Padma Purana · Chapter 2.107

kuṃjala uvāca-
athāsau nāradaḥ svargādāyurājānamāgataḥ /
āgatya kathayāmāsa kasmādrājanpraśocase

putrāpaharaṇaṃ te'dya kṣemaṃ jātaṃ mahāmate /
devādīnāṃ mahārāja evaṃ jñātvā tu mā śucaḥ

sarvajñaḥ saguṇo bhūtvā sarvavijñānasaṃyutaḥ /
sarvakalābhisaṃpūrṇa āgamiṣyati te sutaḥ

yenāpyapahṛtaste'dya bālo devaguṇopamaḥ /
ātmagehe mahārāja kālo nīto na saṃśayaḥ

tasyāpyaṃtaṃ sa vai karttā mahāvīryo mahābalaḥ /
sa tvāmabhyeṣyate bhūpa śivasya sutayā saha

iṃdropeṃdrasamaḥ putro bhaviṣyati svatejasā /
iṃdratvaṃ bhokṣyate so'pi nijaiśca puṇyakarmabhiḥ

evamābhāṣya rājānamāyuṃ devarṣisattamaḥ /
jagāma sahasā tasya paśyataḥ sānugasya ha

gate tasminmahābhāge nārade devasaṃmite /
āyurāgatya tāṃ rājñīṃ tatsarvaṃ vinyavedayat

dattātreyeṇa yo dattaḥ putro devavarottamaḥ /
sa vai rājñi kuśalyāste viṣṇoścaiva prasādataḥ

yenāpyasau hṛtaḥ putraḥ saguṇo me varānane /
śirastasya gṛhītvā tu punarevāgamiṣyati

ityāha nārado bhadre mā kṛthāḥ śokameva ca /
tyaja cainaṃ mahāmohaṃ kāryadharmavināśanam

bharturvākyaṃ niśamyaivaṃ rājñī iṃdumatī tataḥ /
harṣeṇāpi samāviṣṭā putrasyāgamanaṃ prati

yathoktaṃ devaṛṣiṇā tattathaiva bhaviṣyati /
dattātreyeṇa me dattastanapo hyajarāmaraḥ

bhaviṣyati na saṃdehaḥ pratibhātyenameva hi /
ityevaṃ ciṃtayitvā tu nanāma dvijapuṃgavam

namostu tasmai parisiddhidāya atreḥ suputrāya mahātmane ca /
yasya prasādena mayā suputraḥ prāptaḥ sudhīraḥ suguṇaḥ supuṇyaḥ

evamuktvā tu sā devī virarāma suduḥkhitā /
āgamiṣyaṃtamājñāya nahuṣaṃ tanayaṃ punaḥ

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nāhuṣākhyāne saptottaraśatatamo'dhyāyaḥ