Padma Purana · Chapter 5.17

śeṣa uvāca/
śatrughnaścyavanasyātha dṛṣṭvā'ciṃtyaṃ tapobalam /
praśaśaṃsa tapo brāhmaṃ sarvalokaikavaṃditam

aho paśyata yogasya siddhiṃ brāhmaṇasattame /
yaḥ kṣaṇādeva duṣprāpaṃ tadvimānamacīkarat

kva bhogasiddhirmahatī munīnāmamalātmanām /
kva tapobalahīnānāṃ bhogecchā manujātmanām

iti svagatamāśaṃsañchatrughnaścyavanāśrame /
kṣaṇaṃ sthitvā jalaṃ pītvā sukhasaṃbhogamāptavān

hayastasyāḥ payoṣṇyākhyā nadyāḥ puṇyajalātmanaḥ /
payaḥ pītvā yayau mārge vāyuvegagatirmahān

yodhāstannirgamaṃ dṛṣṭvā pṛṣṭhato'nuyayustadā /
hastibhiḥ pattibhiḥ kecidrathaiḥ kecana vājibhiḥ

śatrughno'mātyavaryeṇa sumatyākhyena saṃyutaḥ /
pṛṣṭhato'nujagāmāśu rathena hayaśobhinā

gacchanvājīpuraṃ prāpto vimalākhyasya bhūpateḥ /
ratnātaṭākhyaṃ ca janairhṛṣṭapuṣṭaiḥ samākulam

sa sevakādupaśrutya raghunātha hayottamam /
puroṃtike hi saṃprāptaṃ sarvayodhasamanvitam

tadā gajānāṃ saptatyā caṃdravarṇasamānayā /
aśvānāmayutaiḥ sārdhaṃ rathānāṃ kāṃcanatviṣām

sahasreṇa ca saṃyuktaḥ śatrughnaṃ prati jagmivān /
śatrughnaṃ sa namaskṛtya sarvānprāptānmahārathān

vasukośaṃ dhanaṃ sarvaṃ rājyaṃ tasmai nivedya ca /
kiṃ karomīti rājā taṃ jagāda purataḥ sthitaḥ

rājāpi taṃ svīyapade praṇamraṃ /
dorbhyāṃ dṛḍhaṃ saṃpariṣasvaje mahān /
jagāma sākaṃ tanaye svarājyaṃ /
nikṣipya sarvaṃ bahudhanvibhirvṛtaḥ

rāmacaṃdrābhidhāṃ śrutvā sarvaśrutimanoharām /
sarve praṇamya taṃ vāhaṃ dadurvasumahādhanam

rājānaṃ pūjayitvā tu śatrughnaḥ parayā mudā /
senayā sahito'gacchadvājinaḥ pṛṣṭhatastadā

evaṃ sa gacchaṃstanmārge parvatāgryaṃ dadarśa ha /
sphāṭikaiḥ kānakai raupyai rājitaṃ prastharājibhiḥ

jalanirjharasaṃhrādaṃ nānādhātukabhūtalam /
gairikādikasaddhātu lākṣāraṃgavirājitam

yatra siddhāṃganāḥ siddhaiḥ saṃkrīḍaṃtyakutobhayāḥ /
gaṃdharvāpsaraso nāgā yatra krīḍaṃti līlayā

gaṃgātaraṃgasaṃsparśa śītavāyuniṣevitam /
vīṇāraṇaddhaṃsaśukakvaṇasuṃdaraśobhitam

parvataṃ vīkṣya śatrughna uvāca sumatiṃ tvidam /
taddarśanasamudbhūta vismayāviṣṭamānasaḥ

ko'yaṃ mahāgirivaro vismāpayati me manaḥ /
mahārajatasatprastho mārge rājati me'dbhutaḥ

atra kiṃ devatāvāso devānāṃ krīḍanasthalam /
yadetanmanasaḥ kṣobhaṃ karoti śrīsamuccayaiḥ

iti vākyaṃ samākarṇya jagāda sumatistadā /
vakṣyamāṇaguṇāgāra rāmacaṃdra padābjadhīḥ

nīlo'yaṃ parvato rājanpurato bhāti bhūmipa /
manoharairmahāśṛṅgaiḥ sphāṭikāgraiḥ samaṃtataḥ

enaṃ paśyaṃti no pāpāḥ paradāraratā narāḥ /
viṣṇorguṇagaṇānye vai na manyaṃte narādhamāḥ

śrutismṛtisamutthaṃ ye dharmaṃ sadbhiḥ susādhitam /
na manyaṃte svabuddhistha hetuvādavicāraṇāḥ

nīlīvikrayakartāro lākṣāvikrayakārakāḥ /
yo brāhmaṇo ghṛtādīni vikrīṇāti surāpakaḥ

kanyāṃ rūpeṇa saṃpannāṃ na dadyātkulaśīline /
vikrīṇāti dravyalobhātpitā pāpena mohitaḥ

patnīṃ dūṣayate yastu kulaśīlavatīṃ naraḥ /
svayamevātti madhuraṃ baṃdhubhyo na dadāti yaḥ

bhojane brāhmaṇārthe ca pākabhedaṃ karoti yaḥ /
kṛsaraṃ pāyasaṃ vāpi nārthinaṃ dāpayetkudhīḥ

atithīnavamanyaṃte sūryatāpāditāpitān /
aṃtarikṣabhujo ye ca ye ca viśvāsaghātakāḥ

na paśyaṃti mahārāja raghunātha parāṅmukhāḥ /
asau puṇyo girivaraḥ puruṣottama śobhitaḥ

pavitrayati sarvānno darśanena manoharaḥ /
atra tiṣṭhati devānāṃ mukuṭairarcitāṃghrikaḥ

puṇyavadbhirdarśanārhaḥ puṇyadaḥ puruṣottamaḥ /
śrutayo netinetīti bruvāṇā na vidaṃti yam

yatpādaraja iṃdrādidevairmṛgyaṃ sudurllabham /
vedāṃtādibhiranyūnairvākyairvidaṃti yaṃ budhāḥ

so'tra śrīmānnīlaśaile vasate puruṣottamaḥ /
āruhya taṃ namaskṛtya saṃpūjya sukṛtādinā

naivedyaṃ bhakṣayitvā vai bhūpa bhūyāccaturbhujaḥ /
atrāpyudāharaṃtīmamitihāsaṃ purātanam

taṃ śṛṇuṣva mahārāja sarvāścaryasamanvitam /
ratnagrīvasya nṛpateryadvṛttaṃ sakuṭuṃbinaḥ

caturbhujādikaṃ prāptaṃ devadānavadurlabham /
āsītkāṃcī mahārāja purī lokeṣu viśrutā

mahājanaparīvārasamṛddhabalavāhanā /
yasyāṃ vasaṃti viprāgryāḥ ṣaṭkarmaniratā bhṛśam

sarvabhūtahite yuktā rāmabhaktiṣu lālasāḥ /
kṣatriyā raṇakartāraḥ saṃgrāme'pyapalāyinaḥ

paradāra paradravya paradrohaparāṅmukhāḥ /
vaiśyāḥ kusīdakṛṣyādivāṇijyaśubhavṛttayaḥ

kurvanti raghunāthasya padāmbhoje ratiṃ sadā /
śūdrā brāhmaṇasevābhirgatarātridināntarāḥ

kurvaṃti kathanaṃ rāmarāmeti rasanāgrataḥ /
prākṛtāḥ ke'pi no pāpaṃ kurvaṃti manasātra vai

dānaṃ dayā damaḥ satyaṃ tatra tiṣṭhaṃti nityaśaḥ /
vadate na parābādhaṃ vākyaṃ ko'pi naro'naghaḥ

na pārakye dhane lobhaṃ kurvaṃti na hi pātakam /
evaṃ prajā mahārāja ratnagrīveṇa pālyate

ṣaṣṭhāṃśaṃ tatra gṛhṇāti nānyaṃ lobhavivarjitaḥ /
evaṃ pālayamānasya prajādharmeṇa bhūpateḥ

gatāni bahuvarṣāṇi sarvabhogavilāsinaḥ /
viśālākṣīṃ mahārāja ekadā hyūcivānidam

pativratāṃ dharmapatnīṃ pativrataparāyaṇām /
putrā jātā viśālākṣi prajārakṣā dhuraṃdharāḥ

parīvāro mahānmahyaṃ vartate vigatajvaraḥ /
hastino mama śailābhā vājinaḥ pavanopamāḥ

rathāśca suhayairyuktā vartaṃte mama nityaśaḥ /
mahāviṣṇuprasādena kiṃcinnyūnaṃ mamāsti na

evaṃ manorathastvekastiṣṭhate mānase mama /
paraṃ tīrthaṃ mayā nādya kṛtaṃ paramaśobhane

garbhavāsavirāmāya kṣamaṃ goviṃdaśobhitam /
vṛddho jāto'smyahaṃ tāvadvalīpalitadehavān

kariṣyāmi manohāri tīrthasevanamādṛtaḥ /
yo naro janmaparyaṃtaṃ svodarasya prapūrakaḥ

na karoti hareḥ pūjāṃ sa naro govṛṣaḥ smṛtaḥ /
tasmādgacchāmi bho bhadre tīrthayātrāṃ prati priye

sakuṭuṃbaḥ sute nyasya dhuraṃ rājyasya nirbhṛtām /
iti vyavasya saṃdhyāyāṃ hariṃ dhyāyanniśāṃtare

adrākṣītsvapnamapyekaṃ brāhmaṇaṃ tāpasaṃ varam /
prātarutthāya rājāsau kṛtvā saṃdhyādikāḥ kriyāḥ

sabhāṃ maṃtrijanaiḥ sārddhaṃ sukhamāsedivānmahān /
tāvadvipraṃ dadarśātha tāpasaṃ kṛśadehinam

jaṭāvalkalakaupīnadhāriṇaṃ daṃḍapāṇinam /
anekatīrthasevābhiḥ kṛtapuṇyakalevaram

rājā taṃ vīkṣya śirasā praṇanāma mahābhujaḥ /
arghyapādyādikaṃ cakre prahṛṣṭātmā mahīpatiḥ

sukhopaviṣṭaṃ viśrāṃtaṃ papraccha viditaṃ dvijam /
svāmiṃstvaddarśanānme'dya gataṃ dehasya pātakam

mahāṃtaḥ kṛpaṇānpātuṃ yāṃti tadgehamādarāt /
tasmātkathaya bho vipra vṛddhasya mama saṃprati

ko devo garbhanāśāya kiṃ tīrthaṃ ca kṣamaṃ bhavet /
yūyaṃ sarvagatāḥ śreṣṭhāḥ samādhidhyānatatparāḥ

sarvatīrthāvagāhena kṛtapuṇyātmano'malāḥ /
yathāvacchṛṇvate mahyaṃ śraddadhānāya vistarāt

kathayasva prasādena sarvatīrthavicakṣaṇa /
brāhmaṇa uvāca/
śṛṇu rājeṃdra vakṣyāmi yatpṛṣṭaṃ tīrthasevanam

kasya devasya kṛpayā garbhanirvāraṇaṃ bhavet /
sevyaḥ śrīrāmacaṃdro'sau saṃsārajvaranāśakaḥ

pūjyaḥ sa eva bhagavānpuruṣottamasaṃjñakaḥ /
nānā puryo mayā dṛṣṭāḥ sarvapāpakṣayaṃkarāḥ

ayodhyā sarayūstāpī tathā dvāraṃ hareḥ param /
avaṃtī vimalā kāṃcī revā sāgaragāminī

gokarṇaṃ hāṭakākhyaṃ ca hatyākoṭivināśanam /
mallikākhyo mahāśailo mokṣadaḥ paśyatāṃ nṛṇām

yatrāṃgeṣu nṛṇāṃ toyaṃ śyāmaṃ vā nirmalaṃ bhavet /
pātakasyāpahārīdaṃ mayā dṛṣṭaṃ tu tīrthakam

mayā dvāravatī dṛṣṭā surāsura niṣevitā /
gomatī yatra vahati sākṣādbrahmajalā śubhā

yatra svāpo layaḥ prokto mṛtirmokṣa iti śrutiḥ /
yasyāṃ saṃvasatāṃ nṝṇāṃ na kali prabhavetkvacit

cakrāṃkā yatra pāṣāṇā mānavā api cakriṇaḥ /
paśavaḥ kīṭapakṣyādyāḥ sarve cakraśarīriṇaḥ

trivikramo vasedyasyāṃ sarvalokaikapālakaḥ /
sā purī tu mahāpuṇyairmayā dṛggocarīkṛtā

kurukṣetraṃ mayā dṛṣṭaṃ sarvahatyāpanodanam /
syamaṃtapaṃcakaṃ yatra mahāpātakanāśanam

vārāṇasī mayā dṛṣṭā viśvanāthakṛtālayā /
yatropadiśate maṃtraṃ tārakaṃ brahmasaṃjñitam

yasyāṃ mṛtāḥ kīṭapataṃgabhṛṃgāḥ
paśvādayo vā surayonayo vā /
svakarmasaṃbhogasukhaṃ vihāya
gacchaṃti kailāsamatītaduḥkhāḥ

maṇikarṇiryatra tīrthaṃ yasyāmuttaravāhinī /
karoti saṃsṛterbaṃdhacchedaṃ pāpakṛtāmapi

kapardinaḥ kuṃḍalinaḥ sarpabhūṣādharāvarāḥ /
gajacarmaparīdhānā vasaṃti gataduḥkhakāḥ

kālabhairavanāmātra karoti yamaśāsanam /
na karoti nṛṇāṃ vārtāṃ yamo daṃḍadharaḥ prabhuḥ

etādṛśī mayā dṛṣṭā kāśī viśveśvarāṃkitā /
anekānyapi tīrthāni mayā dṛṣṭāni bhūmipa

paramekaṃ mahaccitraṃ yaddṛṣṭaṃ nīlaparvate /
puruṣottamasānnidhye tanna kvāpyakṣigocaram

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe brāhmaṇasamāgamonāmasaptadaśo'dhyāyaḥ