Natya Shastra · Chapter 30

iti bharatīye nāṭyaśāstre tatātodyavidhānaṃ nāma ekonatriṃśattamo 'dhyāyaḥ
triṃśo 'dhyāyaḥ
atodyaṃ suṣiraṃ nāma jñeyaṃ vaṃśagataṃ budhaiḥ /
vaiṇa eva vidhistatra svaragrāmasamāśrayaḥ

dvikatrikacatuṣkāstu jñeyā vaṃśagatāḥ svarāḥ /
kampyamānārthamuktāśca vyaktamuktāstathaiva ca

tatropari yathā hyekaḥ svaro vaiṇasvarāntare /
prāpnotyanyatvameveha tathā vaṃśagato 'pi hi

dvikastrikaścatuṣko vā śrutisaṅkhyo bhavet svaraḥ /
anīraṇāttu śeṣāṇāṃ svarāṇāmapi sambhavaḥ /
aṅgulīvādanakṛtaṃ tacca me sannibodhata

vyaktamuk{tāṅgulistatra svaro jñeyaścatuḥśrutiḥ /
kampyamānāṅguliścaiva triśrutiḥ parikīrtitaḥ /
dviko 'rdhāṅgulimuktaḥ syāditi śrutyāśritāḥ svarāḥ

ete syurmadhyamagrāme bhūyaḥ ṣaḍjāśritāḥ punaḥ /
vyaktamuk{tāṅgulikṛtāḥ ṣaḍjamadhyamapañcamāḥ

ṛṣabho dhaivataścāpi kampyamānāṅgulīkṛtau /
ardhamuktāṅguliścaiva gāndhāro 'tha niṣādavān

svarasādhāraṇaścāpi kākalyantarasaṃjñayā /
niṣādagāndhārakṛtau ṣaḍjamadhyamayorapi

viparyayā sannikarṣe śrutilakṣaṇasiddhitaḥ /
vaiṇakaṇṭhapraveśena siddhā ekāśritāḥ svarāḥ

yaṃ yaṃ gātā svaraṃ gacchet taṃ taṃ vaṃśena vādayet /
śārīravaiṇavaṃśyānāmekībhāvaḥ praśasyate

avicalitamavicchinnaṃ varṇālaṅkārasaṃyutaṃ vidhivat /
lalitaṃ madhuraṃ snigdhaṃ veṇorevaṃ smṛtaṃ vādyam

evametat svaragataṃ vijñeyaṃgānayoktṛbhiḥ /
ataḥ paraṃ pravakṣyāmi dhanātodyavikalpanam