Padma Purana · Chapter 2.119

ekonaviṃśatyadhikaśatatamo'dhyāyaḥ /
kapiṃjala uvāca-
yasyāḥ prahasanāttāta suhṛdyāni bhavaṃti vai /
puṣpāṇi divyagaṃdhīni durlabhāni surāsuraiḥ

kasmāttu devatāḥ sarvāḥ pravāṃchaṃti mahāmate /
śaṃkaraḥ sukhamāyāti hāsyapuṣpaiḥ supūjitaḥ

ko guṇastasya puṣpasya tanme kathaya vistarāt /
kāmodā sā bhavetkā tu kasya putrī varāṃganā

hāsyāttasyā mahābhāga supuṣpāṇi bhavaṃti ca /
ko guṇastatkathāṃ brūhi sakalāṃ vistareṇa ca

kuṃjala uvāca-
purā devairmahādaityaiḥ kṛtvā sauhārdamuttamam /
mamaṃthuḥ sāgaraṃ kṣīramamṛtārthaṃ samudyatāḥ

mathanāddevadaityānāṃ kanyāratnacatuṣṭayam /
varuṇena darśitaṃ pūrvaṃ somenaiva tathā punaḥ

paścātsaṃdarśitaṃ puṇyamamṛtaṃ kalaśe sthitam /
kanyā catuṣṭayaṃ pūrvaṃ devānāṃ hitamicchati

sulakṣmīrnāma sā caikā dvitīyā vāruṇī tathā /
jyeṣṭhā nāma tathā khyātā kāmodānyā pracakṣate

tāsāṃ madhye varā śreṣṭhā pūrvaṃ jātā mahāmate /
tasmājjyeṣṭheti vikhyātā loke pūjyā sadaiva hi

vāruṇīpānarūpā ca payaḥphenasamudbhavā /
amṛtasya taraṃgācca kāmodākhyā babhūva ha

somo rājā tathā lakṣmīrjajñāte amṛtādapi /
trailokyabhūṣaṇaḥ somaḥ saṃjātaḥ śaṃkarapriyaḥ

mṛtyurogaharā jātā surāṇāṃ vāruṇī tathā /
jyeṣṭhāsu puṇyadā jātā lokānāṃ hitamicchatām

amṛtādutthitā devī kāmodā nāma puṇyadā /
viṣṇoḥ prītyai bhaviṣye tu vṛkṣarūpaṃ prayāsyati

viṣṇuprītikarī sā tu bhaviṣyati sadaiva hi /
tulasī nāma sā puṇyā bhaviṣyati na saṃśayaḥ

tayā saha jagannātho ramiṣyati na saṃśayaḥ /
tulasyāḥ patramekaṃ yo nītvā kṛṣṇāya dāsyati

mene tasyopakārāṇāṃ kimasmai ca dadāmyaham /
ityevaṃ ciṃtayennityaṃ tasya prītikaro bhavet

evaṃ kāmoda nāmāsau pūrvaṃ jātā samudrajā /
yadā sā hasate devī harṣagadgadabhāṣiṇī

sauhṛdyāni sugaṃdhīni mukhāttasyāḥ pataṃti vai /
amlānāni supuṣpāṇi yo gṛhṇāti samudyataḥ

pūjayecchaṃkaraṃ devaṃ brahmāṇaṃ mādhavaṃ tathā /
tasya devāḥ pratuṣyaṃti yadicchati dadaṃti tat

rodityeṣā yadā sā ca kena duḥkhena duḥkhitā /
netrāśrubhyo hi tasyāstu prabhavaṃti pataṃti ca

tāni caiva mahābhāga hṛdyāni sumahāṃti ca /
saurabheṇa vinā taistu yaḥ pūjayati śaṃkaram

tasya duḥkhaṃ ca saṃtāpo jāyate nātra saṃśayaḥ /
puṣpaistu tādṛśairdevānsakṛdarcati pāpadhīḥ

tasya duḥkhaṃ prakurvaṃti devāstatra na saṃśayaḥ /
etatte sarvamākhyātaṃ kāmodākhyānamuttamam

atha kṛṣṇo viciṃtyaiva dṛṣṭvā vikramasāhasam /
vihuṃḍasyāpi pāpasya udyamaṃ sāhasaṃ tadā

nāradaṃ preṣayāmāsa mohayainaṃ durāsadam /
nāradastvatha saṃśrutya vākyaṃ viṣṇormahātmanaḥ

gacchamānaṃ durātmānaṃ kāmodāṃ prati dānavam /
gatvā tamāha daityeṃdraṃ nāradaḥ prahasanniva

kva yāsi tvaṃ ca daityeṃdra satvaraṃ ca samāturaḥ /
sāṃprataṃ kena kāryeṇa kasyārthaṃ kena noditaḥ

brahmātmajaṃ namaskṛtya pratyuvāca kṛtāṃjali /
kāmodapuṣpārthamahaṃ prasthito dvijasattama

tamuvāca sa dharmātmā puṣpaiḥ kiṃ te prayojanam /
vipravaryaṃ punaḥ prāha kāryakāraṇamātmanaḥ

naṃdanasya vanoddeśe kācinnārī varānanā /
tasyā darśanamātreṇa gato'haṃ kāmavaśyatām

tayā prokto'smi vipreṃdra puṣpaiḥ kāmodasaṃbhavaiḥ /
pūjayasva mahādevaṃ puṣpaistu saptakoṭibhiḥ

tataste supriyā bhāryā bhaviṣyāmi na saṃśayaḥ /
tadarthe prasthito'smyadya kāmodākhyaṃ puraṃ prati

tāmahaṃ kāmayiṣyāmi siṃdhujāṃ śuṇu sāṃpratam /
manollāsairmahāhāsairhāsayiṣyāmyahaṃ punaḥ

prītā satī mahābhāgā hasiṣyati punaḥ punaḥ /
taddhāsyaṃ gadgadaṃ vipra mama kāryapravarddhanam

tasmāddhāsyātpatiṣyaṃti divyāni kusumāni ca /
taistu devamumākāṃtaṃ pūjayiṣyāmi sāṃpratam

tena pūjāpradānena tuṣṭo dāsyati me phalam /
īśvaraḥ sarvabhūteśaḥ śaṃkaro lokabhāvanaḥ

nārada uvāca-
tatra daitya na gaṃtavyaṃ kāmodākhye purottame /
viṣṇurasti sumedhāvī sarvadaityakṣayāvahaḥ

yenopāyena puṣpāṇi kāmodākhyāni dānava /
tava haste prayāsyaṃti tamupāyaṃ vadāmyaham

gaṃgātoyeṣu divyāni patiṣyaṃti na saṃśayaḥ /
vāhitāni jalairdivyairāgamiṣyaṃti sāṃpratam

tāni tvaṃ tu pratigṛhāṇa suhṛdyāni mahāṃti ca /
gṛhītvā tāni puṣpāṇi sādhayasva manīpsitam

nārado dānavaśreṣṭhaṃ mohayitvā tataḥ punaḥ /
tataśca sa tu dharmātmā ciṃtayāmāsa vai punaḥ

kathamaśrūṇi sā muṃcetkenopāyena duḥkhitā /
ciṃtayānasya tasyaivaṃ kṣaṇaṃ vai nāradasya ca

tato buddhiḥ samutpannā kāmodākhyaṃ puraṃ gataḥ

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre kāmodākhyāne ekonaviṃśatyadhikaśatatamo'dhyāyaḥ