પદ્મ પુરાણ · અધ્યાય 4.23

શૌનક ઉવાચ।
કથયસ્વ મુને સૂત માહાત્મ્યં કલુષક્ષયમ્ ।
શેષપંચદિનસ્યાપિ કાર્ત્તિકસ્યાનુકંપયા

સૂત ઉવાચ।
શૃણુ શૌનક યત્પૃષ્ટં માહાત્મ્યં પાપનાશનમ્ ।
વક્ષ્યામ્યહં વૈ ચોર્જસ્ય શેષપંચદિનસ્ય ચ

વ્રતાનાં મુનિશાર્દૂલ પ્રવરં વિષ્ણુપંચકમ્ ।
તસ્મિન્યઃ પૂજયેદ્ભક્ત્યા શ્રીહરિં રાધયા સહ

ગંધપુષ્પૈર્ધૂપદીપૈર્વસ્ત્રૈર્નાનાવિધૈઃ ફલૈઃ ।
સ યાતિ વિષ્ણુસદનં સર્વપાપવિવર્જિતઃ

બ્રહ્મચારી ગૃહસ્થો વા વાનપ્રસ્થોઽથવા યતિઃ ।
ન પ્રાપ્નોતિ પરં સ્થાનમકૃત્વા વિષ્ણુપંચકમ્

સર્વપાપહરં પુણ્યં વિખ્યાતં વિષ્ણુપંચકમ્ ।
તત્ર સ્નાનં તુ યઃ કુર્યાત્સર્વતીર્થફલં લભેત્

શ્રીહરેઃ પુરતો વિપ્ર તુલસ્યાશ્ચ સમીપતઃ ।
પ્રદીપં સર્પિષા પૂર્ણં દદ્યાદ્યો ભક્તિભાવતઃ

નભસિ શ્રીહરેઃ પ્રીત્યૈ યાતિ સ વિષ્ણુમંદિરમ્ ।
પાપી યાતિ હરેર્ધામ સત્યમેતન્મયોદિતમ્

સ્નાપયેચ્ચાચ્યુતં ભક્ત્યા મધુક્ષીરઘૃતાદિભિઃ ।
દદ્યાત્કિં નો હરિઃ પ્રીતસ્તસ્મૈ સાધુજનાય વૈ

નૈવેદ્યં દેવદેવેશં પરમાન્નં નિવેદયેત્ ।
તસ્ય પુણ્યં પ્રસંખ્યાતું ન શક્તો વૈ ચતુર્મુખઃ

અર્ચયિત્વા હૃષીકેશમેકાદશ્યાં સમાહિતઃ ।
નિષ્પ્રાપ્ય ગોમયં સમ્યક્મંત્રવત્સમુપાસતે

ગોમૂત્રં મંત્રવદ્ભૂયો દ્વાદશ્યાં પ્રાશયેદ્વ્રતી ।
ક્ષીરં તથા ત્રયોદશ્યાં ચતુર્દશ્યાં તથા દધિ

સંપ્રાપ્ય પાપશુદ્ધ્યર્થં લંઘયિત્વા ચતુર્દિનમ્ ।
પંચમે તુ દિને સ્નાત્વા વિધિવત્પૂજ્ય કેશવમ્

ભોજયેદ્બ્રાહ્મણાન્ભક્ત્યા તેભ્યો દદ્યાચ્ચ દક્ષિણામ્ ।
તતો નક્તં સમશ્નીયાત્પંચગવ્યં સુમંત્રિતમ્

એવં કર્તુમશક્તો યઃ ફલમૂલં ચ ભોજનમ્ ।
કુર્યાદ્ધવિષ્યં વા વિપ્ર યથોક્તવિધિના હ વૈ

શ્રીહરેઃ પંચકં વિપ્ર કુર્યાદ્યસ્તુલસીદલૈઃ ।
પૂજયેત્તં સ વિજ્ઞેયઃ સ્વયં નારાયણઃ પ્રભુઃ

પુરા ત્રેતાયુગે શૂદ્રો દસ્યુવૃત્તિપરાયણઃ ।
નામ્ના દંડકરો નિત્યં ધર્મનિંદાં કરોતિ યઃ

અસત્યભાષી મિત્રઘ્નો વેશ્યાવિભ્રમ લોલુપઃ ।
બ્રહ્મસ્વહારી ક્રૂરશ્ચ પરસ્ત્રીગમને રતઃ

શરણાગતહંતા ચ પાખંડજનસંગભાક્ ।
ગોમાંસાશી સુરાપશ્ચ પરનિંદાકરઃ સદા

વિશ્વાસઘાતી જ્ઞાતીનાં વૃત્તિચ્છેદી દ્વિજોત્તમ ।
દુષ્ટં સર્વે સમાલોક્ય તાદૃશં તદ્ગૃહે દ્વિજઃ

આગતા જ્ઞાતયઃ ક્રુદ્ધાસ્તસ્ય પાપપરાયણમ્ ।
જ્ઞાતય ઊચુઃ।
રે રે મૂઢ દુરાચાર વિનાશં પ્રતિનીયતે ।
યા પ્રતિષ્ઠાર્જિતા પૂર્વૈરસ્માકં નિર્મલેઽન્વયે

ઇતિ ક્રુદ્ધા દ્વિજશ્રેષ્ઠ અપકીર્તિભયાદપિ ।
પાપિનાં પ્રવરં સર્વે તત્યજુસ્તં કુલાદરમ્

તતો ગતો મહારણ્યં વિનષ્ટાખિલ વૈભવઃ ।
કુર્યાત્સ દસ્યુભિઃ સાર્દ્ધં દસ્યુકર્મ નિરંતરમ્

પથિ પ્રગચ્છતાં તેષાં ભયાદ્વિપ્ર ન ખાદિતુમ્ ।
પ્રાપ્તં કિંચિત્ક્ષુધાર્ત્તાસ્તે ગતાશ્ચાન્ય સ્થલં પ્રતિ

તત્ર પ્રવિષ્ટાસ્તે સર્વે દૃષ્ટ્વા પુણ્યજનાન્બહૂન્ ।
ધાત્રીમૂલે સ્થિતાન્બ્રહ્મન્વૈષ્ણવાન્દ્વિજસત્તમાન્

સર્વે તે દસ્યવો વિપ્ર ગતા દંડકરોઽપિ સઃ ।
તેષાં પરિસરં ગત્વા પ્રણામં વૈ ચકાર હ

દંડકર ઉવાચ।
ક્ષુધાર્તોઽહં દ્વિજશ્રેષ્ઠાઃ પ્રાણા યાસ્યંતિ મે ધ્રુવમ્ ।
દદધ્વં ખાદિતું કિંચિદ્યુષ્માકં શરણં ગતઃ

આકર્ણ્ય વચનં તસ્ય ચોચુસ્તે ધર્મતત્પરાઃ ।
સર્વપાપહરે ત્વં ચ વિખ્યાતે વિષ્ણુપંચકે

કથમન્નં ખાદિતું તે વાંછા ત્વદ્ય હરેર્દિને ।
વિશેષં તે બ્રૂહિ સંજ્ઞા કાતે ભવતિ સાંપ્રતમ્

સ ઉવાચ મુદા વિપ્રા નામ્ના દંડકરોપ્યહમ્ ।
સર્વપાપસમાયુક્તશ્ચોદ્ધારો મે કથં ભવેત્

ઊચુસ્તે વૈ વ્રતં શ્રેષ્ઠં કુરુષ્વ વિષ્ણુપંચકમ્ ।
વિપ્રાણામાજ્ઞયા વિપ્ર ચકાર વિષ્ણુપંચકમ્

સ પ્રેત્ય ચ હરેઃ સ્થાનમારુહ્ય સ્યંદને વરે ।
આસાદ્ય શ્રીહરેરૂપં તસ્થૌ જન્મવિવર્જિતઃ

ય ઇદં શૃણુયાદ્ભક્ત્યા ચાખ્યાનં પાપનાશનમ્ ।
કોટિજન્માર્જિતં પાપં તસ્ય નશ્યતિ તત્ક્ષણાત્

ઇતિ શ્રીપાદ્મેમહાપુરાણે બ્રહ્મખણ્ડે સૂતશૌનકસંવાદે વિષ્ણુપંચકમાહાત્મ્યંનામ ત્રયોવિંશોઽધ્યાયઃ