Padma Purana · Chapter 2.93

/
kuṃjala uvāca-
kiṃ vijvala tvayā dṛṣṭamapūrvaṃ bhramatā mahīm /
āścaryeṇa samāyuktaṃ tanme kathaya suvrata

itaḥ prayāsi kaṃ deśamāhārārthaṃ tu sodyamī /
yadya dṛṣṭaṃ tvayā citraṃ samākhyāhi sutottama

vijvala uvāca-
asti merugireḥ pṛṣṭhe ānaṃdaṃ nāma kānanam /
divyavṛkṣaiḥ samākīrṇaṃpha lapuṣpamayaiḥ sadā

devavṛṃdaiḥ samākīrṇaṃ munisiddhasamanvitam /
apsarobhiḥ surūpābhirgaṃdharvaiḥ kinnaroragaiḥ

vāpīkūpataḍāgaiśca nadīprasravaṇaistathā /
ānaṃdakānanaṃ puṇyaṃ divyabhāvaiḥ prabhāsate

vimānaiḥ koṭisaṃkhyābhirhaṃsakuṃdeṃdusannibhaiḥ /
gītakolāhalaiḥ ramyairmeghadhvaninināditam

ṣaṭpadānāṃ ninādena sarvatra madhurāyate /
caṃdanaiścūtavṛkṣaiśca caṃpakaiḥ puṣpitairvṛtam

nānāvṛkṣaiḥ prabhātyevamānaṃdavanamuttamam /
nānāpakṣininādena bahukolāhalānvitam

evamānaṃdanaṃ dṛṣṭaṃ mayā tatra suśobhanam /
vimalaṃ ca sarastāta śobhate sāgaropamam

saṃpūrṇaṃ puṇyatoyena padmasaugaṃdhikaiḥ śubhaiḥ /
jalajaistu samākīrṇaṃ haṃsakāraṃḍavānvitam

evamāsītsarastasya sumadhye kānanasya hi /
devagaṃdharvasaṃbādhairmunivṛṃdairalaṃkṛtam

kiṃnaroragagaṃdharvaiścāraṇaiśca suśobhate /
tatrāścaryaṃ mayā dṛṣṭaṃ vaktuṃ tāta na śakyate

vimānenāpi divyena kalaśairupaśobhate /
chatradaṃḍapatākābhīrājamānena sattama

sarvabhogāvilenāpi gīyamānetha kinnaraiḥ /
gaṃdharvairapsarobhiśca śobhamānotha suvrata

stūyamāno mahāsiddhaṛṣibhistattvavedibhiḥ /
rūpeṇāpratimo loke na dṛṣṭastādṛśaḥ kvacit

sarvābharaṇaśobhāṃgo divyamālāviśobhitaḥ /
mahāratnakṛtāmālā yasyorasi virājate

tatsamīpe sthitā caikā nārī dṛṣṭā varānanā /
hemahāraiśca muktānāṃ valayaiḥ kaṃkaṇairyutā

divyavastraiśca gaṃdhaiśca caṃdanaiścārulepanaiḥ /
stūyamāno gīyamānaḥ puruṣastatra cāgataḥ

ratirūpā varārohā pīnaśroṇipayodharā /
sarvābharaṇaśobhāṃgī tādṛśī rūpasaṃpadā

dvāvetau tau mayā dṛṣṭau vimānenāpi cāgatau /
rūpalāvaṇyamādhuryau sarvaśobhāsamāvilau

samuttīrṇau vimānāttāvāgatau sarasontike /
snātau tāta mahātmānau strīpuṃsau kamalekṣaṇau

pragṛhya tau mahāśastrau daṃpatī tu parasparam /
tādṛśau ca śavau tatra patitau sarasastaṭe

prabhāse te tadā tau tu strīpuṃsau kamalekṣaṇau /
rūpeṇāpi mahābhāga tādṛśāveva tau śavau

devarūpopamastāta yathā puṃsastathā śavaḥ /
yathārūpaṃ hi tasyāpi tādṛśastatra dṛśyate

yathārūpaṃ tu bhāryāyāstathā śavo dvitīyakaḥ /
strīśavasya tu yanmāṃsaṃ śastreṇotkṛtya sā tataḥ

bhakṣate tasya māṃsāni raktāplutāni tāni tu /
puruṣo bhakṣate tadvacchavamāṃsaṃ samāturaḥ

kṣudhayā pīḍyamānau tau bhakṣete piśitaṃ tayoḥ /
yāvattṛptiṃ samāyātau tāvanmāṃsaṃ prabhakṣitam

sarasyatha jalaṃ pītvā saṃjātau sukhitau pitaḥ /
kiyatkālaṃ sthitau tatra vimānena gatau punaḥ

anye dve tu striyau tāta mayā dṛṣṭe ca tatra vai /
rūpasaubhāgyasaṃpanne te striyau cārulakṣaṇe

tābhyāṃ prabhakṣitaṃ māṃsaṃ yadā tāta mahāvane /
prahasete tadā te dve hāsyairaṭṭāṭṭakaiḥpunaḥ

bhakṣate ca svamāṃsāni tāvetau parinityaśaḥ /
kṛtvā snānādikaṃ māṃsaṃ paśyato mama tatra hi

anye striyau mahābhāga raudrā kārasamanvite /
daṃṣṭrākarālavadane tatraivāti vibhīṣaṇe

ūcatustau tadā te tu dehidehīti vai punaḥ /
evaṃ dṛṣṭaṃ mayā tāta vasatā vanasaṃnidhau

nityamutkīrya bhakṣyete tau dvau tu māṃsameva ca /
jāyete ca susaṃpūrṇau kāyau ca śavayoḥ punaḥ

nityamuttīrya tāvevaṃ te cāpyanye ca vai pitaḥ /
kurvaṃti sadṛśīṃ ceṣṭāṃ pūrvoktāṃ mama paśyataḥ

etadāścarya saṃjātaṃ dṛṣṭaṃ tāta mayā tadā /
bhavatā pṛcchitaṃ tāta dṛṣṭamāścaryameva ca

mayā khyātaṃ tavāgre vai sarvasaṃdehakāraṇam /
kathayasva prasādācca prīyamāṇena cetasā

vimānenāgato yosau striyā sārddhaṃ dvijottama /
divyarūpadharo yastu sa kastu kamalekṣaṇaḥ

kā ca nārī mahābhāga mahāmāṃsaṃ prabhakṣati /
sa kaścāpyāgatastāta sā caivābhyetya bhakṣati

prahasete tadā te dve striyau tāta vadasva naḥ /
ūcatustau tathā cānye dehidehīti vā punaḥ

tedvetvaṃ me samācakṣva mahābhīṣaṇake striyau /
etanme saṃśayaṃ tāta chettumarhasi suvrata

evamuktvā mahārāja virarāma sa cāṃḍajaḥ /
evaṃ pṛṣṭastṛtīyena vijvalenātmajena saḥ

provāca sarvaṃ vṛttāṃtaṃ cyavanasyāpi śṛṇvataḥ

iti śrīpadmapurāṇe bhūmikhaṃḍe venopākhyāne gurutīrthe cyavanacaritre trinavatitamo'dhyāyaḥ