Padma Purana · Chapter 5.16

sumatiruvāca/
evaṃ tayā krīḍamānaḥ sarvatra dharaṇītale /
nābudhyata gatānabdāñchatasaṃkhyā parīmitān

tato jñātvāthava tadvipraḥ svakālaparivartinīm /
manorathaiśca saṃpūrṇāṃ svasyapriyatamāṃ varām

nyavartatāśramaṃ śreṣṭhaṃ payoṣṇītīrasaṃsthitam /
nirvairajaṃ tu janatāsaṃkulaṃ mṛgasevitam

tatrāvasatsa sutapāḥ śiṣyairvedasamanvitaiḥ /
sevitāṃghriyugo nityaṃ tatāpa paramaṃ tapaḥ

kadācidatha śaryātiryaṣṭumaicchata devatāḥ /
tadā cyavanamānetuṃ preṣayāmāsa sevakān

tairāhūto dvijavarastatrāgacchanmahātapāḥ /
sukanyayā dharmapatnyā svācāra pariniṣṭhayā

āgataṃ taṃ munivaraṃ patnyā putryā mahāyaśāḥ /
dadarśa duhituḥ pārśve puruṣaṃ sūryavarcasam

rājā duhitaraṃ prāha kṛtapādābhivaṃdanām /
āśiṣo na prayuṃjāno nātiprītamanā iva

cikīrṣitaṃ te kimidaṃ patistvayā /
pralaṃbhito lokanamaskṛto muniḥ /
tvayā jarāgrastamasaṃmataṃ patiṃ /
vihāya jāraṃ bhajase'mumadhvagam

kathaṃ matiste'vagatānyathāsatāṃ kulaprasūteḥ kuladūṣaṇaṃ tvidam /
bibharṣi jāraṃ yadapatrapākulaṃ pituḥ svabhartuśca nayasyadhastamām

evaṃ bruvāṇaṃ pitaraṃ smayamānā śucismitā /
uvāca tāta jāmātā tavaiṣa bhṛgunaṃdanaḥ

śaśaṃsa pitre tatsarvaṃ vayorūpābhilaṃbhanam /
vismitaḥ paramaprītastanayāṃ pariṣasvaje

somenāyājayadvīraṃ grahaṃ somasya cāgrahīt /
asomaporapyaśvinoścyavanaḥ svena tejasā

grahaṃ tu grāhayāmāsa tapobalasamanvitaḥ /
vajraṃ gṛhītvā śakrastu haṃtuṃ brāhmaṇasattamam

apaṃktipāvanau devau kurvāṇaṃ paṃktigocarau /
śakraṃ vajradharaṃ dṛṣṭvā muniḥ svahananodyatam

huṃkāramakaroddhīmānstaṃbhayāmāsa tadbhujam /
iṃdraḥ stabdhabhujastatra dṛṣṭaḥ sarvaiśca mānavaiḥ

kopena śvasamāno'hiryathā maṃtraniyaṃtritaḥ /
tuṣṭāva sa muniṃ śakraḥ stabdhabāhustaponidhim

aśvibhyāṃ bhāgadānaṃ ca kurvaṃtaṃ nirbhayāṃtaram /
kathayāmāsa bhoḥ svāmindīyatāmaśvinorbali

mayā na vāryate tāta kṣamasvāghaṃ mahatkṛtam /
ityuktaḥ sa muniḥ kopaṃ jahau tūrṇaṃ kṛpānidhiḥ

iṃdro muktabhujo'pyāsīttadānīṃ puruṣarṣabha /
etadvīkṣya janāḥ sarve kautukāviṣṭamānasāḥ

śaśaṃsurbrāhmaṇabalaṃ te tu devādidurllabham /
tato rājā bahudhanaṃ brāhmaṇebhyo'dadanmahān

cakre cāvabhṛthasnānaṃ yāgāṃte śatrutāpanaḥ /
tvayā pṛṣṭaṃ yadācakṣva cyavanasya mahodayam

sa mayā kathitaḥ sarvastapoyogasamanvitaḥ /
namaskṛtvā tapomūrtimimaṃ prāpya jayāśiṣaḥ

preṣaya tvaṃ sapatnīkaṃ rāmayajñe manorame /
śeṣa uvāca/
evaṃ tu kurvatorvārtāṃ hayaḥ prāpāśramaṃ prati

vidadhadvāyuvegena pṛthvīṃ khuravilakṣitām /
dūrvāṃkurānmukhāgreṇa caraṃstatra mahāśrame

munayo yāvadādāya darbhānsnātuṃ gatā nadīm /
śatrughnaḥ śatrusenāyāstāpanaḥ śūrasaṃmataḥ

tāvatprāpa munervāsaṃ cyavanasyātiśobhitam /
gatvā tadāśrame vīro dadarśa cyavanaṃ munim

sukanyāyāḥ samīpasthaṃ tapomūrtimivasthitam /
vavaṃde caraṇau tasya svābhidhāṃ samudāharan

śatrughnohaṃ raghupaterbhrātā vāhasya pālakaḥ

namaskaromi yuṣmabhyaṃ mahāpāpopaśāṃtaye /
iti vākyaṃ samākarṇya jagāda munisattamaḥ

śatrughna tava kalyāṇaṃ bhūyānnaravararṣabha /
yajñaṃ pālayamānasya kīrtiste vipulā bhavet

citraṃ paśyata bho viprā rāmo'pi makhakārakaḥ /
yannāmasmaraṇādīni kurvaṃti pāpanāśanam

mahāpātakasaṃyuktāḥ paradāraratā narāḥ /
yannāmasmaraṇodyuktā muktā yāṃti parāṃ gatim

pādapadmasamutthena reṇunā grāvamūrtibhṛt /
tatkṣaṇādgautamārdhāṃgī jātā mohanarūpadhṛk

māmakīyasya rūpasya dhyānena premanirbharā /
sarvapātakarāśiṃ sā dagdhvā prāptā surūpatām

daityā yasya manohārirūpaṃ pradhanamaṇḍale /
paśyaṃtaḥ prāpuretasya rūpaṃ vikṛtivarjitam

yogino dhyānaniṣṭhā ye yaṃ dhyātvā yogamāsthitāḥ /
saṃsārabhayanirmuktāḥ prayātāḥ paramaṃ padam

dhanyo'hamadya rāmasya mukhaṃ drakṣyāmi śobhanam /
payojadalanetrāṃtaṃ sunasaṃ subhrusūnnatam

sā jihvā raghunāthasya nāmakīrtanamādarāt /
karoti viparītā yā phaṇino rasanā samā

adya prāptaṃ tapaḥpuṇyamadya pūrṇā manorathāḥ /
yaddrakṣye rāmacaṃdrasya mukhaṃ brahmādidurllabham

tatpādareṇunā svāṃgaṃ pavitraṃ vidadhāmyaham /
vicitrataravārtābhiḥ pāvaye rasanāṃ svakām

ityādi rāmacaraṇasmaraṇaprabuddha-
premavrajaprasṛtagadgadavāgudaśruḥ /
śrīrāmacaṃdra raghupuṃgavadharmamūrte
bhaktānukaṃpakasamuddhara saṃsṛtermām

jalpannaśrukalāpūrṇo munīnāṃ puratastadā /
nājñāsīttatra pārakyaṃ nijaṃ dhyānena saṃsthitaḥ

śatrughnastaṃ muniṃ prāha svāminno makhasattamaḥ /
kriyatāṃ bhavatā pādarajasā supavitritaḥ

mahadbhāgyaṃ raghupateryadyuṣmanmānasāṃtare /
tiṣṭhatyasau mahābāhuḥ sarvalokasupūjitaḥ

ityuktaḥ saparīvāraḥ sarvāgniparisaṃvṛtaḥ /
jagāma cyavanastatra pramodahradasaṃplutaḥ

hanūmāṃstaṃ padāyāṃtaṃ rāmabhaktamavekṣya ha /
śatrughnaṃ nijagādāsau vaco vinayasaṃyutaḥ

svāminkathayasi tvaṃ cenmahāpuruṣasuṃdaram /
rāmabhaktaṃ munivaraṃ nayāmi svapurīmaham

iti śrutvā mahadvākyaṃ kapivīrasya śatruhā /
ādideśa hanūmaṃtaṃ gaccha prāpayataṃ munim

hanūmāṃstaṃ muniṃ svīye pṛṣṭha āropya vegavān /
sakuṭuṃbaṃ nināyāśu vāyuḥ kha iva sarvagaḥ

āgataṃ taṃ muniṃ dṛṣṭvā rāmo matimatāṃ varaḥ /
arghyapādyādikaṃ cakre prītaḥ praṇayavihvalaḥ

dhanyo'smi munivaryasya darśanena tavādhunā /
pavitrito makho mahyaṃ sarvasaṃbhārasaṃbhṛtaḥ

iti vākyaṃ samākarṇya cyavano munisattamaḥ /
uvāca premanirbhinna pulakāṃgo'tinirvṛtaḥ

svāminbrahmaṇyadevasya tava vāḍavapūjanam /
yuktameva mahārāja dharmamārgaṃ prarakṣituḥ

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe cyavanāśrame hayagamanonāma ṣoḍaśo'dhyāyaḥ