Padma Purana · Chapter 3.12

vasiṣṭha uvāca-
pradakṣiṇamupāvṛtto jaṃbūmārge samāviśet /
jaṃbūmārgaṃ samāviśya pitṛdevarṣipūjitam

aśvamedhamavāpnoti viṣṇulokaṃ ca gacchati /
tatroṣya rajanīḥ paṃca ṣaṣṭhakāleśnuvannaraḥ

na durgatimavāpnoti siddhiṃ cāpnotyanuttamām /
jaṃbumārgādupāvṛtto gacchettu dulikāśramam

na durgatimavāpnoti svargaloke ca pūjyate /
agastyāśramamāsādya pitṛdevārcane rataḥ

trirātropoṣito rājannagniṣṭomaphalaṃ labhet /
śākavṛttiḥ phalairvāpi kaumāraṃ viṃdate param

kanyāśramaṃ samāsādya śrīpuṣṭaṃ lokapūjitam /
dharmāraṇyaṃ hi tatpuṇyamādyaṃ ca pārthivarṣabha

yatra praviṣṭamātro vai pāpebhyo vipramucyate /
arcayitvā pitṝndevānprayato niyatāśanaḥ

sarvakāmasamṛddhasya yajñasya phalamaśnute /
prādakṣiṇyaṃ tataḥ kṛtvā yayātipatanaṃ vrajet

hayamedhasya yajñasya phalamāpnoti tatra vai /
mahākālamato gacchenniyato niyatāśanaḥ

koṭitīrthamupaspṛśya hayamedhaphalaṃ labhet /
tato gaccheta dharmajña sthānaṃ tīrthamumāpateḥ

nāmnā bhadravaṭaṃ nāma triṣu lokeṣu viśrutam /
tatrābhigamya ceśānaṃ gosahasraphalaṃ labhet

mahādevaprasādācca gāṇapatyamavāpnuyāt /
samṛddhamasapatnaṃ tu śriyāyuktaṃ narottama

narmadāṃ tu samāsādya nadīṃ trailokyaviśrutām /
tarpayitvā pitṝndevānagniṣṭomaphalaṃ labhet

iti śrīpādme mahāpurāṇe svargakhaṃḍe dvādaśo'dhyāyaḥ