Padma Purana · Chapter 2.10

ṛṣaya ūcuḥ-
tataste dānavāḥ sarve hiraṇyakaśipūttarāḥ /
yuddhādbhagnāstu kiṃ kuryurvyavasāyaṃ mahāmate

vistareṇāpi no brūhi teṣāṃ vṛttamanuttamam /
śrotumicchāmahe sarve tvatto vai sāṃprataṃ dvija

sūta uvāca-
bhagnā raṇāttu te sarve balahīnāstu vai tadā /
gatadarpāḥ suduḥkhārtā daityāste pitaraṃ gatāḥ

bhaktyā praṇamya te sarve samūcuḥ kaśyapaṃ tadā /
dānavā ūcuḥ-
bhavadvīryātsamutpattirasmākaṃ dvijasattama

devatānāṃ mahābhāga dānavānāṃ tathaiva ca /
vayaṃ ca dānavāḥ sarve balavīryaparākramāḥ

upāyajñāḥ sudhīrāśca udyamena samanvitāḥ /
vayaṃ tu bahavastāta devāstvalpāstathaiva ca

kathaṃ jayaṃti te sarve vayaṃ bhagnā mahāhavāt /
tatkiṃ vai kāraṇaṃ tāta balatejaḥ samanvitāḥ

mattanāgasahasrāṇāmekaikasya mahāmate /
balamasti ca daityasya nāsti deveṣu tādṛśam

jayaśca dṛśyate tāta deveṣveva mahāhave /
tatsarvaṃ kathayasvaiva saṃśayaṃchettumarhasi

kaśyapa uvāca-
śṛṇudhvaṃ putrakāḥ sarve jayasyāpi ca kāraṇam /
yasmāddhi devatāḥ sarve samare jayino'bhavan

vīryanirvāpakastāto mātākṣetramidaṃ sadā /
dhāraṇe pālane caiva poṣaṇe ca yathaiva hi

kiṃ kuryādviṣamārthe tu pitā putre ca vai tathā /
atra pradhānaṃ karmaiva māmevaṃ buddhirāśritā

dvaividhyaṃ karmasaṃbaṃdhaṃ pāpapuṇyasamudbhavam /
satyameva samāśritya kriyate dharma uttamaḥ

tapodhyānasamāyuktaṃ tāraṇāya hi taṃ sutāḥ /
patanāya pātakaṃ proktaṃ sarvadaiva na saṃśayaḥ

balena parivāreṇa ābhijātyena putrakāḥ /
puṇyahīnasya puṃso vai tadbalaṃ vikalāyate

unnatā giridurgeṣu vṛkṣāḥ saṃti suputrakāḥ /
pataṃti vātavegena samūlāstu ghanāstathā

satyadharmavihīnāste tathāyāṃti yamakṣayam /
sādhāraṇaḥ prāṇināṃ ca dharma eṣa suputrakāḥ

yena saṃtarate jaṃturiha caiva paratra ca /
tadyuṣmābhiḥ parityaktaṃ satyaṃ dharmasamanvitam

adharmamāsthitaṃ putrā yuṣmābhiḥ satyavarjitaiḥ /
satyadharmatapobhraṣṭāḥ patitā duḥkhasāgare

devāśca satyasaṃpannāḥ śreyasā ca samanvitāḥ /
tapaḥ śāṃtidamopetāḥ supuṇyā pāpavarjitāḥ

yatra satyaṃ ca dharmaśca tapaḥ puṇyaṃ tathaiva ca /
yatra viṣṇurhṛṣīkeśo jayastatra pradṛśyate

teṣāṃ sahāyaḥ saṃbhūto vāsudevaḥ sanātanaḥ /
tasmājjayaṃti te devāḥ satyadharmasamanvitāḥ

sahāyena balenaiva pauruṣeṇa tathaiva ca /
bhavaṃtaḥ kila vai putrāstapaḥ satyavivarjitāḥ

yasya viṣṇuḥ sahāyaśca tapaścaiva balaṃ tathā /
tasyaiva ca jayo dṛṣṭa iti dharmavido viduḥ

yūyaṃ dharmavihīnāstu tapaḥ satyavivarjitāḥ /
aiṃdraṃ padaṃ balenaiva prāptavaṃtaśca pūrvataḥ

tapo vinā mahāprājñā dharmeṇa yaśasā vinā /
baladarpaguṇaiḥ putrā na prāpyamaindrakaṃ padam

prāpyāpyaiṃdraṃ padaṃ putrāstato bhraṣṭā bhavaṃti hi /
tasmādyūyaṃ prakurvaṃtu tapaḥ putrāḥ samanvitāḥ

avirodhena saṃyuktā jñānadhyānasamanvitāḥ /
vairaṃ caiva na kartavyaṃ keśavena samaṃ kadā

evaṃvidhā yadā putrā yūyaṃ dhanyā bhaviṣyatha /
parāṃ siddhiṃ tadā sarve prayāsyatha na saṃśayaḥ

evaṃ saṃbhāṣitāste tu kaśyapena mahātmanā /
samākarṇya piturvākyaṃ dānavāste mahaujasaḥ

praṇamya kaśyapaṃ bhaktyā samutthāya tvarānvitāḥ /
sumaṃtraṃ cakrire daityāḥ parasparasamāhitāḥ

hiraṇyakaśipū rājā tānuvācātha dānavān /
tapaścaiva kariṣyāmo duṣkaraṃ sarvadāyakam

hiraṇyākṣastadovāca kariṣye dāruṇaṃ tapaḥ /
tato balena trailokyaṃ grahīṣye nātra saṃśayaḥ

raṇe nirjitya goviṃdaṃ tamimaṃ pāpacetasam /
vyāpādya devatāḥ sarvāḥ padamaiṃdraṃ vrajāmyaham

baliruvāca-
evaṃ na yujyate kartuṃ yuṣmābhirditijeśvarāḥ /
viṣṇunā saha yadvairaṃ tadvairaṃ nāśakāraṇam

dānadharmaistathā puṇyaistapobhiryajñayājanaiḥ /
tamārādhya hṛṣīkeśaṃ sukhaṃ gacchaṃti mānavāḥ

hiraṇyakaśipuruvāca-
ahamevaṃ na kariṣye harerārādhanaṃ kadā /
svabhāvaṃ tu parityajya śatrusevā pracaryate

maraṇādadhikaṃ taṃ tu mānayaṃti hi paṃḍitāḥ /
viṣṇoḥ sevā na vai kāryā mayā cānyaiśca dānavaiḥ

tamuvāca mahātmānaṃ baliḥ pitāmahaṃ punaḥ /
dharmaśāstreṣu yaddṛṣṭaṃ munibhistattvavedibhiḥ

rājanītiyutaṃ maṃtraṃ śatroścaiva pradhānataḥ /
hīnamātmānamājñāya ripuṃ taṃ balinaṃ tathā

tasya pārśve pragatvaiva jayakālaṃ pratīkṣayet /
dīpacchāyāṃ samāśritya tamo vasati sarvadā

snehaṃ daśāgataṃ prekṣya dīpasyāpi mahābalam /
prakāśaṃ yāti vegena tamaśca varddhate punaḥ

tathā prasādayecchannaḥ snehaṃ nirdiśya tattvataḥ /
snehaṃ kṛtvāsuraiḥ sārddhaṃ dharmabhāvaiḥ suradviṣaḥ

pūrvamuktaṃ sumaṃtraṃ tu muninā kaśyapena hi /
tena maṃtreṇa rājeṃdra kuru kāryaṃ svamātmavān

tasya tadvacanaṃ śrutvā prāha daityaḥ pratāpavān /
pautra naivaṃ kariṣyehaṃ mānabhaṃgaṃ tathātmanaḥ

anye ca bāṃdhavāḥ sarve tamūcurnayapaṃḍitam /
balinoktaṃ ca yatpuṇyaṃ devatānāṃ priyaṃkaram

śakramānakaraṃ proktaṃ dānavānāṃ bhayaṃkaram /
kariṣyāmo vayaṃ sarve tapa evamanuttamam

tapasā nirjitya devānhariṣyāmaḥ svakaṃ padam /
evamāmaṃtrya te sarve nirākṛtya baliṃ tadā

viṣṇoḥ sārddhaṃ mahāvairaṃ hṛdi kṛtvā mahāsurāḥ /
tapaścakrustataḥ sarve giridurgeṣu sānuṣu

evaṃ te dānavāḥ sarve tyaktarāgāḥ suniścitāḥ /
kāmakrodhavihīnāśca nirāhārā jitaklamāḥ

iti śrīpadmapurāṇe bhūmikhaṃḍe daityatapaścaryāvarṇanaṃnāma daśamo'dhyāyaḥ