Padma Purana · Chapter 4.24

śaunaka uvāca/
viduṣāṃvara tattvajña kathayasva mahāmate /
idānīṃ mama dānānāṃ māhātmyaṃ kramato mune

sūta uvāca/
kṣitidānaṃ muniśreṣṭha dānānāmuttamaṃ matam /
yena kṛtaṃ vai taddānaṃ sarvadānaphalaṃ matam

kṣitiṃ sasasyāṃ yo dadyādbrāhmaṇāya dvijottama /
viṣṇuloke sukhaṃ bhuṃkte yāvadiṃdrāścaturdaśa

pṛthivyāṃ janma cāsādya sārvabhaumastato nṛpaḥ /
mahīṃ sarvāṃ ciraṃ bhuktvā vrajedvai śrīharergṛham

gocarmamātrāṃ bhūmiṃ yaḥ prayacchati dvijātaye /
sa gacchati harergehaṃ sarvapāpavivarjitaḥ

śataṃ gāvo vṛṣaścaiko yatra tiṣṭhaṃtyayaṃtritāḥ /
gocarmamātrāṃ tāṃ bhūmiṃ pravadaṃti maharṣayaḥ

bhūminetā bhūmidātā dvau cāpi svargagāminau /
grāhyā bhūmirdvijaiḥ prājñaistyaktvā dānaśatānyapi

ajñānī bhūsuro yastu tyajedbhūmiṃ vimohitaḥ /
pratijanmanyasau vipro bhaveccātyaṃta duḥkhabhāk

anyato yaḥ samāsādya dadyādbhūmiṃ dvijātaye /
tasmai vipra jagannātho dadāti paramaṃ padam

svadattāṃ paradattāṃ ca medinīṃ yo hareddvija /
yuktaḥ koṭikulairyāti narakaṃ cātidāruṇam

haredyo vai mahīṃ vipra devabrāhmaṇayorapi /
na dṛṣṭā niṣkṛtistasya koṭikalpaśatairmune

bhūmiṃ yo paradattāṃ ca rakṣati kṣmāpatirdvija /
puṇyaṃ koṭiguṇaṃ syādvai tasya dānaṃ janādapi

saptadvīpāṃ mahīṃ dattvā yatpuṇyaṃ prāpyate dvija /
tatpuṇyaṃ prāpnuyānmartyo dhenuṃ yacchandvijātaye

dadāti vṛṣabhaṃ yastu daridrāya kuṭuṃbine /
sarvapāpavinirmukto śivalokaṃ sa gacchati

tilapramāṇaṃ svarṇaṃ yo brāhmaṇāya prayacchati /
harerniketanaṃ yāti yuktaḥ koṭikulairapi

yo dadyādrajataṃ vipra sādhave bhūsurāya vai /
prāpnoti caṃdralokaṃ ca pibettatrāmṛtaṃ sadā

pravālaṃ mauktikaṃ caiva hīrakaṃ ca maṇiṃ tathā /
yo dadāti dvijaśreṣṭha svargalokaṃ sa gacchati

tulāpuruṣadānena yatpuṇyaṃ labhate janaḥ /
śālagrāmaśilāṃ dattvā tasmātkoṭiguṇaṃ labhet

saptadvīpāṃ kṣitiṃ datvā saśailavanakānanām /
yatpuṇyaṃ labhate tadvai śālagrāmaśilāpradaḥ

śālagrāmaśilāṃ yo vai dadyādbhūmisurāya ca /
tena vipra pradattāni bhuvanāni caturdaśa

tulāpuruṣadānaṃ yaḥ karoti dvijapuṃgava /
jananyāścodare tasya punarjanma na vidyate

sālaṃkārāṃ dvijaśreṣṭha kanyāṃ yacchati yo naraḥ /
sa gacchedbrahmasadanaṃ punarjanma na vidyate

kanyāvikrayiṇo nāsti narakānniṣkṛtiḥ punaḥ /
kanyādānakṛto nāsti svargādāgamanaṃ punaḥ

upānahau vātapatraṃ yo dadāti dvijātaye /
pretya ceṃdrapuraṃ gatvā vasetkalpacatuṣṭayam

vastraṃ yacchati yo divyaṃ sādhave vai dvijāyate /
svarge divyāṃbaradharaściraṃ tiṣṭheddvijottama

dhenuṃ purātanīṃ yacchedvastraṃ ca jaritaṃ dvija /
nūtnāṃ rajovatīṃ kanyāṃ sa gacchennirayaṃ tathā

kanyāvikrayiṇo brahmanna paśyellapanaṃ budhaḥ /
dṛṣṭvā cājñānato vāpi kuryyānmārtaṃḍa darśanam

phaladātā naro gacchettridivaṃ ca dvijottama /
bhuṃkte kalpasahasrāṇi phalaṃ tatrāmṛtopamam

śākaṃ yacchati yo martyo śivasyabhavanaṃ dvija /
yāti kalpadvayaṃ bhuṃkte durllabhaṃ pāyasaṃ suraiḥ

ghṛtado dadhidaścaiva takrado dugdhadastathā /
viṣṇorniketanaṃ gatvā sudhāpānaṃ karoti saḥ

gaṃdhadaḥ puṣpadaścaiva martyo yāti surālayam /
tiṣṭhedyugasahasrāṇi gaṃdhapuṣpavibhūṣitaḥ

śayyādānaṃ dānasāraṃ brāhmaṇāya dadāti yaḥ /
sa yāti brahmasadanaṃ paryyaṃke śerate ciram

pīṭhadātā dīpadātā sarvaduṣkṛtavarjitaḥ /
svarge siṃhāsane tiṣṭhejjvaladdīpāvalīvṛtaḥ

tāṃbūlaṃ yo naro dadyādbhūmiṃ bhuṃkte'khilāṃ sukham /
svarge devāṃganākroḍe suptastāṃbūlamatti vai

vidyādānaṃ dānavaraṃ karoti yo narottamaḥ /
pretya sa sannidhiṃ viṣṇostiṣṭhedyugaśatatrayam

prāpya jñānaṃ tatastatra durllabhaṃ vai dvijarṣabha /
durllabhaṃ mokṣamāpnoti śrīhareḥ kṛpayā dvija

anāthaṃ duḥkhitaṃ vipraṃ pāṭhayedvai narottamaḥ /
śrīharerbhavanaṃ yāti punarjanmavivarjitaḥ

yo naraḥ pustakaṃ dadyādbhaktiśraddhāsamanvitaḥ /
prativarṇaṃ labhetpuṇyaṃ kapilākoṭidānajam

madhudo guḍadaścaiva martyo yātīkṣusāgaram /
lavaṇaprado naro yāti vāruṇaṃ lokameva ca

sarveṣāmeva dānānāmannaṃ vāri dvijottama /
tattvajñairmunibhiḥ sarvaiḥ pravaraṃ vai prakīrttitam

annaṃ vāri dvijaśreṣṭha yena dattaṃ mahītale /
tena dattāni dānāni sarvāṇi ca dvijarṣabha

annado yo naro vipra prāṇadaśca prakīrttitaḥ /
tasmātsamastadānānāmannado labhate phalam

yathācānnaṃ tathā vāri dve tulye ca prakīrttite /
vāriṇā ca vinā cānnaṃ siddhaṃ na syāddvijottama

kṣudhā tṛṣā dvija vyāghra dve ca tulye prakīrttite /
ataścānnaṃ ca toyaṃ ca śreṣṭhaṃ proktaṃ budhairapi

annadānaṃ kṣitau brahmanye kurvaṃti narottamāḥ /
sarvapāpavinirmuktā gacchaṃti harimaṃdiram

yāvaṃtyannāni bho vipra yacchati kṣitimaṃḍale /
brahmahatyāśca tāvaṃtyo naśyaṃtyeva tapodhana

yacchatāṃ cānnadānāni śarīrāṇi ca pātakam /
gātrāṇi gṛhṇatāṃ tyaktvā sahasā yāṃti śaunaka

ataḥ pāpiṣṭha cānnāni na gṛhṇaṃti manīṣiṇaḥ /
gṛhṇaṃti mohādye mūḍhā bhavaṃti pāpabhāginaḥ

kuryādbhūmiṣṭhamudakaṃ caikaṃ bho dvijasattama /
sarvapāpairvinirmukto vrajetsa harimaṃdiram

prayatnena dvijaśreṣṭha karttavyo dhanasaṃcayaḥ /
saṃcitaṃ ca dhanaṃ brahmandānakarmaṇi vikṣipet

raṇaṃti ye ca kārpaṇyāddhanaṃ te cātiduḥkhinaḥ /
aṃte sarvadhanaṃ tyakvā niḥsvā gacchaṃti bho mune

mānavā ye sadā dānaṃ dattvā dattvā daridrati /
daridrāstena vijñeyā naraloke maheśvarāḥ

paraloke dvijavyāghra sādhusaṃyamavarjite /
nirdaye baṃdhuhīne ca na dattaṃ nopatiṣṭhate

sthite dhane naro yo vai nāśnāti na dadāti saḥ /
daridra iva vijñeyaḥ pretya niśvāsamutsṛjet

tapaso'pi varaṃ dānaṃ proktaṃ ca tattvadarśibhiḥ /
ato yatnāddvijaśreṣṭha dānakarma samācaret

dātā dānaṃ na dadyādvai samutsṛjya dvijātaye /
sa yāti nirayaṃ ghoraṃ sarvajaṃtubhayāvaham

dānaṃ dātā pratigrāhī na smarecca na yācate /
niraye cobhayorvāso yāvaccaṃdra divākarau

brahmahatyādi pāpāni yāni vai dvijasattama /
tāni dānena hanyaṃte tasmāddānaṃ samācaret

iti śrīpādmemahāpurāṇe brahmakhaṃḍe sūtaśaunakasaṃvāde caturviṃśatitamo'dhyāyaḥ