Padma Purana · Chapter 4.23

śaunaka uvāca/
kathayasva mune sūta māhātmyaṃ kaluṣakṣayam /
śeṣapaṃcadinasyāpi kārttikasyānukaṃpayā

sūta uvāca/
śṛṇu śaunaka yatpṛṣṭaṃ māhātmyaṃ pāpanāśanam /
vakṣyāmyahaṃ vai corjasya śeṣapaṃcadinasya ca

vratānāṃ muniśārdūla pravaraṃ viṣṇupaṃcakam /
tasminyaḥ pūjayedbhaktyā śrīhariṃ rādhayā saha

gaṃdhapuṣpairdhūpadīpairvastrairnānāvidhaiḥ phalaiḥ /
sa yāti viṣṇusadanaṃ sarvapāpavivarjitaḥ

brahmacārī gṛhastho vā vānaprastho'thavā yatiḥ /
na prāpnoti paraṃ sthānamakṛtvā viṣṇupaṃcakam

sarvapāpaharaṃ puṇyaṃ vikhyātaṃ viṣṇupaṃcakam /
tatra snānaṃ tu yaḥ kuryātsarvatīrthaphalaṃ labhet

śrīhareḥ purato vipra tulasyāśca samīpataḥ /
pradīpaṃ sarpiṣā pūrṇaṃ dadyādyo bhaktibhāvataḥ

nabhasi śrīhareḥ prītyai yāti sa viṣṇumaṃdiram /
pāpī yāti harerdhāma satyametanmayoditam

snāpayeccācyutaṃ bhaktyā madhukṣīraghṛtādibhiḥ /
dadyātkiṃ no hariḥ prītastasmai sādhujanāya vai

naivedyaṃ devadeveśaṃ paramānnaṃ nivedayet /
tasya puṇyaṃ prasaṃkhyātuṃ na śakto vai caturmukhaḥ

arcayitvā hṛṣīkeśamekādaśyāṃ samāhitaḥ /
niṣprāpya gomayaṃ samyakmaṃtravatsamupāsate

gomūtraṃ maṃtravadbhūyo dvādaśyāṃ prāśayedvratī /
kṣīraṃ tathā trayodaśyāṃ caturdaśyāṃ tathā dadhi

saṃprāpya pāpaśuddhyarthaṃ laṃghayitvā caturdinam /
paṃcame tu dine snātvā vidhivatpūjya keśavam

bhojayedbrāhmaṇānbhaktyā tebhyo dadyācca dakṣiṇām /
tato naktaṃ samaśnīyātpaṃcagavyaṃ sumaṃtritam

evaṃ kartumaśakto yaḥ phalamūlaṃ ca bhojanam /
kuryāddhaviṣyaṃ vā vipra yathoktavidhinā ha vai

śrīhareḥ paṃcakaṃ vipra kuryādyastulasīdalaiḥ /
pūjayettaṃ sa vijñeyaḥ svayaṃ nārāyaṇaḥ prabhuḥ

purā tretāyuge śūdro dasyuvṛttiparāyaṇaḥ /
nāmnā daṃḍakaro nityaṃ dharmaniṃdāṃ karoti yaḥ

asatyabhāṣī mitraghno veśyāvibhrama lolupaḥ /
brahmasvahārī krūraśca parastrīgamane rataḥ

śaraṇāgatahaṃtā ca pākhaṃḍajanasaṃgabhāk /
gomāṃsāśī surāpaśca paraniṃdākaraḥ sadā

viśvāsaghātī jñātīnāṃ vṛtticchedī dvijottama /
duṣṭaṃ sarve samālokya tādṛśaṃ tadgṛhe dvijaḥ

āgatā jñātayaḥ kruddhāstasya pāpaparāyaṇam /
jñātaya ūcuḥ/
re re mūḍha durācāra vināśaṃ pratinīyate /
yā pratiṣṭhārjitā pūrvairasmākaṃ nirmale'nvaye

iti kruddhā dvijaśreṣṭha apakīrtibhayādapi /
pāpināṃ pravaraṃ sarve tatyajustaṃ kulādaram

tato gato mahāraṇyaṃ vinaṣṭākhila vaibhavaḥ /
kuryātsa dasyubhiḥ sārddhaṃ dasyukarma niraṃtaram

pathi pragacchatāṃ teṣāṃ bhayādvipra na khāditum /
prāptaṃ kiṃcitkṣudhārttāste gatāścānya sthalaṃ prati

tatra praviṣṭāste sarve dṛṣṭvā puṇyajanānbahūn /
dhātrīmūle sthitānbrahmanvaiṣṇavāndvijasattamān

sarve te dasyavo vipra gatā daṃḍakaro'pi saḥ /
teṣāṃ parisaraṃ gatvā praṇāmaṃ vai cakāra ha

daṃḍakara uvāca/
kṣudhārto'haṃ dvijaśreṣṭhāḥ prāṇā yāsyaṃti me dhruvam /
dadadhvaṃ khādituṃ kiṃcidyuṣmākaṃ śaraṇaṃ gataḥ

ākarṇya vacanaṃ tasya cocuste dharmatatparāḥ /
sarvapāpahare tvaṃ ca vikhyāte viṣṇupaṃcake

kathamannaṃ khādituṃ te vāṃchā tvadya harerdine /
viśeṣaṃ te brūhi saṃjñā kāte bhavati sāṃpratam

sa uvāca mudā viprā nāmnā daṃḍakaropyaham /
sarvapāpasamāyuktaścoddhāro me kathaṃ bhavet

ūcuste vai vrataṃ śreṣṭhaṃ kuruṣva viṣṇupaṃcakam /
viprāṇāmājñayā vipra cakāra viṣṇupaṃcakam

sa pretya ca hareḥ sthānamāruhya syaṃdane vare /
āsādya śrīharerūpaṃ tasthau janmavivarjitaḥ

ya idaṃ śṛṇuyādbhaktyā cākhyānaṃ pāpanāśanam /
koṭijanmārjitaṃ pāpaṃ tasya naśyati tatkṣaṇāt

iti śrīpādmemahāpurāṇe brahmakhaṇḍe sūtaśaunakasaṃvāde viṣṇupaṃcakamāhātmyaṃnāma trayoviṃśo'dhyāyaḥ