પદ્મ પુરાણ · અધ્યાય 3.12

વસિષ્ઠ ઉવાચ-
પ્રદક્ષિણમુપાવૃત્તો જંબૂમાર્ગે સમાવિશેત્ ।
જંબૂમાર્ગં સમાવિશ્ય પિતૃદેવર્ષિપૂજિતમ્

અશ્વમેધમવાપ્નોતિ વિષ્ણુલોકં ચ ગચ્છતિ ।
તત્રોષ્ય રજનીઃ પંચ ષષ્ઠકાલેશ્નુવન્નરઃ

ન દુર્ગતિમવાપ્નોતિ સિદ્ધિં ચાપ્નોત્યનુત્તમામ્ ।
જંબુમાર્ગાદુપાવૃત્તો ગચ્છેત્તુ દુલિકાશ્રમમ્

ન દુર્ગતિમવાપ્નોતિ સ્વર્ગલોકે ચ પૂજ્યતે ।
અગસ્ત્યાશ્રમમાસાદ્ય પિતૃદેવાર્ચને રતઃ

ત્રિરાત્રોપોષિતો રાજન્નગ્નિષ્ટોમફલં લભેત્ ।
શાકવૃત્તિઃ ફલૈર્વાપિ કૌમારં વિંદતે પરમ્

કન્યાશ્રમં સમાસાદ્ય શ્રીપુષ્ટં લોકપૂજિતમ્ ।
ધર્મારણ્યં હિ તત્પુણ્યમાદ્યં ચ પાર્થિવર્ષભ

યત્ર પ્રવિષ્ટમાત્રો વૈ પાપેભ્યો વિપ્રમુચ્યતે ।
અર્ચયિત્વા પિતૄન્દેવાન્પ્રયતો નિયતાશનઃ

સર્વકામસમૃદ્ધસ્ય યજ્ઞસ્ય ફલમશ્નુતે ।
પ્રાદક્ષિણ્યં તતઃ કૃત્વા યયાતિપતનં વ્રજેત્

હયમેધસ્ય યજ્ઞસ્ય ફલમાપ્નોતિ તત્ર વૈ ।
મહાકાલમતો ગચ્છેન્નિયતો નિયતાશનઃ

કોટિતીર્થમુપસ્પૃશ્ય હયમેધફલં લભેત્ ।
તતો ગચ્છેત ધર્મજ્ઞ સ્થાનં તીર્થમુમાપતેઃ

નામ્ના ભદ્રવટં નામ ત્રિષુ લોકેષુ વિશ્રુતમ્ ।
તત્રાભિગમ્ય ચેશાનં ગોસહસ્રફલં લભેત્

મહાદેવપ્રસાદાચ્ચ ગાણપત્યમવાપ્નુયાત્ ।
સમૃદ્ધમસપત્નં તુ શ્રિયાયુક્તં નરોત્તમ

નર્મદાં તુ સમાસાદ્ય નદીં ત્રૈલોક્યવિશ્રુતામ્ ।
તર્પયિત્વા પિતૄન્દેવાનગ્નિષ્ટોમફલં લભેત્

ઇતિ શ્રીપાદ્મે મહાપુરાણે સ્વર્ગખંડે દ્વાદશોઽધ્યાયઃ