Padma Purana · Chapter 2.118

kapiṃjala uvāca-
gaṃgāmukhe purā tāta rodamānā varāṃganā /
netrābhyāmaśrubiṃdūni pataṃti ca mahājale

gaṃgāmadhye nimajjaṃti bhavaṃti kamalāni ca /
puṣpāṇi divyarūpāṇi saugaṃdhāni mahāṃti ca

tasyāstāta sunetrābhyāṃ kimarthaṃ prapataṃti ca /
gaṃgodake mahābhāga nirmalā aśrubiṃdavaḥ

asthicarmāvaśeṣastu jaṭācīradharaḥ punaḥ /
tāni saugaṃdhayuktāni padmāni vicinoti saḥ

hemavarṇāni divyāni nītvā śivaṃ samarcayet /
sā kā nārī samācakṣva sa vā ko hi mahāmate

arcayitvā śivaṃ sotha kasmātpaścātpradevati /
etanme sarvamācakṣva yadyahaṃ vallabhastava

kuṃjala uvāca-
śṛṇu vatsa pravakṣyāmi vṛttāṃtaṃ devanirmitam /
caritraṃ sarvapāpaghnaṃ viṣṇoścaiva mahātmanaḥ

yosau huṃḍo mahāvīryo nahuṣeṇa hato raṇe /
tasya putrastu vikhyāto vihuṃḍastapa āsthitaḥ

nihataṃ pitaraṃ śrutvā sāmātyaṃ saparicchadam /
āyuputreṇa vīreṇa nahuṣeṇa balīyasā

tapastapati sakrodhāddevānhaṃtuṃ samudyataḥ /
pauruṣaṃ tasya duṣṭasya tapasā varddhitasya ca

jānaṃti devatāḥ sarvā duḥsahaṃ samarāṃgaṇe /
huṃḍātmajo vihuṃḍastu trailokyaṃ haṃtumudyataḥ

piturvairaṃ kariṣyāmi haniṣye mānavānsurān /
evaṃ samudyataḥ pāpī devabrāhmaṇakaṃṭakaḥ

upadravaṃ samārebhe prajāḥ pīḍayate ca saḥ /
tasyaiva tejasā dagdhā devāśceṃdrapurogamāḥ

śaraṇaṃ devadevasya jagmurviṣṇormahātmanaḥ /
devadevaṃ jagannāthaṃ śaṃkhacakragadādharam

ūcuśca pāhi no nityaṃ vihuṃḍasya mahābhayāt /
śrīviṣṇuruvāca-
varddhaṃtu devatāḥ sarvāḥ susukhena maheśvarāḥ

vihuṃḍaṃ nāśayiṣyāmi pāpiṣṭhaṃ devakaṃṭakam /
evamābhāṣya tāndevānmāyāṃ kṛtvā janārdanaḥ

svayamevasthitastatra naṃdane sumahāyaśāḥ /
māyāmayaṃ cakārātha strīrūpaṃ ca guṇānvitam

viṣṇumāyā mahābhāgā sarvaviśvapramohinī /
cakāra rūpamatulaṃ viṣṇormāyāpramohinī

vihuṃḍasya vadhārthāya rūpalāvaṇyaśālinī /
kuṃjala uvāca-
sa devānāṃ vadhārthāya divyamārgaṃ jagāma ha

naṃdanāṃte tato māyāmapaśyadditijeśvaraḥ /
tayā vimohito daityaḥ kāmabāṇakṛtāṃtaraḥ

ātmanāśaṃ na jānāti kālarūpāṃ varastriyam /
tāṃ dṛṣṭvā navahemābhāṃ rūpadraviṇaśālinīm

lubdho vihuṃḍaḥ pāpātmā tāmuvāca varāṃganām /
kāsi kasya varārohe mamacittapramāthini

saṃgamaṃ dehi me bhadre rakṣarakṣa varānane /
saṃgamāttava deveśi yadyadicchasi sāṃpratam

tattaddadmi mahābhāge durlabhaṃ devadānavaiḥ /
māyovāca-
māmeva bhoktumicchā ceddāyaṃ me dehi dānava

saptakoṭimitaiścaiva puṣpaiḥ pūjaya śaṃkaram /
kāmodasaṃbhavairdivyaiḥ saugaṃdhairdevadurlabhaiḥ

teṣāṃ puṣpakṛtāṃ mālāṃ mama kaṃṭhe tu dānava /
āropaya mahābhāga etaddāyaṃ pradehi me

tadāhaṃ supriyā bhāryā bhaviṣyāmi na saṃśayaḥ /
vihuṃḍa uvāca-
evaṃ devi kariṣyāmi varaṃ dadmi prayācitam

vanāni yāni puṇyāni divyāni ditijeśvaraḥ /
babhrāmamanmathāviṣṭo na ca paśyati taṃ drumam

kāmodakākhyaṃ papraccha yatratatra gataḥ svayam /
kāmodākhyadrumo nāsti vadaṃtyevaṃ mahājanāḥ

pṛcchamānaḥ sa duṣṭātmā kāmabāṇaiḥ prapīḍitaḥ /
papraccha bhārgavaṃ gatvā bhaktyā namita kaṃdharaḥ

kāmodakaṃ drumaṃ brūhi kāṃtaṃ puṣpasamanvitam /
śukra uvāca-
kāmodaḥ pādapo nāsti yoṣidevāsti dānava

yadā sā hasate caiva prasaṃgena praharṣitā /
taddhāsājjajñire daitya sugaṃdhīni varāṇyapi

sumānyetāni divyāni kāmodāyā na saṃśayaḥ /
hṛdyāni pītapuṣpāṇi saurabheṇa yutāni ca

tenāpyekena puṣpeṇa yaḥ samarcati śaṃkaram /
tasyepsitaṃ mahākāmaṃ saṃpūrayati śaṃkaraḥ

asyāśca rodanāddaitya prabhavaṃti na saṃśayaḥ /
tādṛśānyeva puṣpāṇi lohitāni mahāṃti ca

saurabheṇa vinā daitya teṣāṃ sparśaṃ na kārayet /
evamākarṇitaṃ tena vākyaṃ śukrasya bhāṣitam

uvāca sā tu kutrāsti kāmodā bhṛgunaṃdana /
śukra uvāca-
gaṃgādvāre mahāpuṇye mahāpātakanāśane

kāmodākhyaṃ puraṃ tatra nirmitaṃ viśvakarmaṇā /
kāmodapattane nārī divyabhogairalaṃkṛtā

tathā cābharaṇairbhāti sarvadevaiḥ supūjitā /
tvayā tatraiva gaṃtavyaṃ pūjitavyā varāpsarāḥ

upāyenāpi puṇyena tāṃ prahāsaya dānava /
evamuktvā tu yogīṃdra saḥ śukro dānavaṃ prati

virarāma mahātejāḥ svakāryāyodyato'bhavat

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre kāmodākhyāne'ṣṭādaśādhikaśatatamo'dhyāyaḥ