Padma Purana · Chapter 5.18

brāhmaṇa uvāca/
rājaṃstvaṃ śṛṇu yadvṛttaṃ nīle parvatasattame /
yacchraddadhānāḥ puruṣā yāṃti brahma sanātanam

mayā paryaṭatā tatra gataṃ nīlābhidhe girau /
gaṃgāsāgaratoyena kṣālitaprāṃgaṇe muhuḥ

tatra bhillā mayā dṛṣṭāḥ parvatāgre dhanurbhṛtaḥ /
caturbhujā mūlaphalairbhakṣyairnirvāhitaklamāḥ

tadā me manasi kṣipraṃ saṃśayaḥ sumahānabhūt /
caturbhujāḥ kimete vai dhanurbāṇadharā narāḥ

vaikuṃṭhavāsināṃ rūpaṃ dṛśyate vijitātmanām /
kathametairupālabdhaṃ brahmādyairapi durllabham

śaṃkhacakragadāśārṅgapadmollasitapāṇayaḥ /
vanamālāparītāṃgā viṣṇubhaktā ivāṃtike

saṃśayāviṣṭacittena mayā pṛṣṭaṃ tadā nṛpa /
yūyaṃ ke bata yuṣmābhirlabdhaṃ cāturbhujaṃ katham

tadā tairbahu hāsyaṃ tu kṛtvā māṃ pratibhāṣitam /
brāhmaṇo'yaṃ na jānāti piṃḍamāhātmyamadbhutam

iti śrutvā'vadaṃ cāhaṃ kaḥ piṃḍaḥ kasya dīyate /
tanmama brūta dharmiṣṭhāścaturbhujaśarīriṇaḥ

tadā madvākyamākarṇya kathitaṃ tairmahātmabhiḥ /
sarvaṃ tatra tu yadvṛttaṃ caturbhujabhavādikam

kirātā ūcuḥ/
śṛṇu brāhmaṇa vṛttāṃtamasmākaṃ pṛthukaḥ śiśuḥ /
nityaṃ jaṃbūphalādīni bhakṣayankrīḍayā caran

ekadā ramamāṇastu giriśṛṃgaṃ manoramam /
samāruroha śiśubhiḥ samaṃtātparivāritaḥ

tadā tatra dadarśāhaṃ devāyatanamadbhutam /
gārutmatādimaṇibhiḥ khacitaṃ svarṇabhittikam

svakāṃtyātimiraśreṇīṃ dārayadravivadbhṛśam /
dṛṣṭvā vismayamāpede kimidaṃ kasya vai gṛham

gatvā vilokayāmīti kimidaṃ mahatāṃ padam /
iti saṃciṃtya gehāṃtarjagāma bahubhāgyataḥ

dadarśa tatra deveśaṃ surāsuranamaskṛtam /
kirīṭahārakeyūragraiveyādyairvirājitam

manoharāvataṃsau ca dhārayaṃtaṃ sunirmalau /
pādapadme tulasikā gaṃdhamattaṣaḍaṃghrike

śaṃkhacakragadāśārṅga padmādyairmūrtisaṃyutaiḥ /
upāsitāṃghriṃ śrīmūrtiṃ nāradādyaiḥ susevitam

kecidgāyaṃti nṛtyaṃti hasaṃti paramādbhutam /
prīṇayaṃti mahārājaṃ sarvalokaikavaṃditam

hariṃ vīkṣya madīyorbhastatra saṃjagmivānmune /
devāstatra vidhāyoccaiḥ pūjāṃ dhūpādisaṃyatām

naivedyaṃ śrīpriyasyārthe kṛtvā nīrājanaṃ tataḥ /
jagmuḥ svaṃ svaṃ gṛhaṃ rājankṛpāṃ paśyaṃta ādarāt

mahābhāgyavaśāttena prāptaṃ naivedyasikthakam /
patitaṃ brahmadevādyairdurllabhaṃ suramānuṣaiḥ

tadbhakṣaṇaṃ ca kṛtvātho śrīmūrtimavalokya ca /
caturbhujatvamāptaṃ vai pṛthukena suśobhinā

tadāsmābhirgṛhaṃ prāpto bālako vīkṣito muhuḥ /
caturbhujatvaṃ saṃprāptaḥ śaṃkhacakrādidhārakaḥ

asmābhiḥ pṛṣṭametasya kimetajjātamadbhutam /
tadā provāca naḥ sarvānbālakaḥ paramādbhutam

śikharāgre gataḥ pūrvaṃ tatra dṛṣṭaḥ sureśvaraḥ /
tatra naivedyasikthaṃ tu mayā prāptaṃ manoharam

tasya bhakṣaṇamātreṇa kāraṇena tu sāṃpratam /
caturbhujatvaṃ saṃprāpto vismayena samanvitaḥ

tacchrutvā tu vacastasya sadyaḥ saṃprāptavismayaiḥ /
asmābhirapyasau dṛṣṭo devaḥ paramadurllabhaḥ

annādikaṃ tatra bhuktaṃ sarvasvādasamanvitam /
vayaṃ caturbhujā jātā devasya kṛpayā punaḥ /
gatvā tvamapi devasya darśanaṃ kuru sattama

bhuktvā tatrānnasikthaṃ tu bhava vipra caturbhujaḥ /
tvayā pṛṣṭaṃ yadāścaryaṃ taduktaṃ vāḍavarṣabha

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe brāhmaṇopadeśonāmāṣṭādaśo'dhyāyaḥ