પદ્મ પુરાણ · અધ્યાય 2.107

કુંજલ ઉવાચ-
અથાસૌ નારદઃ સ્વર્ગાદાયુરાજાનમાગતઃ ।
આગત્ય કથયામાસ કસ્માદ્રાજન્પ્રશોચસે

પુત્રાપહરણં તેઽદ્ય ક્ષેમં જાતં મહામતે ।
દેવાદીનાં મહારાજ એવં જ્ઞાત્વા તુ મા શુચઃ

સર્વજ્ઞઃ સગુણો ભૂત્વા સર્વવિજ્ઞાનસંયુતઃ ।
સર્વકલાભિસંપૂર્ણ આગમિષ્યતિ તે સુતઃ

યેનાપ્યપહૃતસ્તેઽદ્ય બાલો દેવગુણોપમઃ ।
આત્મગેહે મહારાજ કાલો નીતો ન સંશયઃ

તસ્યાપ્યંતં સ વૈ કર્ત્તા મહાવીર્યો મહાબલઃ ।
સ ત્વામભ્યેષ્યતે ભૂપ શિવસ્ય સુતયા સહ

ઇંદ્રોપેંદ્રસમઃ પુત્રો ભવિષ્યતિ સ્વતેજસા ।
ઇંદ્રત્વં ભોક્ષ્યતે સોઽપિ નિજૈશ્ચ પુણ્યકર્મભિઃ

એવમાભાષ્ય રાજાનમાયું દેવર્ષિસત્તમઃ ।
જગામ સહસા તસ્ય પશ્યતઃ સાનુગસ્ય હ

ગતે તસ્મિન્મહાભાગે નારદે દેવસંમિતે ।
આયુરાગત્ય તાં રાજ્ઞીં તત્સર્વં વિન્યવેદયત્

દત્તાત્રેયેણ યો દત્તઃ પુત્રો દેવવરોત્તમઃ ।
સ વૈ રાજ્ઞિ કુશલ્યાસ્તે વિષ્ણોશ્ચૈવ પ્રસાદતઃ

યેનાપ્યસૌ હૃતઃ પુત્રઃ સગુણો મે વરાનને ।
શિરસ્તસ્ય ગૃહીત્વા તુ પુનરેવાગમિષ્યતિ

ઇત્યાહ નારદો ભદ્રે મા કૃથાઃ શોકમેવ ચ ।
ત્યજ ચૈનં મહામોહં કાર્યધર્મવિનાશનમ્

ભર્તુર્વાક્યં નિશમ્યૈવં રાજ્ઞી ઇંદુમતી તતઃ ।
હર્ષેણાપિ સમાવિષ્ટા પુત્રસ્યાગમનં પ્રતિ

યથોક્તં દેવઋષિણા તત્તથૈવ ભવિષ્યતિ ।
દત્તાત્રેયેણ મે દત્તસ્તનપો હ્યજરામરઃ

ભવિષ્યતિ ન સંદેહઃ પ્રતિભાત્યેનમેવ હિ ।
ઇત્યેવં ચિંતયિત્વા તુ નનામ દ્વિજપુંગવમ્

નમોસ્તુ તસ્મૈ પરિસિદ્ધિદાય અત્રેઃ સુપુત્રાય મહાત્મને ચ ।
યસ્ય પ્રસાદેન મયા સુપુત્રઃ પ્રાપ્તઃ સુધીરઃ સુગુણઃ સુપુણ્યઃ

એવમુક્ત્વા તુ સા દેવી વિરરામ સુદુઃખિતા ।
આગમિષ્યંતમાજ્ઞાય નહુષં તનયં પુનઃ

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે નાહુષાખ્યાને સપ્તોત્તરશતતમોઽધ્યાયઃ