat /
ekena cāpaṃ saguṇamacchinadroṣapūritaḥ

ekena hṛdi vivyādha suketorvegavānnṛpaḥ /
tatkarmādbhutamudvīkṣya vīrā vismayamāyayuḥ

sacchinnadhanvā viratho hatāśvo hatasārathiḥ /
mahatīṃ sa gadāṃ dhṛtvā yodghukāmo'bhyupeyivān

tamāyāṃtaṃ samālakṣya gadāyuddhaviśāradam /
mahatyā gadayā yuktaṃ rathādavatatāra saḥ

gadāmādāya mahatīṃ sarvāyasavinirmitām /
jātarūpavicitrāṃgīṃ sarvaśobhāpuraskṛtām

lakṣmīnidhirbhṛśaṃ kruddhaḥ suketorvakṣasi tvaran /
tāḍayāmāsa hṛdaye gadāṃ vajrāgnisannibhām

gadayā tāḍito vīro nākaṃpata mahāmune /
madonmatto yathā daṃtī bālena sragbhirāhataḥ

uvāca taṃ sa vīrāgryo nṛpaṃ lakṣmīnidhiṃ tadā /
sahasvaikaṃ prahāraṃ me yadi śūraḥ paraṃtapa

ityuktvā tāḍayāmāsa lalāṭe gadayā bhṛśam /
gadayā tāḍito bhāle'sṛgvamankupito bhṛśam

mūrdhni taṃ tāḍayāmāsa gadayā kālarūpayā /
suketurapi taṃ skaṃdhe tāḍayāmāsa dharmavit

evaṃ bhṛśaṃ prakupitau gadāyuddhaviśāradau /
gadāyuddhaṃ prakurvāṇau parasparajayaiṣiṇau

anyonyāghātavimatau parasparavadhodyatau /
na kopi tatra hīyeta na ko jīyeta saṃyuge

mūrdhni bhāle tathā skaṃdhe hṛdi gātreṣu sarvataḥ /
rudhiraugha pariklinnau mahābalaparākramau

tadā lakṣmīnidhiḥ kruddho gadāmudyamya vegavān /
jagāma prabalaṃ haṃtuṃ hṛdi rājānujaṃ balī

tamāyāṃtamathālokya svagadāṃ mahatīṃ dadhat /
yayau taṃ tarasā haṃtuṃ rājabhrātā balādbalam

gadāṃ tena vinikṣiptāṃ svakare dhṛtavānayam /
tayaiva gadayā tasya hṛdi jaghne mahābalaḥ

svagadāṃ tena vai nītāṃ dṛṣṭvā lakṣmīnidhirnṛpaḥ /
bāhuyuddhena taṃ yoddhumiyeṣa balavattamam

tadā rājānujaḥ kruddho bāhubhyāmupagṛhya tam /
yuyudhe sarvayuddhasya jñātāvīreṣu sattamaḥ

tadā lakṣmīnidhistasya hṛdi jaghne svamuṣṭinā /
tadā sopi śirasyenaṃ muṣṭimudyamya cāhanat

muṣṭibhirvajrasaṃkāśaistalasphoṭaiśca dāruṇaiḥ /
anyonyaṃ jaghnatuḥ kruddhau saṃdaṣṭādharapallavau

muṣṭī muṣṭi daṃtā daṃti kacā kaci nakhā nakhi /
ubhayorabhavadyuddhaṃ tumulaṃ romaharṣaṇam

tadā prakupito bhrātā nṛpateśca raṇe nṛpam /
gṛhītvā bhrāmayitvātha pātayāmāsa bhūtale

lakṣmīnidhiḥ kare gṛhya taṃ nṛpānujamuccakaiḥ /
bhrāmayitvā śataguṇaṃ gajopasthe jaghāna tam

sa tadā patito bhūmau saṃjñāṃ prāpya kṣaṇādanu /
tathaiva bhrāmayāmāsa vyomni vegena vikramī

evaṃ prayudhyamānau tau bāhuyuddhaṃ gatau punaḥ /
pāde pādaṃ kare pāṇiṃ hṛdi hṛdvadane mukham

evaṃ parasparaṃ śliṣṭau parasparavadhaiṣiṇau /
ubhāvapi parākrāṃtāvubhāvapi mumūrcchatuḥ

taddṛṣṭvā vismayaṃ prāptāḥ praśaśaṃsuḥ sahasraśaḥ /
dhanyo lakṣmīnidhirbhūpo dhanyo rājānujo balī

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe gadāyuddhaṃnāma ṣaḍviṃśatitamo'dhyāyaḥ