Padma Purana · Chapter 2.11

ṛṣaya ūcuḥ-
sarvajñena tvayā proktaṃ daityadānavasaṃgaram /
idānīṃ śrotumicchāmaḥ suvratasya mahātmanaḥ

kasya putro mahāprājñaḥ kasya gotrasamudbhavaḥ /
kiṃ tapastasya viprasya kathamārādhito hariḥ

sūta uvāca-
kathā prajñāprabhāveṇa pūrvameva yathā śrutā /
tathā viprāḥ pravakṣyāmi suvratasya mahātmanaḥ

caritaṃ pāvanaṃ divyaṃ vaiṣṇavaṃ śreyaāvaham /
bhavatāmagrataḥ sarvaṃ viṣṇoścaiva prasādataḥ

pūrvakalpe mahābhāgāḥ sukṣetre pāpanāśane /
revātīre supuṇye ca tīrthe vāmanasaṃjñake

kauśikasya kule jātaḥ somaśarmā dvijottamaḥ /
sa tu putravihīnastu bahuduḥkhasamanvitaḥ

dāridreṇa sa duḥkhena sarvadaivaprapīḍitaḥ /
putropāyaṃ dhanasyāpi divārātrau praciṃtayet

ekadā tu priyā tasya sumanā nāma suvratā /
bhartāraṃ ciṃtayopetamadhomukhamalakṣayat

samālokya tadā kāṃtaṃ tamuvāca tapasvinī /
duḥkhajālairasaṃkhyaistu tava cittaṃ pradharṣitam

vyāmohena pramūḍhosi tyaja ciṃtāṃ mahāmate /
mama duḥkhaṃ samācakṣva svastho bhava sukhaṃ vraja

nāsti ciṃtāsamaṃ duḥkhaṃ kāyaśoṣaṇameva hi /
yaściṃtāṃ tyajya varteta sa sukhena pramodate

ciṃtāyāḥ kāraṇaṃ vipra kathayasva mamāgrataḥ /
priyāvākyaṃ samākarṇya somaśarmābravītpriyām

somaśarmovāca-/
icchayā ciṃtitaṃ bhadre ciṃtā duḥkhasya kāraṇam /
tatsarvaṃ tu pravakṣyāmi śrutvā caivāvadhāryatām

na jāne kena pāpena dhanahīnosmi suvrate /
tathā putravihīnaśca etadduḥkhasya kāraṇam

sumanovāca-
śrūyatāmabhidhāsyāmi sarvasaṃdehanāśanam /
svarūpamupadeśasya sarvavijñānadarśanam

lobhaḥ pāpasya bījaṃ hi moho mūlaṃ ca tasya hi /
asatyaṃ tasya vai skaṃdho māyā śākhā suvistarā

daṃbhakauṭilyapatrāṇi kubuddhyā puṣpitaḥ sadā /
anṛtaṃ tasya saugaṃdhaṃ phalamajñānameva ca

chadmapākhaṃḍaśauryerṣyāḥ krūrāḥ kūṭāśca pāpinaḥ /
pakṣiṇo mohavṛkṣasya māyāśākhā samāśritāḥ

ajñānaṃ suphalaṃ tasya raso'dharmaḥ phalasya hi /
tṛṣṇodakena saṃvṛddhā'śraddhā tasya dravaḥ priya

adharmaḥ surasastasya utkaṭo madhurāyate /
yādṛśaiśca phalaiścaiva suphalo lobhapādapaḥ

asyacchāyāṃ samāśritya yo naraḥ parituṣyate /
phalāni tasya cāśnāti supakvāni dinedine

phalānāṃ tu rasenāpi adharmeṇa tu pālitaḥ /
sa saṃtuṣṭo bhavenmartyaḥ patanāyābhigacchati

tasmācciṃtāṃ parityajya pumām̐llobhaṃ na kārayet /
dhanaputrakalatrāṇāṃ ciṃtāmekāṃ na kārayet

yo hi vidvānbhavetkāṃta mūrkhāṇāṃ pathameti hi /
mūrkhaściṃtayate nityaṃ kathamarthaṃ mamaiva hi

subhāryāmiha viṃdāmi kathaṃ putrānahaṃ labhe /
evaṃ ciṃtayate nityaṃ divārātrau vimohitaḥ

kṣaṇamekaṃ prapaśyeta ciṃtāmadhye mahatsukham /
punaścaitanyamāyāti mahāduḥkhena pīḍyate

ciṃtāmohau parityajya anuvartasva ca dvija /
saṃsāre nāsti saṃbaṃdhaḥ kena sārdhaṃ mahāmate

mitrāśca bāṃdhavāḥ putrāḥ pitṛmātṛsabhṛtyakāḥ /
saṃbaṃdhino bhavaṃtyeva kalatrāṇi tathaiva ca

somaśarmovāca-
saṃbaṃdhaḥ kīdṛśo bhadre tathā vistarato vada /
yena saṃbaṃdhinaḥ sarve dhanaputrādibāṃdhavāḥ

sumanovāca-
ṛṇasaṃbaṃdhinaḥ kecitkecinnyāsāpahārakāḥ /
lābhapradā bhavaṃtyeke udāsīnāstathāpare

bhedaiścaturbhirjāyaṃte putramitrastriyastathā /
bhāryā pitā ca mātā ca bhṛtyāḥ svajanabāṃdhavāḥ

svenasvena hi jāyaṃte saṃbaṃdhena mahītale /
nyāsāpahārabhāvena yasya yena kṛtaṃ bhuvi

nyāsasvāmī bhavetputro guṇavānrūpavānbhuvi /
yenaivāpahrataṃ nyāsaṃ tasya gehe na saṃśayaḥ

nyāsāpaharaṇādduḥkhaṃ sa datvā dāruṇaṃ gataḥ /
nyāsasvāmī suputrobhūnnyāsāpahārakasya ca

guṇavānrūpavāṃścaiva sarvalakṣaṇasaṃyutaḥ /
bhaktiṃ tu darśayaṃstasya putro bhūtvā dinedine

priyavāṅmadhuro rogī bahusnehaṃ vidarśayan /
svīyaṃ dravyaṃ samudgṛhya prītimutpādya cottamām

yathā yena pradattaṃ syānnyāsasya haraṇātpurā /
duḥkhameva mahābhāga dāruṇaṃ prāṇanāśanam

tādṛśaṃ tasya sauhṛdyātputro bhūtvā mahāguṇaiḥ /
alpāyuṣastathā bhūtvā maraṇaṃ copagacchati

duḥkhaṃ datvā prayātyevaṃ bhūtvābhūtvā punaḥpunaḥ /
yadā hā putraputreti pralāpaṃ hi karoti saḥ

tadā hāsyaṃ karotyeva kasya putro hi kaḥ pitā /
anenāpahṛtaṃ nyāsaṃ madīyasyopakāraṇam

dravyāpaharaṇenāpi na me prāṇā gatāḥ kila /
duḥkhena mahatā caiva asahyena ca vai purā

tathā duḥkhaṃ pradatvāhaṃ dravyamudgṛhya cottamam /
gaṃtāsmi subhṛśaṃ cādya kasyāhaṃ suta īdṛśaḥ

na caiṣa me pitā putraḥ pūrvameva na kasyacit /
piśācatvaṃ mayā dattamasyaiveti durātmanaḥ

evamuktvā prayātyevaṃ taṃ prahasya punaḥpunaḥ /
prayātyanena mārgeṇa duḥkhaṃ datvā sudāruṇam

evaṃ nyāsaṃ samuddhartuḥ putrāḥ kāṃta bhavaṃti vai /
saṃsāre duḥkhabahulā dṛśyaṃte yatratatra ca

ṛṇasaṃbaṃdhinaḥ putrānpravakṣyāmi tavāgrataḥ

iti śrīpadmapurāṇe bhūmikhaṃḍe suvratopākhyāne ekādaśo'dhyāyaḥ