Padma Purana · Chapter 2.57

viṣṇuruvāca-
krīḍā satīrūpa dharā prabhūtvā gehaṃ gatā cāru pativratāyāḥ /
tāmāgatāṃ satyasvarūpayuktā sā sādaraṃ vākyamuvāca dhanyā

vākyaiḥ supuṇyaiḥ paripūjitā sā uvāca krīḍā sukalāṃ vihasya /
māyānugaṃ viśvavimohanaṃ satī pratyuttaraṃ satyaprameyuktam

mamāpi bhartā prabalo guṇajño dhīraḥ savidyo mahimāprayuktaḥ /
tyaktvā gataḥ pāpatarāṃsupuṇyo māmeva nāthaḥ śṛṇu puṇyakīrtiḥ

vākyaistu puṇyairabalāsvabhāvādākarṇya sarvaṃ sukalā samuktam /
saṃśuddhabhāvāṃ ca viciṃtya cāha kasmādgataḥ suṃdari te'dya nāthaḥ

vihāya te rūpamatīva satyamācakṣva sarvaṃ bhavatī subhartuḥ /
dhyānopayuktā sakalaṃ karoti sakhīsvarūpā gṛhamāgatā me

krīḍā babhāṣe śṛṇu satyametaṃ caritrabhāvaṃ mama bhartturasya /
ahaṃ priye yasya sadaiva yuktā yamicchate taṃ pratisāṃtvayāmi

kartuḥ supuṇyaṃ vacanaṃ subharturdhyānopayuktā sakalaṃ karomi /
ekāṃtaśīlā saguṇānurūpā śuśrūṣayaikastamihaiva devi

mama pūrva vipāko'yaṃ saṃpratyeva pravartate /
yatastyaktvā gato bharttā māmevaṃ maṃdabhāginīm

sakhe na dhāraye jīvaṃ svakīya kāyameva ca /
patyāhīnāḥ kathaṃ nāryaḥ sujīvaṃti ca nirghṛṇāḥ

rūpaśṛṃgārasaubhāgyaṃ sukhaṃ saṃpacca nānyathā /
nārīṇāṃ hi mahābhāgo bhartā śāstreṣu gīyate

tayā sarvaṃ samākarṇya yaduktaṃ krīḍayā tadā /
satyabhāvaṃ viditvā sā mene saṃbhāṣitaṃ tadā

viśvastā sā mahābhāgā sukalā patidevatā /
tāmuvāca punaḥ sarvamātmaceṣṭānugaṃ vacaḥ

samāsena samākhyātaṃ pūrvavṛttāṃtamātmanaḥ /
yathā bhartā gato yātrāṃ puṇyasādhanatatparaḥ

ātmaduḥkhaṃ susatyaṃ ca tapa eva manasvini /
bodhitā krīḍayā sā tu samāśvāsya pativratā

sūta uvāca-
ekadā tu tayā proktaṃ krīḍayā sukalāṃ prati /
sakhe paśya vanaṃ saumyaṃ divyavṛkṣairalaṃkṛtam

tatra tīrthaṃ paraṃ puṇyamasti pātakanāśanam /
nānāvallīvitānaiśca supuṣpaiḥ pariśobhitam

āvābhyāmapi gaṃtavyaṃ puṇyahetorvarānane /
samākarṇya tayā sārddhaṃ sukalā māyayā tadā

praviveśa vanaṃ divyaṃ naṃdanopamameva sā /
sarvartukusumopetaṃ kokilāśatanāditam

gīyamānaṃ sumadhurairnādairmadhukarairapi /
kūjadbhiḥ pakṣibhiḥ puṇyaiḥ puṇyadhvanisamākulam

caṃdanādikavṛkṣaiśca saurabhaiśca virājitam /
sarvabhogaiḥ susaṃpūrṇaṃ mādhavyā mādhavena vai

racitaṃ mohanāyaiva sukalāyāśca kāraṇāt /
tayā sārdhaṃ praviṣṭā sā tadvanaṃ sarvabhāvanam

dadarśa saukhyadaṃ puṇyaṃ māyābhāvaṃ na viṃdati /
vīkṣamāṇā vanaṃ divyaṃ tayā saha janeśvara

śakropi cābhyayāttatra devamūrtivirājitaḥ /
tayā dūtyā samaṃ prāptaḥ kāmastatra samāgataḥ

sarvabhogapatirbhūtvā kāmalīlāsamākulaḥ /
kāmamāha samābhāṣya eṣā sā sukulā gatā

praharasva mahābhāga krīḍāyāḥ purataḥ sthitām /
māyāṃ kṛtvā samānītā krīḍayā tava saṃnidhau

pauruṣaṃ darśayādyaiva yadyasti kuru niścitam /
kāma uvāca-
ātmarūpaṃ darśayasva caturaṃ līlayānvitam

yenāhaṃ praharāmyetāṃ paṃcabāṇaiḥ sahasradṛk /
iṃdra uvāca-
kvāste te pauruṣaṃ mūḍha yena lokaṃ viḍaṃbase

mamādhāraparobhūtvā yoddhumicchasi sāṃpratam /
kāma uvāca-
tenāpi devadevena mahādevena śūlinā

pūrvameva hṛtaṃ rūpaṃ mamakāyo na vidyate /
icchāmyahaṃ yadā nārīṃ haṃtuṃ śṛṇuṣva sāṃpratam

puṃsāṃ kāyaṃ samāśritya ātmarūpaṃ pradarśaye /
pumāṃsaṃ vā sahasrākṣa nāryāḥ kāryaṃ samāśraye

pūrvadṛṣṭā yadā nārī tāmeva pariciṃtayet /
ciṃtyamānasya puṃsastu nāryārūpaṃ punaḥpunaḥ

adṛṣṭaṃ tu samāśritya puṃsamunmādayāmyaham /
tathāpyunmādayāmyevaṃ nārīrūpaṃ na saṃśayaḥ

saṃsmaraṇātsmaro nāma mama jātaṃ sureśvara /
tāṃ dṛṣṭvā tādṛśoraṃga vasturūpaṃ samāśraye

ātmatejaḥ prakāśena bādhyabādhakatāṃ vrajet /
nārīrūpaṃ samāśritya dhīraṃ puruṣaṃ pramohayet

puruṣaṃ tu samāśritya bhāvayāmi suyoṣitam /
rūpahīnosmi he iṃdra asmadrūpaṃ samāśrayet

tavarūpaṃ samāśritya tāṃ sādhaye yathepsitām /
evamuktvā sa deveṃdraṃ kāyaṃ tasya mahātmanaḥ

sakhāsau mādhavasyāpi samāśritya sumāyudhaḥ

tāmeva haṃtuṃ kusumāyudhopi sādhvīṃ supuṇyāṃ kṛkalasya bhāryām /
samutsukastiṣṭhati bāṇalakṣaṃ tasyāśca kāyaṃ nayanairvilokya

iti śrīpadmapurāṇe bhūmikhaṃḍe venopākhyāne sukalācaritre saptapaṃcāśattamo'dhyāyaḥ