Scripture Library

Padma Purana · Chapter 2.56

2.56.1

viṣṇuruvāca-
tasyāḥ satyavināśāya manmathaḥ sasurādhipaḥ /
prasthitaḥ sukalāṃ tarhi satyo dharmamathābravīt

2.56.2

paśya dharma mahāprājña manmathasya viceṣṭitam /
tavārthamātmanaścaiva puṇyasyāpi mahātmanaḥ

2.56.3

visṛjāmi mahāsthānaṃ vāsturūpaṃ sukhodayam /
satyākhyaṃ ca supriyākhyaṃ sudevākhyaṃ gṛhottamam

2.56.4

tameva nāśayedgatvā kāma eṣa pramattadhīḥ /
ripurūpaḥ suduṣṭātmā asmākaṃ hi na saṃśayaḥ

2.56.5

patistapodhano vipraḥ susatī yā pativratā /
susatyo bhūpatirdharmamamagehānasaṃśayaḥ

2.56.6

yatrāhaṃ vṛddhisaṃpuṣṭastatra vāso hi te bhavet /
tatra puṇyaṃ samāyāti śraddhayā saha krīḍate

2.56.7

kṣamā śāṃtyā samāyuktā āyāti mama maṃdiram /
yathā satyo damaścaiva dayā sauhṛdameva ca

2.56.8

prajñāyuktaḥ sa nirlobho yatrāhaṃ tatra saṃsthitaḥ /
śuciḥ svabhāvastatraiva amī ca mama bāṃdhavāḥ

2.56.9

asteyamapyahiṃsā ca titikṣā vṛddhireva ca /
mama gehe samāyātā dhanyatāṃ śṛṇu dharmarāṭ

2.56.10

gurūṇāṃ cāpi śuśrūṣā viṣṇurlakṣmyā samāvṛtaḥ /
madgehaṃ tu samāyāṃti devāścāgnipurogamāḥ

2.56.11

mokṣamārgaṃ prakāśedyo jñānodīptyā samanvitaḥ /
etaiḥ sārdhaṃ vasāmyeva satīṣu dharmavatsu ca

2.56.12

sādhuṣveteṣu sarveṣu gṛharūpeṣu me sadā /
uktenāpi kuṭuṃbena vasāmyeva tvayā saha

2.56.13

sasatvāḥ sādhurūpāste vedhasā me gṛhīkṛtāḥ /
saṃcarāmi mahābhāga svacchaṃdena ca līlayā

2.56.14

īśvaraśca jagatsvāmī trinetro vṛṣavāhanaḥ /
mama gehe svarūpeṇa vartate śivayā yutaḥ

2.56.15

tadidaṃ saṃsṛteḥ sāraṃ gṛharūpaṃ maheśvaram /
sadanaṃ śaṃkaretyākhyaṃ nāśitaṃ manmathena vai

2.56.16

viśvāmitraṃ mahātmānaṃ tapaṃtaṃ tapa uttamam /
menakāṃ hi samāśritya kāmoyaṃ jitavānpurā

2.56.17

satī pativratāhalyā gautamasya priyā śubhā /
susatyāccālitā tena manmathena durātmanā

2.56.18

munayaḥ satyadharmajñā nānāstriyaḥ pativratāḥ /
madgṛhāstā imāḥ sarvā dīpitāḥ kāmavahninā

2.56.19

durdharo duḥsaho vyāpī yotisatyeṣu niṣṭhuraḥ /
māmevaṃ paśyate nityaṃ kva satyaḥ paritiṣṭhati

2.56.20

samāṃ jñātvā samāyāti bāṇapāṇirdhanurdharaḥ /
nāśayenmadgṛhaṃ pāpo vītihotraiśca nāmakaiḥ

2.56.21

pāpaleśāśca ye krūrā anye pākhaṃḍasaṃśrayāḥ /
te tu buddhyā'hitāḥ sarve satyagehaṃ viśaṃti hi

2.56.22

senādhyakṣairasatyaistu chadmanā tena sādhitaḥ /
pātayedardayedgehaṃ pāpaḥ śastrairdurātmabhiḥ

2.56.23

māmevaṃ tāḍayetpāpo mahābala manobhavaḥ /
asya dhāmnā pradagdhohaṃ śūnyatāṃ hi vrajāmi vai

2.56.24

nūtanaṃ gṛhamicchāmi striyākhyaṃ patibhūpatim /
kṛkalasyāpi puṇyasya priyeyaṃ śivamaṃgalā

2.56.25

tadgṛhaṃ sukalākhyaṃ me dagdhuṃ pāpaḥ samudyataḥ /
ayameṣa sahasrākṣaḥ kāmena sahito balī

2.56.26

kāmasya kāraṇātkasmātpūrvavṛttaṃ na viṃdati /
ahalyāyāḥ prasaṃgena meṣopastho vyajāyata

2.56.27

pauruṣaṃ hi munerdṛṣṭvā satyāścaiva pradhaṣarṇāt /
naṣṭaḥ kāmasya doṣeṇa surarāṭtatra saṃsthitaḥ

2.56.28

bhuktavāndāruṇaṃ śāpaṃ duḥkhena mahatānvitaḥ /
kṛkalasya priyāmenāṃ sukalāṃ puṇyacāriṇīm

2.56.29

eṣa haṃtuṃ sahasrākṣa udyataḥ kāmasaṃyutaḥ /
yathā ceṃdreṇa nāyāti kāma eṣa tathā kuru

2.56.30

dharmarāja mahāprājña bhavānmatimatāṃ varaḥ /
dharmarāja uvāca-
ūnaṃ tejaḥ kariṣyāmi kāmasya maraṇaṃ tathā

2.56.31

ekopāyo mayā dṛṣṭastamihaiva prapaśyatu /
prajñā caiṣā mahāprājñā śakunīrūpacāriṇī

2.56.32

bharturāgamanaṃ puṇyaṃ śabdenākhyātu khe yataḥ /
śakunasya prabhāveṇa bhartuścāgamanena ca

2.56.33

duṣṭairnaṣṭā na bhūyeta svasthacittā na saṃśayaḥ /
prajñā saṃpreṣitā tena gatā sā sukalāgṛham

2.56.34

prakurvatī mahacchabdaṃ dṛṣṭadeveva sā babhau /
pūjitā mānitā prajñā dhūpadīpādibhistadā

2.56.35

brāhmaṇaṃ sukalāpṛcchatkimeṣā ca vadenmama /
brāhmaṇa uvāca-
bhartuścāgamanaṃ brūte tavaiva subhage sthirā

2.56.36

dinasaptakamadhye sa āgamiṣyati nānyathā

2.56.37

ityevamākarṇyasumaṃgalaṃ vacaḥ praharṣayuktā sahasā babhūva /
dharmajñamekaṃ saguṇaṃ hi kāṃtaṃ śakunātpradiṣṭaṃ hi samāgataṃ tam

2.56.56

iti śrīpadmapurāṇe bhūmikhaṃḍe venopākhyāne sukalācaritre ṣaṭpaṃcāśattamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0