Padma Purana · Chapter 2.92

kuṃjala uvāca-
kālaṃjaraṃ samāsādya nivasaṃti suduḥkhitāḥ /
mahāpāpaistu saṃdagdhā hāhābhūtā vicetanāḥ

tatra kaścitsamāyātaḥsiddhaścaiva mahāyaśāḥ /
tena pṛṣṭāḥ suduḥkhārtā bhavaṃtaḥ kena duḥkhitāḥ

sa taiḥ prokto mahāprājñaḥ sarvajñānaviśāradaḥ /
teṣāṃ jñātvā mahāpāpaṃ kṛpāṃ cakre supuṇyabhāk

siddha uvāca-
amāsomasamāyoge prayāgaḥ puṣkaraśca yaḥ /
arghatīrthaṃ tṛtīyaṃ tu vārāṇasī caturthakā

gacchaṃtu tatra vai yūyaṃ catvāraḥ pātakāvilāḥ /
gaṃgāṃbhasi yadā snātāstadā muktā bhaviṣyatha

pātakebhyo na saṃdeho nirmalatvaṃ gamiṣyatha /
ādiṣṭāstena vai sarve praṇemustaṃ prayatnataḥ

kālaṃjarāttato jagmuḥ satvaraṃ pāpapīḍitāḥ /
vārāṇasīṃ samāsādya snātvā cai vadvijottamāḥ

prayāgaṃ puṣkaraṃ caiva arghatīrthaṃ tu sattama /
amāsomaṃ susaṃprāpya jagmuste ca mahāpurīm

viduraścaṃdraśarmā ca vedaśarmā tṛtīyakaḥ /
vaiśyo vaṃjulakaścaiva surāpaḥ pāpacetanaḥ

tasminparvaṇi saṃprāpte snātā gaṃgāṃbhasi dvija /
snānamātreṇa muktāstu govadhādyaiśca kilbiṣaiḥ

brahmahatyā guruhatyā surāpānādi pātakaiḥ /
liptāni tāni tīrthāni paribhramaṃti medinīm

puṣkaro ardhatīrthastu prayāgaḥ pāpanāśanaḥ /
vārāṇasī caturthī tu liptā pāpairdvijottama

kṛṣṇatvaṃ pedire sarve haṃsarūpeṇa babhramuḥ /
sarveṣveva sutīrtheṣu snānaṃ cakrurdvijottamāḥ

kṛṣṇatvaṃ naiva gaccheta teṣāṃ pāpena cāgatam /
sutīrtheṣu mahārāja snātāḥ sarveṣu vai punaḥ

yaṃ yaṃ tīrthaṃ prayāṃtyete sarve tīrthā dvijottama /
haṃsarūpeṇa vai yāṃti taiḥ sārddhaṃ tu suduḥkhitāḥ

bhāryāḥ pātakarūpāśca bhramaṃti paritastathā /
aṣṭaṣaṣṭisu tīrthāni haṃsarūpeṇa babhramuḥ

taiḥ sārddhaṃ su mahārāja mahātīrthaiḥ samaṃ punaḥ /
mānasaṃ cāgatāste ca pātakākulamānasāḥ

tatra snātā mahārāja na jahāti ca pātakaḥ /
lajjayāviṣṭamanasā mānaso haṃsarūpadhṛk

saṃjātaḥ kṛṣṇakāyastu yaṃ tvaṃ vai dṛṣṭavānpurā /
revātīraṃ tato jagmuruttaraṃ pāpanāśanam

kubjāyāḥ saṃgame te tu surasiddhaniṣevite /
snānamātreṇa muktāste pāpebhyo dvijasattama

vihāya varṇamevaitaṃ sukṛtaṃ pratijagmire /
yaṃ yaṃ tīrthaṃ prayāṃtyete haṃsāḥ snānaṃ pracakramuḥ

jahasustāḥ striyo dṛṣṭvā pātakaṃ naiva gacchati /
toyānalena kubjāyāḥ pātakaṃ varameva ca

bhasmāvaśeṣaṃ saṃjātaṃ tadā mṛtāstu tāḥ striyaḥ /
brahmahatyā gurorhatyā surāpānāgamāgamāḥ

bhasmībhūtāstu saṃjātā revāyāḥ kubjayā hatāḥ /
tāstu hatā mahābhāga yā mṛtāstu sarittaṭe

aṣṭaṣaṣṭi sutīrthānāṃ haṃsarūpeṇa tāni tu /
sārddhaṃ haṃsaḥ samāyāto viddhi taṃ tvaṃ tu mānasam

catvāraḥ kṛṣṇahaṃsāśca teṣāṃ nāmāni me śṛṇu /
prayāgaḥ puṣkaraścaiva arghatīrthamanuttamam

vārāṇasī caturthī ca catvāraḥ pāpanāśanāḥ /
brahmahatyābhibhūtāni catvāri paribabhramuḥ

tīrthānyetāni duḥkhena tīrtheṣu ca mahāmate /
na gataṃ pātakaṃ ghoraṃ teṣāṃ tu bhramatāṃ suta

kubjāyāḥ saṃgame śuddhā vimuktāḥ kilbiṣātkila /
tīrthānāmeva sarveṣāṃ puṇyānāmiha saṃmataḥ

rājā prayāgaḥ saṃjāta iṃdrasya purataḥ kila /
tāvadgarjaṃtu tīrthāni yāvadrevā na dṛśyate

brahmahatyādi pāpānāṃ vināśāya pratiṣṭhitā /
kapilāsaṃgame puṇye revāyāḥ saṃgame tathā

meghanādasamāyoge tathā caivorusaṃgame /
mahāpuṇyā mahādhanyā revā sarvatradurlabhā

sā ca ॐkāre bhṛgukṣetre narmadākubjasaṃgame /
duḥprāpyā mānavai revā māhiṣmatyāṃ surottamaiḥ

viṭaṃkāsaṃgame puṇyā śrīkaṃṭhe maṃgaleśvare /
sarvatra durlabhā revā surapuṇyasamākulā

tīrthamātā mahādevī agharāśivināśinī /
ubhayoḥ kūlayormadhye yatra tatra sukhī naraḥ

aśvamedhaphalaṃ bhuṃkte snānenaikena mānavaḥ /
etatte sarvamākhyātaṃ yattvayā paripṛcchitam

sarvapāpāpahaṃ puṇyaṃ gatidaṃ cāpiśṛṇvatām /
evamuktvā mahāprājña tṛtīyaṃ putramabravīt

iti śrīpadmapurāṇe bhūmikhaṃḍe venopākhyāne gurutīrthe cyavanacaritre dvinavatitamo'dhyāyaḥ