Padma Purana · Chapter 2.58

viṣṇuruvāca-
krīḍāprayuktāsu vanaṃ praviṣṭā vaiśyasya bhāryā sukalā sutanvī /
dadarśa sarvaṃ gahanaṃ manoramaṃ tāmeva papraccha sakhīṃ satī sā

araṇyametatpravaraṃ supuṇyaṃ divyaṃ sakhe kasya manobhirāmam /
siddhaṃsukāmaiḥ pravaraiḥ samastaiḥ papraccha harṣātsukalā sakhīṃ tām

krīḍovāca-
etadvanaṃ divyaguṇaiḥ prayuktaṃ siddhasvabhāvaiḥ paribhāvanena /
puṣpākulaṃ kāmaphalopayuktaṃ vipaśya sarvaṃ makaradhvajasya

evaṃ vākyaṃ tataḥ śrutvā harṣeṇa mahatānvitā /
samālokya mahadvṛttaṃ kāmasya ca durātmanaḥ

vāyunā nīyamānaṃ taṃ samāghrāti na saurabham /
vāti vāyuḥ svabhāvena saurabheṇa samanvitaḥ

tadbāṇo viśatenāsāṃ yathā tathā sulīlayā /
sā gaṃdhaṃ naiva gṛhṇāti puṣpāṇāṃ ca varānanā

na cāsvādayate sā tu surasānsā mahāsatī /
sa sakhā kāmadevasya ramamāṇo vinirjitaḥ

lajjitaḥ parāṅmukho bhūtvā bhūṃ papāta lavacchadaiḥ /
phalebhyo hi supakvebhyaḥ puṣpamaṃjarisaṃskṛtaḥ

lavarūpopatadbhūmau rasastveṣa tayā jitaḥ /
makaraṃdaḥ sudīnātmā phalādbhūmiṃ tataḥ punaḥ

bhakṣyate makṣikābhiśca yathāmṛto raṇe tathā /
makṣikābhakṣyamāṇastu pravāhena prayāti saḥ

maṃdaṃmaṃdaṃ prayātyeva taṃ hasaṃti ca pakṣiṇaḥ /
nānārutaiḥ pracalaṃti sukhamānaṃdanirbharaiḥ

prītyā śakunayastatra vanamadhyanagasthitāḥ /
sukalayā jito hyeṣa nimnaṃ paṃthānamāśritaḥ

prītyā sametā ratiḥ kāmabhāryā gatvābravītsā sukalāṃ vihasya /
svastyastu te svāgatameva bhadre ramasva prītyā nayanābhirāmam

te rūpamiṣṭamamalamiṃdrasyāpi mahātmanaḥ /
yadeṣṭaṃ te tadā brūhi samāneṣye na saṃśayaḥ

sūta uvāca-
vadaṃtyau te striyau dṛṣṭvā śrutvovāca subhāṣitam /
ratiṃ pratigṛhītvā me gato bharttā mahāmatiḥ

yatra me tiṣṭhate bharttā tatrāhaṃ patisaṃyutā /
tatra kāmaśca me prītirayaṃ kāyo nirāśrayaḥ

dve apyuktaṃ samākarṇya ratiprītī vilajjite /
vrīḍamāne gate te dve yatra kāmo mahābalaḥ

ūcatustaṃ mahāvīramiṃdrakāya samāśritam /
cāpamākarṣamāṇaṃ taṃ netralakṣyaṃ mahābalam

durjayeyaṃ mahāprājña tyaja pauruṣamātmanaḥ /
patikāmā mahābhāgā pativratā sadaiva sā

kāma uvāca-
anayā lokyate rūpamiṃdrasyāsya mahātmanaḥ /
yadi devi tadā cāhaṃ haniṣyāmi na saṃśayaḥ

atha veṣadharo devo mahārūpaḥ surādhipaḥ /
sa tayānugatastūrṇaṃ parayā līlayā tadā

sarvabhogasamākīrṇaḥ sarvābharaṇaśobhitaḥ /
divyamālyāṃbaradharo divyagaṃdhānulepanaḥ

tayā ratyā samāyāto yatrāste patidevatā /
pratyuvāca mahābhāgāṃ sukalāṃ satyacāriṇīm

pūrvaṃ dūtī samakṣaṃ te prītyā ca prahitā mayā /
kasmānna manyase bhadre bhajaṃtaṃ tvāmihāgatam

sukalovāca-
rakṣāyuktāsmi bhadraṃ te bhartuḥ putrairmahātmabhiḥ /
ekākinīsahāyaiśca naiva kasya bhayaṃ mama

śūraiśca puruṣākāraiḥ sarvatra parirakṣitā /
nāti prastāvaye vaktuṃ vyagrā karmaṇi tasya ca

yāvatprasyaṃdate netraṃ tāvatkālaṃ mahāmate /
bhavānna lajjate kasmādramamāṇo mayā saha

bhavānko hi samāyāto nirbhayo maraṇādapi /
iṃdra uvāca-
tvāmevaṃ hi prapaśyāmi vanamadhye samāgatām

samākhyātāstvayā śūrā bhartuśca tanayāḥ punaḥ /
kathaṃ paśyāmyahaṃ tāvaddarśayasva mamāgrataḥ

sukalovāca-
sanijasakalavargasyādhipatye niveśya dhṛtimatigatibuddhykhyaistu saṃnyasya satyam /
acalasakaladharmo nityayukto mahātmā madanasabaladharmātmā sadāmāṃ jugopa

māmevaṃ parirakṣate damaguṇaiḥ śaucaistu dharmaḥ sadā satyaṃ paśya samāgataṃ mama puraḥ śāṃtikṣamābhyāṃyutam /
bodhaścātimahābalaḥ pṛthuyaśā yo māṃ na muṃcetkadā baddhāhaṃ dṛḍhabaṃdhanaiḥ svaguṇajaiḥ sāṃnidhyamevaṃ gataḥ

rakṣāyuktāḥ kṛtāḥ sarve satyādyā mama sāṃpratam /
dharmalābhādikāḥ sarve damabuddhiparākramāḥ

māmevaṃ hi prarakṣaṃti kiṃ māṃ prārthayase balāt /
ko bhavānnirbhayo bhūtvā dūtyā sārdhaṃ samāgataḥ

satyaṃ dharmastathā puṇyaṃ jñānādyāḥ prabalāstathā /
mama bhartuḥ sahāyāśca te māṃ rakṣaṃti veśmani

ahaṃ rakṣāyutā nityaṃ damaśāṃtiparāyaṇā /
na māṃ jetuṃ samarthaśca api sākṣācchacīpatiḥ

yadi vā manmatho vāpi samāgacchati vīryavān /
daṃśitāhaṃ sadā satyaṃ satyakenaiva nānyathā

nirarthakāstasya bāṇā bhaviṣyaṃti na saṃśayaḥ /
tvāmevaṃ hi haniṣyaṃti dharmādayo mahābhaṭāḥ

dūraṃ gaccha palāyatvamatra mā tiṣṭha sāṃpratam /
vāryamāṇo yadā tiṣṭherbhasmībhūto bhaviṣyasi

bhartrā vinā nirīkṣeta mama rūpaṃ yadā bhavān /
yathā dāru dahedagnistathā dhakṣyāmi nānyathā

evaṃ śrutvā sahasrākṣo manmathasyāpi sammukham /
paśya pauruṣametasyā yudhyasva nijapauruṣaiḥ

yathāgatāstathā sarve mahāśāpabhayāturāḥ /
svaṃsvaṃ sthānaṃ mahārāja iṃdrādyāḥ prayayustadā

gateṣu teṣu sarveṣu sukalā sā pativratā /
svagṛhaṃ puṇyasaṃyuktā patidhyānena cāgatā

svagṛhaṃ puṇyasaṃyuktaṃ sarvatīrthamayaṃ tadā /
sarvayajñamayaṃ rājansaṃprāptā patidevatā

iti śrīpadmapurāṇe bhūmikhaṃḍe venopākhyāne sukalācaritreṣṭapaṃcāśattamo'dhyāyaḥ