પદ્મ પુરાણ · અધ્યાય 2.93

।
કુંજલ ઉવાચ-
કિં વિજ્વલ ત્વયા દૃષ્ટમપૂર્વં ભ્રમતા મહીમ્ ।
આશ્ચર્યેણ સમાયુક્તં તન્મે કથય સુવ્રત

ઇતઃ પ્રયાસિ કં દેશમાહારાર્થં તુ સોદ્યમી ।
યદ્ય દૃષ્ટં ત્વયા ચિત્રં સમાખ્યાહિ સુતોત્તમ

વિજ્વલ ઉવાચ-
અસ્તિ મેરુગિરેઃ પૃષ્ઠે આનંદં નામ કાનનમ્ ।
દિવ્યવૃક્ષૈઃ સમાકીર્ણંફ લપુષ્પમયૈઃ સદા

દેવવૃંદૈઃ સમાકીર્ણં મુનિસિદ્ધસમન્વિતમ્ ।
અપ્સરોભિઃ સુરૂપાભિર્ગંધર્વૈઃ કિન્નરોરગૈઃ

વાપીકૂપતડાગૈશ્ચ નદીપ્રસ્રવણૈસ્તથા ।
આનંદકાનનં પુણ્યં દિવ્યભાવૈઃ પ્રભાસતે

વિમાનૈઃ કોટિસંખ્યાભિર્હંસકુંદેંદુસન્નિભૈઃ ।
ગીતકોલાહલૈઃ રમ્યૈર્મેઘધ્વનિનિનાદિતમ્

ષટ્પદાનાં નિનાદેન સર્વત્ર મધુરાયતે ।
ચંદનૈશ્ચૂતવૃક્ષૈશ્ચ ચંપકૈઃ પુષ્પિતૈર્વૃતમ્

નાનાવૃક્ષૈઃ પ્રભાત્યેવમાનંદવનમુત્તમમ્ ।
નાનાપક્ષિનિનાદેન બહુકોલાહલાન્વિતમ્

એવમાનંદનં દૃષ્ટં મયા તત્ર સુશોભનમ્ ।
વિમલં ચ સરસ્તાત શોભતે સાગરોપમમ્

સંપૂર્ણં પુણ્યતોયેન પદ્મસૌગંધિકૈઃ શુભૈઃ ।
જલજૈસ્તુ સમાકીર્ણં હંસકારંડવાન્વિતમ્

એવમાસીત્સરસ્તસ્ય સુમધ્યે કાનનસ્ય હિ ।
દેવગંધર્વસંબાધૈર્મુનિવૃંદૈરલંકૃતમ્

કિંનરોરગગંધર્વૈશ્ચારણૈશ્ચ સુશોભતે ।
તત્રાશ્ચર્યં મયા દૃષ્ટં વક્તું તાત ન શક્યતે

વિમાનેનાપિ દિવ્યેન કલશૈરુપશોભતે ।
છત્રદંડપતાકાભીરાજમાનેન સત્તમ

સર્વભોગાવિલેનાપિ ગીયમાનેથ કિન્નરૈઃ ।
ગંધર્વૈરપ્સરોભિશ્ચ શોભમાનોથ સુવ્રત

સ્તૂયમાનો મહાસિદ્ધઋષિભિસ્તત્ત્વવેદિભિઃ ।
રૂપેણાપ્રતિમો લોકે ન દૃષ્ટસ્તાદૃશઃ ક્વચિત્

સર્વાભરણશોભાંગો દિવ્યમાલાવિશોભિતઃ ।
મહારત્નકૃતામાલા યસ્યોરસિ વિરાજતે

તત્સમીપે સ્થિતા ચૈકા નારી દૃષ્ટા વરાનના ।
હેમહારૈશ્ચ મુક્તાનાં વલયૈઃ કંકણૈર્યુતા

દિવ્યવસ્ત્રૈશ્ચ ગંધૈશ્ચ ચંદનૈશ્ચારુલેપનૈઃ ।
સ્તૂયમાનો ગીયમાનઃ પુરુષસ્તત્ર ચાગતઃ

રતિરૂપા વરારોહા પીનશ્રોણિપયોધરા ।
સર્વાભરણશોભાંગી તાદૃશી રૂપસંપદા

દ્વાવેતૌ તૌ મયા દૃષ્ટૌ વિમાનેનાપિ ચાગતૌ ।
રૂપલાવણ્યમાધુર્યૌ સર્વશોભાસમાવિલૌ

સમુત્તીર્ણૌ વિમાનાત્તાવાગતૌ સરસોન્તિકે ।
સ્નાતૌ તાત મહાત્માનૌ સ્ત્રીપુંસૌ કમલેક્ષણૌ

પ્રગૃહ્ય તૌ મહાશસ્ત્રૌ દંપતી તુ પરસ્પરમ્ ।
તાદૃશૌ ચ શવૌ તત્ર પતિતૌ સરસસ્તટે

પ્રભાસે તે તદા તૌ તુ સ્ત્રીપુંસૌ કમલેક્ષણૌ ।
રૂપેણાપિ મહાભાગ તાદૃશાવેવ તૌ શવૌ

દેવરૂપોપમસ્તાત યથા પુંસસ્તથા શવઃ ।
યથારૂપં હિ તસ્યાપિ તાદૃશસ્તત્ર દૃશ્યતે

યથારૂપં તુ ભાર્યાયાસ્તથા શવો દ્વિતીયકઃ ।
સ્ત્રીશવસ્ય તુ યન્માંસં શસ્ત્રેણોત્કૃત્ય સા તતઃ

ભક્ષતે તસ્ય માંસાનિ રક્તાપ્લુતાનિ તાનિ તુ ।
પુરુષો ભક્ષતે તદ્વચ્છવમાંસં સમાતુરઃ

ક્ષુધયા પીડ્યમાનૌ તૌ ભક્ષેતે પિશિતં તયોઃ ।
યાવત્તૃપ્તિં સમાયાતૌ તાવન્માંસં પ્રભક્ષિતમ્

સરસ્યથ જલં પીત્વા સંજાતૌ સુખિતૌ પિતઃ ।
કિયત્કાલં સ્થિતૌ તત્ર વિમાનેન ગતૌ પુનઃ

અન્યે દ્વે તુ સ્ત્રિયૌ તાત મયા દૃષ્ટે ચ તત્ર વૈ ।
રૂપસૌભાગ્યસંપન્ને તે સ્ત્રિયૌ ચારુલક્ષણે

તાભ્યાં પ્રભક્ષિતં માંસં યદા તાત મહાવને ।
પ્રહસેતે તદા તે દ્વે હાસ્યૈરટ્ટાટ્ટકૈઃપુનઃ

ભક્ષતે ચ સ્વમાંસાનિ તાવેતૌ પરિનિત્યશઃ ।
કૃત્વા સ્નાનાદિકં માંસં પશ્યતો મમ તત્ર હિ

અન્યે સ્ત્રિયૌ મહાભાગ રૌદ્રા કારસમન્વિતે ।
દંષ્ટ્રાકરાલવદને તત્રૈવાતિ વિભીષણે

ઊચતુસ્તૌ તદા તે તુ દેહિદેહીતિ વૈ પુનઃ ।
એવં દૃષ્ટં મયા તાત વસતા વનસંનિધૌ

નિત્યમુત્કીર્ય ભક્ષ્યેતે તૌ દ્વૌ તુ માંસમેવ ચ ।
જાયેતે ચ સુસંપૂર્ણૌ કાયૌ ચ શવયોઃ પુનઃ

નિત્યમુત્તીર્ય તાવેવં તે ચાપ્યન્યે ચ વૈ પિતઃ ।
કુર્વંતિ સદૃશીં ચેષ્ટાં પૂર્વોક્તાં મમ પશ્યતઃ

એતદાશ્ચર્ય સંજાતં દૃષ્ટં તાત મયા તદા ।
ભવતા પૃચ્છિતં તાત દૃષ્ટમાશ્ચર્યમેવ ચ

મયા ખ્યાતં તવાગ્રે વૈ સર્વસંદેહકારણમ્ ।
કથયસ્વ પ્રસાદાચ્ચ પ્રીયમાણેન ચેતસા

વિમાનેનાગતો યોસૌ સ્ત્રિયા સાર્દ્ધં દ્વિજોત્તમ ।
દિવ્યરૂપધરો યસ્તુ સ કસ્તુ કમલેક્ષણઃ

કા ચ નારી મહાભાગ મહામાંસં પ્રભક્ષતિ ।
સ કશ્ચાપ્યાગતસ્તાત સા ચૈવાભ્યેત્ય ભક્ષતિ

પ્રહસેતે તદા તે દ્વે સ્ત્રિયૌ તાત વદસ્વ નઃ ।
ઊચતુસ્તૌ તથા ચાન્યે દેહિદેહીતિ વા પુનઃ

તેદ્વેત્વં મે સમાચક્ષ્વ મહાભીષણકે સ્ત્રિયૌ ।
એતન્મે સંશયં તાત છેત્તુમર્હસિ સુવ્રત

એવમુક્ત્વા મહારાજ વિરરામ સ ચાંડજઃ ।
એવં પૃષ્ટસ્તૃતીયેન વિજ્વલેનાત્મજેન સઃ

પ્રોવાચ સર્વં વૃત્તાંતં ચ્યવનસ્યાપિ શૃણ્વતઃ

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થે ચ્યવનચરિત્રે ત્રિનવતિતમોઽધ્યાયઃ