Natya Shastra · Chapter 36

iti bharatīye nāṭyaśāstre bhūmikāvikalpādhyāyaḥ pañcatriṃśaḥ
atha ṣaṭtriṃśo 'dhyāyaḥ
athātreyo vasiṣṭhaśca pulastyaḥ pulahaḥ kratuḥ /
aṅgirā gautamo 'gastyo manurāyustathātmavān

viśvāmitraḥ sthūlaśirāḥ saṃvartaḥ pramatirdanuḥ /
uśanā bṛhaspatirvyāsaścyavanaḥ kāśyapo dhruvaḥ

durvāsā jāmadagnyaśca mārkaṇḍeyo 'tha gālavaḥ /
bharadvājaśca raibhyaśca yavakrītastathaiva ca

sthūlākṣaḥ śakalākṣaśca kāṇvo meghātithiḥ kratuḥ /
nāradaḥ parvataścaiva suvarmāthaikajo dvijaḥ

nitamburbhuvanaḥ saumyaḥ śatānandaḥ kṛtavraṇaḥ /
jāmadagnyastathā rāmaḥ kacaścetyevamādayaḥ

evaṃ te munayaḥ śrutvā sarvajñaṃ bharataṃ tataḥ /
punarūcuridaṃ vākyaṃ kutūhalapurogamam

yastvayā gadito hyeṣa nāṭyavedaḥ purātanaḥ /
ekacittaiḥ sa cāsmābhiḥ samyak samupadhāritaḥ

ekaśca saṃśayo 'smākaṃ taṃ no vyākhyātumarhasi /
ko vānyo nāṭyavedasya niścayaṃ vaktumarhati

na vayaṃ parihāsena na virodhena na cerṣyayā /
pṛcchāmo bhagavan nāṭyamupadeśārthameva tu

asmābhiśca tadā noktaṃ kathācchedo bhavediti /
idānīṃ tūpaśikṣārthaṃ nāṭyaguhyaṃ nidarśaya

lokasya caritaṃ nāṭyamityavocastvamīdṛśam /
teṣāṃ tu lokaṃ guhyānāṃ niścayaṃ vaktumarhasi

devasya kasya caritaṃ pūrvaraṅge dvijarṣabha /
kimarthaṃ bhujyate hyeṣa prayuktaḥ kiṃ karoti vā

kasmāccaiva punaḥ śaucaṃ samyak carati sūtradṛk /
kathamurvītale nāṭyaṃ svargānnipatitaṃ vibho

kathaṃ tavāyaṃ vaṃśaśca naṭasaṃjñaḥ pratiṣṭhitaḥ /
sarvameva yathātattvaṃ kathayasva mahāmune

teṣaṃ tu vacanaṃ śrutvā munīnāṃ bharato muniḥ /
pratyuvāca punarvākyaṃ guhyārthābhinayaṃ prati

bravīmi vaḥ kathāṃ guhyāṃ yanmāṃ pṛcchan suvratāḥ /
pūrvaraṅgavidhānasya tāṃ ca me sannibodhata

proktavānasmi yatpūrvaṃ śubhaṃ vighnanibarhaṇam /
tasyānubandhena mayā pūrvaraṅgaḥ prakīrtitaḥ

śastrāṇāṃ pratikārārthaṃ śarīrāvaraṇaṃ yathā /
kriyate hi tathā pāpaṃ hutenaiva praśāmyati

evaṃ japyaiśca homaiśca devatābhyarcanena ca /
sarvātodyavidhānaiśca tathā gītasvanena ca

stutyāśīrvacanaiḥ śāntaiḥ karmabhāvānukīrtanaiḥ /
mayā pāpāpaharaṇaiḥ kṛte vighnanibarhaṇe

stutigītādisaṃsṛṣṭairdevairabhihito 'smyaham /
nitarāṃ parituṣṭāḥ smaḥ prayogeṇāmunā ca te

devatāsuramānandya yasmāṃllokaśca nandati /
tasmādayaṃ prayogastu nāndīnāmā bhaviṣyati

gītavādyānunādo hi yatra kākusvanaḥ śubhaḥ /
tasmin deśe vipāpmāno māṅgalyaṃ ca bhaviṣyati

yāvattaṃ pūrayeddeśaṃ dhvanirnāṭyasamāśrayaḥ /
na sthāsyanti hi rakṣāṃsi taṃ deśaṃ na vināyakāḥ

āvāhe ca vivāhe ca yajñe nṛpatimaṅgale /
nāndīśabdamupaśrutya hiṃsrā naśyanti caiva hi

pāṭhyaṃ nāṭyaṃ tathā geyaṃ citravāditrameva ca /
vedamantrārthavacanaiḥ samaṃ hyetad bhaviṣyati

śrutaṃ mayā devadevāt tattvataḥ śaṅkarāddhitam /
snānajapyasahasrebhyaḥ pavitraṃ gītavāditam

yasminnātodyanāṭyasya gītapāṭhyadhvaniḥ śubhaḥ /
bhaviṣyatyaśubhaṃ deśe naiva tasmin kadācana

evaṃ pūjādhikārārthaṃ pūrvaraṅgaḥ kṛto mayā /
nānāstutikṛtairvākyairdevatābhyarcanena ca

yato 'bhivādanaṃ kliṣṭaṃ śiṣṭaṃ tadraṅgamaṇḍale /
tatastasya hi tacchaucaṃ vihitaṃ tu dvijottamāḥ

śaucaṃ kṛtvā yato mantraṃ pūjanaṃ jarjarasya tu /
ucyate pūrvaraṅge 'smin tasmācchaucaṃ prakīrtitam

yathāvatāritaṃ caiva nāṭyametanmahītale /
vaktavyaṃ sarvametaddhi na śakyaṃ hi nigūhitum

mamaite tanayāḥ sarve nāṭyavedasamanvitāḥ /
sarvalokaṃ prahasanaiḥ bādhante nāṭyasaṃśrayaiḥ

kasyacittvatha kālasya śilpakaṃ grāmyadharmakam /
ṛṣīṇāṃ vyaṅgyakaraṇaṃ kurvadbhirguṇasaṃśrayam

aśrāvyaṃ taddurācāraṃ grāmyadharmapravartitam /
niṣṭhuraṃ cāprastutaṃ ca kāvyaṃ saṃsadi yojitam

tacchrutvā munayaḥ sarve bhīmaroṣaprakampitāḥ /
ūcustān bharatān kruddhā nirdahanta ivāgnayaḥ

mā tāvadbho dvijā yuktamidamasmadviḍambanam /
ko nāmāyaṃ paribhavaḥ kiñca nāsmāsu sammatam

yasmājjñānamadonmattā na vetthāvinayāśritāḥ /
tasmādetaddhi bhavatāṃ kujñānaṃ nāśameṣyati

ṛṣīṇāṃ brāhmaṇānāṃ ca samavāyasamāgatāḥ /
nirāhutā vinā homaiḥ śūdrācārā bhaviṣyatha

apāṅkteyāḥ kutsitāścāvamā eva bhaviṣyatha /
yaśca vo bhavitā vaṃśaḥ sarvāśauco bhaviṣyati

ye ca vo vaṃśajāste 'pi bhaviṣyantyatha nartakāḥ /
paropasthānavantaśca śastrapaṇyopajīvinaḥ

śāpaṃ dattaṃ tathā jñātvā sutebhyo me tadā surāḥ /
sarve vimanaso bhūtvā tānṛṣīn samupasthitāḥ

yācamānaistataḥ proktaṃ devaiḥ śakrapurogamaiḥ /
idānīṃ duḥkhamutpannaṃ nāṭyametad vinaṅkṣati

ṛṣibhiśca tataḥ proktaṃ na caitaddhi vinakṣyati /
śeṣamanyatra yad proktaṃ sarvametad bhaviṣyati

etacchrutvā tu vacanaṃ munīnāmugratejasām /
viṣṇṇāste tataḥ sarve śrutvā māṃ samupasthitāḥ

proktavantaśca māṃ putrāstvayāho nāśitā vayam /
anena nāṭyadoṣeṇa śūdrācārā hi yat kṛtāḥ

mayāpi sāntvayitvoktā mā krodhaṃ vrajatānaghāḥ /
kṛtāntavihito 'smākaṃ nūnameṣa vidhiḥ sutāḥ

munīnāṃ hi mṛṣā vākyaṃ bhaviṣyati kadācana /
nidhane ca mano mā bhūd yuṣmākamiti sāntvitāḥ

jānīdhvaṃ tattathā nāṭyaṃ brahmaṇā saṃpravartitam /
śiṣyebhyaśca tadanyebhyaḥ prayacchāmaḥ prayogataḥ

mā vai praṇaśyatāmetannāṭyaṃ duḥkhapravartitam /
mahāśrayaṃ mahāpuṇyaṃ vedāṅgopāṅgasambhavam

apsarobhya idaṃ caiva yathātattvaṃ yathāśrutam /
nāṭyaṃ dattvā tataḥ sarve prāyaścittaṃ cariṣyatha