Natya Shastra · Chapter 35

iti bharatīye nāṭyaśāstre guṇadoṣavicāro nāmādhyāyastrayastriṃśaḥ
atha pañcatriṃśo 'dhyāyaḥ
vinyāsaṃ bhūmikānāṃ ca sampravakṣyāmi nāṭake /
yādṛśo yasya kartavyo vinyāso bhūmikāsvatha

gativāgaṅgaceṣṭābhiḥ sattvaśīlasvabhāvataḥ /
parīkṣya pātraṃ tajjñastu yuñjyād bhūminiveśane

tasminnanviṣya hi guṇavān kāryā pātrasamāśrayā /
na khedajananaṃ buddherācāryasya bhaviṣyati

ācāryaḥ pātrajāṃścaiva guṇāñjñātvā svabhāvajān /
tataḥ kuryād yathāyogaṃ nṛṇāṃ bhūminiveśanam

aṅgapratyaṅgasaṃyuktamahīnāṅgaṃ vayonvitam /
na sthūlaṃ na kṛśaṃ caiva na dīrghaṃ na ca mantharam

śliṣṭāṅgaṃ dyutimantaṃ ca susvaraṃ priyadarśanam /
etairguṇaiśca saṃyuktaṃ devabhūmiṣu yojayet

sthūlaṃ prāṃśuṃ bṛhaddehaṃ meghagambhīranisvanam /
raudrasvabhāvanetraṃ ca svabhāvabhrukuṭīmukham

rakṣodānavadaityānāṃ bhūmikāsu prayojayet /
puruṣāṇāṃ prayogastu tathāṅgakriyayānvitaḥ

sunetrasubhruvaḥ svaṅgāḥ sulalāṭāḥ sunāsikāḥ /
svoṣṭhāḥ sugaṇḍāḥ sumukhāḥ sukaṇṭhāḥ suśirodharāḥ

svaṅgapratyaṅgasaṃyuktā na dīrghā na ca mantharāḥ /
na sthūlā na kṛśāścaiva svabhāvena vyavasthitāḥ

suśīlā jñānavantaśca tathā ca priyadarśanāḥ /
kumārarājabhūmau tu saṃyojyāśca narottamāḥ

aṅgairavikalairdhīraṃ sphuṭaṃ vasanakarmaṇi /
na dīrghaṃ naiva ca sthūlamūhāpohavicakṣaṇam

adīnaṃ ca pragalbhaṃ ca pratyutpannaviniścayam /
senāpateramātyānāṃ bhūmikāsu prayojayet

piṅgākṣaṃ ghoṇanāsaṃ ca netramuccamathāpi vā /
kañcukiśrotriyādīnāṃ bhūmikāsu niyojayet

evamanyeṣvapi tathā nāṭyadharmavibhāgataḥ /
deśaveṣānurūpeṇa pātraṃ yojyaṃ svabhūmiṣu

mantharaṃ vāmanaṃ kubjaṃ vikṛtaṃ vikṛtānanam /
viṣṭabdhanetraṃ kāṇākṣaṃ sthūlaṃ cipiṭanāsikam

durjanaṃ dusvabhāvaṃ ca vikṛtācārameva ca /
dāsabhūmau prayuñjīta budho dāsāṅgasambhavam

prakṛtyā'tikṛśaṃ kṣāmaṃ tapaḥśrānteṣu yojayet /
tathā ca puruṣaṃ sthūlamuparodheṣu yojayet

yadi vā nedṛśāḥ santi prakṛtyā puruṣā dvijāḥ /
ācāryabuddhyā yojyāstu bhāvaceṣṭāsvabhāvataḥ

yā yasya sadṛśī ceṣṭā hyuttamādhamamadhyamā /
sa tathā''cāryayogena niyamyā bhāvabhāvinī

ataḥ paraṃ pravakṣyāmi bharatānāṃ vikalpanam /
bharatāśrayāśca bharato vidūṣakaḥ saurikastathā nāndī /
nandī sasūtradhāro nāṭyaraso nāyakaścaiva

mukuṭābharaṇavikalpau vijñeyo mālyavastuvividhaiśca /
kārakakuśīlavādyā vijñeyā nāmataścaiva

dhuryavadeko yasmāduddhāro 'nekabhūmikāyuktaḥ /
bhāṇḍagrahopakaraṇaināṭyaṃ bharato bhavet tasmāt

lokāhṛdāśrayakṛtā sarvaprakṛtipracārasaṃyuktā /
nānāśrayāṃ prakurute tathā ca nārī tu sarvatra

pratyutpannapratibho narmakṛto narmagarbhanirbhedaḥ /
chedavidūṣitavacano vidūṣako nāma vijñeyaḥ

tūryatistu naraḥ sarvātodyapravādane kuśalaḥ /
tūraparigrahayukto vijñeyastauriko nāma

naṭanṛti dhātvartho 'yaṃ bhūtaṃ nāṭayati lokavṛttāntam /
rasabhāvasatvayuktaṃ yasmāt tasmānnaṭo bhavati

stutyabhivādanakṛtairmadhurairvākyaiḥ sumaṅgalācāraiḥ /
sarva stauti hi lokaṃ yasmāt tasmādbhavedvādī

bhāvebhyo bahudhā'smin rasā vadati nāṭyayogeṣu /
prākṛtasaṃskṛtapāṭhyo nandī nāmeti sa jñeyaḥ

gītasya ca vādyasya ca pāṭhyasya ca naikabhāvavihitasya /
śiṣṭopadeśayogāt sūtrajñaḥ sūtradhārastu

yasmāt yathopadiṣṭān rasāṃśca bhāvāṃśca satvasaṃyuktān /
bhūmivikalpairnayati ca nāṭyakaraḥ kīrtitastasmāt

caturātodyavidhānaṃ sarvasya tu śāstrakhe davihitasya /
nāṭyasyāntaṃ gacchati tasmādvai nāyako 'bhihitaḥ

nānāprakṛtisamutthaṃ karoti yaḥ śīrṣakaṃ mukuṭayoge /
vividhairveṣaviśeṣaiḥ sa ca kuṭakārastu vijñeyaḥ

bhāṇḍakavādyajñā yā layatālajñā rasānuviddhā ca /
sarvāṅgasundarī vai kartavyā nāṭakīyā tu

yastvābharaṇaṃ kuryād bahuvidhavihitaṃ sa cābharaṇaḥ /
yaścopakaraṇayogāt sa tena nāmnā'bhidhātavyaḥ

yo vai mālyaṃ kurute paṅcavidhaṃ mālyākṛt sa vijñeyaḥ /
yaścāpi veṣayogaṃ kurute sa ca veṣakārī tu

citrajñaścitrakaro vastrasya rañjānāttathā rajakaḥ /
jatvaśmalohakāṣṭhairdravyakaraiḥ kārukaścaiva

nānātodyavidhāne prayogayuktaḥ pravādane kuśalaḥ /
atodye 'pyatikuśalo yasmāt sa kuśalavo jñeyaḥ

yadyat samāśrayante śilpaṃ vā karma vā prayogaṃ vā /
tanaivopagataguṇā vijñeyā nāmataḥ puruṣāḥ

evaṃ tu nāṭakavidhau jātirnaṭasaṃśrayā budhairjñeyā /
nāṭyopakaraṇayuktā nānāśilpaprasaktā ca

ukto 'tra bhūmikānyāsaḥ prayoktāraśca yogataḥ /
ādiṣṭaṃ nāṭyaśāstraṃ ca munayaḥ kimihocyatām