Padma Purana · Chapter 3.11

vasiṣṭha uvāca-
anena tava dharmajña praśrayeṇa damena ca /
satyena ca mahābhāga tuṣṭosmi tava sarvaśaḥ

yasyedṛśaste dharmoyaṃ pitarastāritāstvayā /
tena paśyasi māṃ putra yājyaścāsi mamānagha

prītirme varddhate te'dya brūhi kiṃ karavāṇi te /
yadvakṣyasi naraśreṣṭha tasya dātāsmi tenagha

dilīpa uvāca-/
vedavedāṃgatattvajña sarvalokābhipūjita /
kṛtamityeva manye hi yadahaṃ dṛṣṭavānprabhum

yadi tvahamanugrāhyastava dharmmabhṛtāṃ vara /
prakṣyāmi hṛtsthaṃ saṃdehaṃ tanme tvaṃ vaktumarhasi

asti me bhagavankaścittīrthe yo dharmasaṃśayaḥ /
tadahaṃ śrotumicchāmi pṛthaksaṃkīrtanaṃ tvayā

pradakṣiṇāṃ yaḥ pṛthivīṃ karoti dvijasattama /
kiṃ phalaṃ tasya viprarṣe tanme brūhi tapodhana

vasiṣṭha uvāca-/
kathayiṣyāmi tadahamṛṣīṇāṃ matparāyaṇam /
tadekāgramanāstāta śṛṇu tīrtheṣu yatphalam

yasya hastau ca pādau ca manaścaiva susaṃyatam /
vidyā tapaśca kīrtiśca sa tīrthaphalamaśnute

pratigrahādupāvṛttaḥ saṃtuṣṭo niyataḥ śuciḥ /
ahaṃkāranivṛttaśca sa tīrthaphalamaśnute

akalkiko nirāhāro'labdhāhāro jiteṃdriyaḥ /
vimuktaḥ sarvadoṣairyaḥ sa tīrthaphalamaśnute

akrodhanaśca rājeṃdra satyaśīlo dṛḍhavrataḥ /
ātmopamaśca bhūteṣu sa tīrthaphalamaśnute

ṛṣibhiḥ kratavaḥ proktā deveṣvapi yathākramam /
phalaṃ caiva yathātattvaṃ pretya ceha ca sarvaśaḥ

na te śakyā daridreṇa yajñāḥ prāptuṃ mahīpate /
bahūpakaraṇā yajñā nānāsaṃbhāravistarāḥ

prāpyaṃte pārthivairete samṛddhairvā naraiḥ kvacit /
na nirdhanairnaragaṇairekātmabhirasādhanaiḥ

yo daridrairapi vidhiḥ śakyaḥ prāptuṃ janeśvara /
tulyo yajñaphalaiḥ puṇyaistaṃ nibodha mahīpate

ṛṣīṇāṃ paramaṃ guhyamidaṃ dharmmabhṛtāṃ vara /
tīrthābhigamanaṃ puṇyaṃ yajñairapi viśiṣyate

anupoṣya trirātrāṇi tīrthābhigamanena ca /
adatvā kāṃcanaṃ gāśca daridro nāma jāyate

agniṣṭomādibhiryajñairiṣṭvā vipuladakṣiṇaiḥ /
na tatphalamavāpnoti tīrthābhigamanena yat

nṛloke devalokasya tīrthaṃ trailokyaviśrutam /
puṣkaraṃ tīrthamāsādya devadevasamo bhavet

daśakoṭisahasrāṇi tīrthānāṃ vai mahīpate /
sānnidhyaṃ puṣkare yeṣāṃ trisaṃdhyaṃ sūryavaṃśaja

ādityā vasavo rudrā sādhyāśca samarudgaṇāḥ /
gaṃdharvāpsarasaścaiva tatra sannihitāḥ prabho

yatra devāstapastaptvā daityā brahmarṣayastathā /
divyayogā mahārāja puṇyena mahatā dvijāḥ

manasāpyabhikāmasya puṣkarāṇi manīṣiṇaḥ /
pūyaṃte sarvapāpāni nākapṛṣṭhe ca pūjyate

asmiṃstīrthe mahābhāga nityameva pitāmahaḥ /
uvāsa paramaprīto devadānavasaṃmataḥ

puṣkareṣu mahābhāga devāḥ sarṣipurogamāḥ /
siddhiṃ paramikāṃ prāptāḥ puṇyena mahatānvitāḥ

tatrābhiṣekaṃ yaḥ kuryātpitṛdevārcane rataḥ /
aśvamedhāddaśaguṇaṃ pravadaṃti manīṣiṇaḥ

apyekaṃ bhojayedvipraṃ puṣkarāraṇyamāśritaḥ /
tenaiti pūjitām̐llokānbrahmaṇaḥ sadane sthitān

sāyaṃprātaḥ smaredyastu puṣkarāṇi kṛtāṃjali /
upaspṛṣṭaṃ bhavettena sarvatīrtheṣu pārthiva

janmaprabhṛti yatpāpaṃ striyo vā puruṣasya vā /
puṣkare gatamātrasya sarvameva praṇaśyati

yathā surāṇāṃ sarveṣāmādistu madhusūdanaḥ /
tathaiva puṣkaro rājantīrthānāmādirucyate

uṣṭvā dvādaśavarṣāṇi puṣkare niyataḥ śuciḥ /
kratūnsarvānavāpnoti brahmalokaṃ ca gacchati

yastu varṣaśataṃ pūrṇamagnihotramupāśnute /
kārtikīṃ vā vasedekāṃ puṣkare samameva tat

duṣkaraṃ puṣkare gaṃtuṃ duṣkaraṃ puṣkare tapaḥ /
duṣkaraṃ puṣkare dānaṃ vastuṃ caiva suduṣkaram

trīṇi śṛṃgāṇi śubhrāṇi trīṇi prasravaṇāni ca /
puṣkarāṇyādi tīrthāni na vidmastatra kāraṇam

uṣṭvā dvādaśavarṣāṇi niyato niyatāśanaḥ /
sa muktaḥ sarvapāpebhyo sarvakratuphalaṃ labhet

iti śrīpādme mahāpurāṇe svargakhaṃḍe puṣkaratīrthamāhātmya-/
varṇanaṃnāma ekādaśo'dhyāyaḥ