Padma Purana · Chapter 3.13

yudhiṣṭhira uvāca-
vasiṣṭhena dilīpāya kathitaṃ tīrthamuttamam /
narmadeti ca vikhyātaṃ pāpaparvatadāraṇam

bhūyaśca śrotumicchāmi tanme kathaya nārada /
narmadāyāśca māhātmyaṃ vasiṣṭhoktaṃ dvijottama

kathameṣā mahāpuṇyā nadī sarvatra viśrutā /
narmadānāma vikhyātā tanmama brūhinārada

nārada uvāca-/
narmadā saritāṃ śreṣṭhā sarvapāpapraṇāśinī /
tārayetsarvabhūtāni sthāvarāṇi carāṇi ca

narmadāyāstu māhātmyaṃ vasiṣṭhoktaṃ mayā śrutam /
tadetaddhi mahārāja sarvaṃ hi kathayāmi te

puṇyā kanakhale gaṅgā kurukṣetre sarasvatī /
grāme vā yadi vāraṇye puṇyā sarvatra narmmadā

tribhiḥ sārasvataṃ toyaṃ saptāhena tu yāmunam /
sadyaḥ punāti gāṃgeyaṃ darśanādeva nārmadam

kaliṃga deśe paścārddhe parvate'marakaṃṭake /
puṇyā ca triṣu lokeṣu ramaṇīyā manoramā

sadevāsuragaṃdharvā ṛṣayaśca tapodhanāḥ /
tapastaptvā mahārāja siddhiṃ ca paramāṃ gatāḥ

tatra snātvā mahārāja niyamastho jiteṃdriyaḥ /
upoṣya rajanīmekāṃ kulānāṃ tārayecchatam

janeśvare naraḥ snātvā piṃḍaṃ datvā yathāvidhi /
pitarastasya tṛpyaṃti yāvadābhūtasaṃplavam

parvatasya samaṃtāttu rudrakoṭiḥ pratiṣṭhitā /
snānaṃ yaḥ kurute tatra gaṃdhamālyānulepanam

prītā tasya bhavetsarvā rudrakoṭirna saṃśayaḥ /
parvate paścimasyāṃte svayaṃ devo maheśvaraḥ

tatra snātvā śucirbhūtvā brahmacārī jiteṃdriyaḥ /
pitṛkāryaṃ tu kurvīta vidhidṛṣṭena karmaṇā

tilodakena tatraiva tarpayetpitṛdevatāḥ /
āsaptamaṃ kulaṃ tasya svarge tiṣṭhati pāṃḍava

ṣaṣṭivarṣasahasrāṇi svargaloke mahīyate /
apsarogaṇasaṃkīrṇo divyastrīparivāritaḥ

divyagaṃdhānuliptaśca divyālaṃkārabhūṣitaḥ /
tataḥ svargātparibhraṣṭo jāyate vipule kule

dhanavāndānaśīlaśca dhārmikaścaiva jāyate /
punaḥ smarati tattīrthaṃ gamanaṃ tatra kurvate

tārayitvā kulaśataṃ rudralokaṃ sa gacchati /
yojanānāṃ śataṃ sāgraṃ śrūyate sariduttamā

vistāreṇa tu rājendra yojanadvayamaṃtaram /
ṣaṣṭitīrthasahasrāṇi ṣaṣṭikoṭyastathaiva ca

parvatasya samaṃtāttu tiṣṭhaṃtyamarakaṃṭake /
brahmacārī śucirbhūtvā jitakrodho jiteṃdriyaḥ

sarvahiṃsānivṛttaśca sarvabhūtahite rataḥ /
evaṃ sarvasamācāraḥ kṣetrapālānparivrajet

tasya puṇyaphalaṃ rājanśṛṇuṣvāvahito hi me /
śataṃ varṣasahasrāṇāṃ svarge modeta pāṃḍava

apsarogaṇasaṃkīrṇe divyastrīparicārite /
divyagaṃdhānuliptaśca divyālaṃkārabhūṣitaḥ

krīḍate devaloke tu daivataiḥ saha modate /
tataḥ svargātparibhraṣṭo rājā bhavati vīryavān