Padma Purana · Chapter 2.117

kuṃjala uvāca-
nahuṣaḥ priyayā sārddhaṃ tayā caiva saraṃbhayā /
aiṃdreṇāpi sa divyena syaṃdanena vareṇa ca

nāgāhvayaṃ puraṃ prāptaḥ sarvaśobhāsamanvitam /
divyairmaṃgalakairyuktaṃ bhavanairupaśobhitam

hematoraṇasaṃyuktaṃ patākābhiralaṃkṛtam /
nānāvāditranādaiśca baṃdicāraṇaśobhitam

devarūpopamaiḥ puṇyaiḥ puruṣaiḥ samalaṃkṛtam /
nārībhirdivyarūpābhirgajāśvaiḥ syaṃdanaistathā

nānāmaṃgalaśabdaiśca vedadhvanisamākulam /
gītavāditraśabdaiśca vīṇāveṇusvanaistataḥ

sarvaśobhāsamākīrṇaṃ viveśa sa purottamam /
vedamaṃgalaghoṣaiśca brāhmaṇaiścaiva pūjitaḥ

dadṛśe pitaraṃ vīro mātaraṃ ca supuṇyakām /
harṣeṇa mahatāviṣṭaḥ pituḥ pādau nanāma saḥ

aśokasuṃdarī sā tu tayoḥ pādau punaḥ punaḥ /
nanāma bhaktyā bhāvena ubhayoḥ sā varānanā

raṃbhā ca sā nanāmātha prītiṃ caivāpyadarśayat /
namaskṛtvā samābhāṣya svaguruṃ nṛpanaṃdanaḥ

anāmayaṃ ca papraccha mātaraṃ pitaraṃ prati /
evamukto mahābhāgaḥ sānaṃdapulakodgamaḥ

āyuruvāca-
adyaiva vyādhayo naṣṭā duḥkhaśokāvubhau gatau /
bhavato darśanātputra sutuṣṭyā hṛṣyate jagat

kṛtakṛtyosmi saṃjātastvayi jāte mahaujasi /
svavaṃśoddharaṇaṃ kṛtvā ahameva samuddhṛtaḥ

iṃdumatyuvāca-
parvaṇi prāpya iṃdostu tejo dṛṣṭvā mahodadhiḥ /
vṛddhiṃ yāti mahābhāga tathāhaṃ tava darśanāt

varddhitāsmi suhṛṣṭāsmi ānaṃdena samākulā /
darśanātte mahāprājña dhanyā jātāsmi mānada

evaṃ saṃbhāṣya taṃ putramāliṃgya tanayottamam /
śiraścāghrāya tasyāpi vatsaṃ dhenuryathā svakam

abhinaṃdya sutaṃ prāptaṃ nahuṣaṃ devarūpiṇam /
āśīrbhiścārcayaddevī puṇyā iṃdumatī tadā

sūta uvāca-
athāsau mātaraṃ puṇyāṃ devīmiṃdumatīṃ sutaḥ /
kathayāmāsa vṛttāṃtaṃ yathāharaṇamātmanaḥ

svabhāryāyāstathotpattiṃ prāptiṃ caiva mahāyaśāḥ /
huṃḍenāpi yathā yuddhaṃ huṃḍasyāpi nipātanam

samāsena samastaṃ tadākhyātaṃ svayameva hi /
mātāpitroryathā vṛttaṃ tayorānaṃdadāyakam

mātāpitarāvākarṇya putrasya vikramodyamam /
harṣeṇa mahatāviṣṭau saṃjātau pūrṇamānasau

nahuṣo dhanurādāya iṃdrasya syaṃdanena vai /
jigāya pṛthivīṃ sarvāṃ saptadvīpāṃ sapattanām

pitre samarpayāmāsa vasupūrṇāṃ vasuṃdharām /
pitaraṃ harṣayannityaṃ dānadharmaiḥ sukarmabhiḥ

pitaraṃ yājayāmāsa rājasūyādibhistadā /
mahāyajñaiśca dānaiśca vratairniyamasaṃyamaiḥ

sudānairyaśasā puṇyairyajñaiḥ puṇyamahodayaiḥ /
susaṃpūrṇau kṛtau tau tu pitarau cāyusūnunā

atha devāḥ samāgatya nāgāhvayaṃ purottamam /
abhyaṣiṃcanmahātmānaṃ nahuṣaṃ vīramardanam

munibhiśca susiddhaiśca āyunā tena bhūbhujā /
abhiṣiṃcya svarājye taṃ sametaṃ śivakanyayā

bhāryāyuktaḥ svakāyena āyu rājā mahāyaśāḥ /
divaṃ jagāma dharmātmā devaiḥ siddhaiḥ supūjitaḥ

aiṃdraṃ padaṃ parityajya brahmalokaṃ gataḥ punaḥ /
haralokaṃ jagāmātha munibhirdevapūjitaḥ

svakarmabhirmahārājaḥ putrasyāpi sutejasā /
harerlokaṃ gataḥ puṇyairnivasatyeṣa bhūpatiḥ

puruṣaiḥ puṇyakarmākhyairīdṛśaṃ puṇyamuttamam /
janitavyaṃ mahābhāga kimanyaiḥ śokakārakaiḥ

yathā jātaḥ sa dharmātmā nahuṣaḥ pitṛtārakaḥ /
kulasya dharttā sarvasya nahuṣo jñānapaṃḍitaḥ

etatte sarvamākhyātaṃ caritraṃ tasya bhūpateḥ /
anyatkiṃ te pravakṣyāmi vada putra kapiṃjala

evaṃvidhaṃ puṇyamayaṃ pavitraṃ caritrametadyaśasā sametam /
āyoḥ sutasyāpi śṛṇoti martyo bhogānsa bhuktvaiti padaṃ murāreḥ

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nahuṣākhyāne saptadaśādhikaśatatamo'dhyāyaḥ