Natya Shastra · Chapter 29

iti jātivikalpādhyāyo 'ṣṭāviṃśaḥ samāptaḥ
atha ekonatriṃśattamo 'dhyāyaḥ
ṣaḍjodīcyavatī caiva ṣaḍjamadhyā tathaiva ca /
madhyapañcamabāhulyāt kāryā śṛṅgārahāsyayoḥ

ṣāḍjī tvathārṣabhī caiva svasvarāṃśaparigrahāt /
vīraraudrādbhuteṣvete prayojye gānayoktṛbhiḥ

niṣāde 'ṃśe tu naiṣādī gāndhāre ṣaḍjakaiśikī /
karuṇe tu rase kāryā jātigānaviśāradaiḥ

dhaivatī dhaivatāṃśe tu bībhatse sabhayānake /
dhruvāvidhāne kartavyā jātirgāne prayatnataḥ /
rasaṃ kāryamavasthāṃ ca jñātvā yojyā prayoktṛbhiḥ /
ṣaḍjagrāmāśritā hyetāḥ prayojyā jātayo budhaiḥ

ataḥ paraṃ pravakṣyāmi madhyamagrāmasaṃśrayāḥ /
gāndhārīraktagāndhāryau gāndhārāṃśopapattitaḥ /
karuṇe tu rase kārye niṣāde 'ṃśe tathaiva ca

madhyamā pañcamī caiva nandayantī tathaiva ca /
gāndhārapañcamī caiva madhyamodīcyavā tathā /
madhyamapañcamabāhulyāt kāryāḥ śṛṅgārahāsyayoḥ

kārmāravī tathā cāndhrī gāndhārodīcyavā tathā /
vīre raudre 'dbhute kāryāḥ ṣaḍjarṣabhāṃśayojitāḥ /
kaiśikī dhaivatāṃśe tu bībhatse sabhayānake

ekaiva ṣaḍjamadhyā jñeyā sarvarasasaṃśrayā jātiḥ /
tasyāstvaṃśāḥ sarve svarāstu vihitāḥ prayogavidhau

yo yadā balavān yasmin svaro jātisamāśrayāt /
tatpravṛttaṃ rase kāryaṃ gānaṃ geye prayoktṛbhiḥ

madhyapañcamabhūyiṣṭhaṃ gānaṃ śṛṅgārahāsyayoḥ /
ṣaḍjarṣabhaprāyakṛtaṃ vīraraudrādbhuteṣu ca

gāndhāraḥ saptamaścāyaṃ karuṇe gānamiṣyate /
tathā dhaivatabhūyiṣṭhaṃ bībhatse sabhayānake

ekaiva ṣaḍjamadhyā vijñeyākhilarasāśrayā jātiḥ /
tasyāstvaṃśāḥ sarve svarāśca vihitāḥ prayogavidhau

sarveṣvaṃśeṣu rasā niyamavidhānena saṃprayoktavyāḥ /
kākalyantaravihitā viśeṣayuktāstu balavantaḥ /
evametā budhairjñeyā jātayo nāṭyasaṃśrayāḥ

pāṭhyaprayogavihitān svarāṃścāpi nibodhata /
hāsyaśṛṅgārayoḥ kāryau svarau madhyamapañcamau // BhN_29.13*1 //
ṣaḍjarṣabhau ca kartavyau vīraraudrādbhuteṣvatha /
gāndhāraśca niṣādaśca kartavyau karuṇe rase // BhN_29.13*2 //
dhaivataśca prayogajñairbībhatse sabhayānake /
ata ūrdhvaṃ pravakṣyāmi varṇālaṅkāralakṣaṇam // BhN_29.13*3 //
ārohī cāvarohī ca sthāyisañcāriṇau tathā /
varṇāścatvāra evaite hyalaṅkārāstadāśrayāḥ

ārohanti svarā yatrārohīti sa tu saṃjñitaḥ /
yatra caivāvarohanti so 'varohī prakīrtitaḥ

sthirāḥ svarāḥ samā yatra sthāyī varṇaḥ sa ucyate /
sañcaranti svarā yatra sa sañcārīti kīrtitaḥ

śārīrasvarasambhūtāstristhānaguṇagocarāḥ /
catvāro lakṣaṇopetā varṇāstatra prakīrtitāḥ

evaṃ lakṣaṇasaṃyuktaṃ yadā varṇo 'nukarṣati /
tadā varṇasya niṣpattirjñeyā svarasamudbhavā

ete varṇāstu vijñeyāścatvāro gītayojakāḥ /
etān samāśritān samyagalaṅkārān nibodhata

prasannādiḥ prasannāntaḥ prasannādyanta eva ca /
prasannamadhyaśca tathā kramarecita eva ca /
prastāraśca prasādaśca saptaite sthāyivarṇagāḥ

atha sañcārijān bhūyaḥ kīrtyamānānnibodhata /
mandrastathā prasannādiḥ preṅkhito bindureva ca /
sannivṛttaḥ pravṛttaśca recitaḥ kampitaḥ samaḥ

kuharaścaiva veṇuśca rañcito hyavalokitaḥ /
āvartakaḥ parāvṛttaḥ sañcāriṇyaścaturdaśa

niṣkarṣobhyucayaścaiva hasito bindureva ca /
preṅkholitastathākṣipto vistīrṇoddhaṭitastathā

hrādamānaḥ sampradānaḥ sandhiḥ pracchādanastathā /
prasannādiḥ prasannānta ityārohe trayodaśa

vidhūtaśca trivarṇaśca tathodvāhita eva ca /
udgītaśca tathā veṇirvijñeyā hyavarohiṇaḥ

saptarūpagatā jñeyā alaṅkārā budhaistvime /
naite sarve dhruvāsviṣṭāḥ śrutivarṇaprakarṣaṇāt

na hi varṇaprakarṣastu dhruvāṇāṃ siddhiriṣyate /
śyeno vāpyathavā bindurye cānyeti prakarṣiṇaḥ

te dhruvāṇāṃ prayogeṣu na kāryāḥ svapramāṇataḥ /
taddhruvāṇāṃ prayoge tu kāryā hyārohiṇaḥ svarāḥ

yasmādarthānurūpā hi dhruvā kāryārthadarśikā /
varṇānāṃ tu punaḥ kāryaṃ kṛśatvaṃ padasaṃśrayam

ye 'tra prayoge gacchanti tāṃśca varṇān nibodhata /
prasannādiḥ prasannāntaḥ prasannādyanta eva ca

prasannamadhyamaścaiva binduḥ kampitarecitau /
tāraścaiva hi mandraśca tathā tārataraḥ punaḥ /
preṅkholitastāramandro mandratāraḥ samastathā

sannivṛttaḥ pravṛttaśca prasādo 'pāṅga eva ca /
ūrmiḥ preṅkho 'valokaśca ityete sarvavarṇagāḥ

sthāyivarṇādṛte caiṣāṃ saṃpravakṣyāmi lakṣaṇam /
kramaśo dīpito yaḥ syāt prasannādiḥ sa kathyate

vyastoccārita evaiṣa prasannānto vidhīyate /
ādyantayoḥ prasannatvāt prasannādyanta iṣyate

prasannamadhyo madhye tu prasannatvādudāhṛtaḥ /
sarvasāmyāt samo jñeyaḥ sthitastvekasvaro 'pi yaḥ

ādimadhyalayo yatra sa cormiriti saṃjñitaḥ /
śrutayo 'ntyād dvitīyasya mṛdumadhyāyatāḥ svarāḥ

āyatatvaṃ bhavennīce mṛdutvaṃ tu viparyaye /
sve svare madhyamatvaṃ ca mṛdumadhyamayostathā /
dīptāyate karuṇānāṃ śrutīnāmeṣa niścayaḥ

bindurekakalo jñeyaḥ kampitaśca kalādvayam /
gatāgatapravṛtto yaḥ sa preṅkholita iṣyate

yastu kaṇṭhe svaro 'dhaḥ syāt sa tu tāraḥ prakīrtitaḥ /
urogatastathā mandro mūrdhni tāratarastathā

kramāgatastu yastāraḥ ṣaṣṭhaḥ pañcama eva vā /
tāramandraprasannastu jñeyo mandragataḥ sa ca

laṅghayitvā parān mandrāt parāṃ tāragatiṃ gataḥ /
mandratāraprasannastu vijñeyo hyavarohaṇāt

prasannāntaḥ svaro yatra prasādaḥ sa tu saṃjñitaḥ /
apāṅgakistu vijñeyaḥ svarāṇāmatha sañcarāt

recitaḥ śirasi jñeyaḥ kampitaṃ tu kalātrayam /
kaṇṭhe niruddhapavanaḥ kuharo nāma jāyate

evamete tvalaṅkārā vijñeyā varṇasaṃśrayāḥ /
atha gītīḥ pravakṣyāmi chando 'kṣarasamanvitāḥ

śaśinā rahiteva niśā vijaleva nadī latā vipuṣpeva /
avibhūṣiteva ca strī gītiralaṅkārahīnā syāt

prathamā māgadhī jñeyā dvitīyā cārdhamāgadhī /
sambhāvitā tṛtīyā tu caturthī pṛthulā smṛtā

trinivṛttapragītā yā gītiḥ sā māgadhī smṛtā /
ardhataḥ sannivṛttā ca vijñeyā hyardhamāgadhī

sambhāvitā ca vijñeyā gurvakṣarasamanvitā /
pṛthulākhyā ca vijñeyā nityaṃ laghvakṣarānvitā

etāstu gītayo jñeyā dhruvāyogaṃ vinaiva hi /
gāndharva eva yojyāstu nityaṃ gānaprayoktṛbhiḥ

gītayo gaditāḥ samyag dhātūṃścaiva nibodhata /
vistāraḥ karaṇaśca syādāviddho vyañjanastathā /
catvāro dhātavo jñeyā vāditrakaraṇāśrayāḥ

saṅghātajo 'tha samavāyajaśca vistārajo 'nubandhakṛtaḥ /
jñetaścatuṣprakāro dhāturvistārasaṃjñaśca

vidhayastu smṛtāstasya pūrvaṃ vistāra eva ca /
saṅghātasamavāyau tu vijñeyau tau dviatrikau

pūrvaścaturvidhastatra paścimo 'ṣṭavidhaḥ smṛtaḥ /
karaṇānāṃ viśeṣeṇa vijñeyau tau pṛthak pṛthak

adhaścordhvaṃ ca vijñeyāvadharottarajau svarau /
saṅghātajo vidhistveṣa vijñeyo vādanaṃ prati

dviruttaro dviradharastvadharādiścottarāvasānaśca /
jñeyastathottarādiḥ punarapyadharāvasānaśca

samavāyajastathā syāt triruttarastriradharaśca vijñeyaḥ /
dviradharottarādharānto dviradharaścottaravirāmaśca

uttaramukho dviradharo dviruttarāvasānaśca /
madhyottaro dviradharo dviruttaro 'pyadharamadhyaśca

anubandhastu jñeyo vyāsasamāsācca niyatameṣāṃ hi /
evaṃ caturdaśavidho vistāro dhāturākhyātaḥ

ribhitoccayanīribhito hrādastu tathānubandhaḥ syāt /
pañcavidho vijñeyo vīṇāvādye karaṇadhātuḥ

trikapañcasaptanavakairyathākramaṃ saṃyuto bhavedvādye /
sarvairanubandhakṛtairgurvantaḥ syāt karaṇadhātuḥ

kṣepaḥ pluto 'tipāto 'tikīrṇamanubandhasaṃjñitaścaiva /
āviddho viṣṭo yo dhāturvai pañcavidha eva

dvitricatuṣkanavakaiḥ prahāraiḥ kramaśaḥ kṛtaiḥ /
āviddhadhāturvijñeyaḥ sānubandhavibhūṣitaḥ

vyañjanadhātoḥ puṣpaṃ kalatalaniṣkoṭitaṃ tathoddhṛṣṭam /
repho 'nubandhasaṃjño 'nusvanitaṃ binduravamṛṣṭam

kaniṣṭhāṅguṣṭhasaṃyuktaṃ puṣpamityabhisaṃjñitam /
aṅguṣṭhābhyāṃ samaṃ tantryoḥ sparśanaṃ yat kalaṃ tu tat

vāmena pīḍanaṃ kṛtvā dakṣiṇenāhatistale /
savyāṅguṣṭhaprahārastu niṣkoṭitamihocyate

prahāro vāmatarjanyā uddhṛṣṭamiti saṃjñitam /
sarvāṅgulisamākṣepo repha ityabhisaṃjñitaḥ

talasthāne 'dhastantrīṇāmanusvanitamucyate /
gurvakṣarakṛtā tantrī bindurityabhisaṃjñitaḥ

kaniṣṭhāṅguṣṭhakābhyāṃ tu dakṣiṇābhyāmadhomukham /
tantrīṣu triprahāraṃ cāpyavamṛṣṭaṃ prakīrtitam

vyāsasamāsādeṣāmanubandhaḥ sārvadhātuko jñeyaḥ /
iti daśavidhaḥ prayojyo vīṇāyāṃ vyañjano dhātuḥ

ityete dhātavaḥ proktāścatvāro lakṣaṇānvitāḥ /
tisṛṇāmapi vṛttīnāṃ yeṣu vādyaṃ pratiṣṭhitam

tisrastu vṛttayaścitrādakṣiṇāvṛttisaṃjñitāḥ /
vādyagītobhayaguṇā nirdiṣṭāntā yathākramam

tisro gītivṛttayaḥ prādhānyena grāhyāḥ |
citrā vṛttirdakṣiṇā ceti |
tāsāṃ tālagītilayayatimārgaprādhānyāni yathāsvaṃ vyañjakāni bhavanti |
tatra citrāyāṃ saṅkṣiptavādyatāladrutalayasamāyatynāgatagrahāṇāṃ prādhānyam |
tathā
vṛttau gītavāditradvikalātālamadhyalayasrotogatāyatisamagrahamārgāṇāṃ prādhānyam |
dakṣiṇāyāṃ gīticatuṣkalatālavilambitalayagopucchāyatyatītagrahamārgāṇāṃ prādhānyam |
sarvāsāmeva vṛttīnāṃ lalitādyāstu jātayaḥ /
dhātubhiḥ saha saṃyuktā bhavanti guṇavattarāḥ

eteṣāṃ dhātūnāṃ samavāyājjātayastu jāyante /
syādudāttalalitaribhitaghanasaṃjñāścatasrastu

tatrodātā vistāradhātuviṣayā hyudāttatvāt /
lalitā vyañjanadhātorlalitatvādeva saṃprayoktavyā

āviddhadhātuviṣayā ribhitā laghusañcayād vinirdiṣṭā /
karaṇaviṣayā ca ghanasaṃjñā gurulaghusañcayāttu syāt

trividhaṃ gīte kāryaṃ vādyaṃ vīṇāsamudbhavaṃ tajjñaiḥ /
tattvaṃ hyanugatamoghaḥ sthānaikakaraṇasamāyuktāḥ

layatālavarṇapadayatigītyakṣarabhāvakaṃ bhavet tattvam /
gītaṃ tu yadanugacchatyanugatamiti tadbhavedvādyam

āviddhakaraṇabahulaṃ hyuparyuparipāṇikaṃ drutalayaṃ ca /
anapekṣitagītārthaṃ vādyaṃ tvoghe vidhātavyam

evaṃ jñeyā vaiṇe vādyavidhāne tu dhātavastajjñaiḥ /
lakṣyāmyataḥ paramahaṃ nirgītavidhānasamavāyam

āśrāvaṇā tathā'rambho vaktrapāṇistathaiva ca /
saṅkhoṭanā tathā kāryaṃ punaśca parighaṭṭanā

mārgāsāritametat syāllīlākṛtamathāpi ca /
āsāritāni ca tathā triprakārakṛtāni tu

etāni tu bahirgītānyāhurvādyavido janāḥ /
satālāni hyatālāni cittavṛttau kṛtāni tu

prayojanaṃ ca vijñeyaṃ pūrvaraṅgavidhiṃ prati /
eteṣāṃ saṃpravakṣyāmi lakṣaṇaṃ sanidarśanam

āsrāvaṇā nāma
vistāradhātuvihitaiḥ karaṇaiḥ pravibhāgaśo dvirabhyastaiḥ /
dviścāpi sannivṛttaiḥ karaṇopacayaiḥ krameṇa syāt

guruṇī tvādāvekādaśakaṃ caturdaśaṃ sapañcadaśam /
sacaturviṃśakamevaṃ dviguṇīkṛtametadeva syāt

laghunī guru caiva syādathāṣṭamaṃ guru bhavettathā ca punaḥ /
ṣaṭ ca laghūni tato 'ntye gurvādyāśrāvaṇāyāṃ tu

triḥśamyoparipāṇau tālāvapyevameva caikikavān /
samapāṇau dve śamye tālāvapyevamevātha

bhūyaḥ śamyātālāvavapāṇāvuttarasthā caiva /
cañcatpuṭastathā syādevaṃ hyāśrāvaṇātālaḥ

atrodāharaṇam |
jhaṇṭuṃ jagati yavalitaka jambuka jhaṇṭuṃ titi ca laghu ca jhaṇṭum |
diṅgale gaṇapatipaśupatijambuka diṅgale varabhuja diginagi cā |
titi cādini nigicā paśupati nīticā ||
athārambhaḥ |
dīrghāṇyādāvaṣṭau dvādaśa ca laghūni naidhanaṃ caiva /
catvāri gurūṇi tathā hrasvānyaṣṭau ca dīrghaṃ ca

laghusaṃjñāni caturdhā nidhanaṃ dviguṇīkṛtāni dīrghe dve /
aṣṭau laghūni naidhanamityārambhe 'kṣaravidhānam

atrodāharaṇam |
Jhaṇṭuṃ jhaṇṭuṃ jhaṇṭuṃ jhaṇṭuṃ jagati yavalitaka diginigicā |
diṅgle diṅgle titi jhajhalakucajhalajambuka titicā |
gaṇapati surapati paśupati cā ||
asya tu vādyam |
kāryaṃ triparvarahitairudvahanairapyatha samavarohaiḥ /
talaribhitahrādayutaiḥ karaṇairvistārabhūyiṣṭhaiḥ // BhN_29.90*1 //
apacayayuktairdvistristathā nivṛttairdvirabhyastaiḥ /
ārambho 'pyavataraṇastriparvayuktaiśca kartavyaḥ // BhN_29.90*2 //
tālastrikalastvādau śamyaikakalā kalādvaye tālaḥ /
dvikalā ca punaḥ śamyā tālo dvikalaśca kartavyaḥ

trikalaśca sannipātaḥ punaḥ pitāputrakaśca ṣaṭpūrvaḥ /
cañcatpuṭastathā syādārambhe tālayogastu

asya tu vādyam:
kāryaṃ triparvarahitairudvahanairapyatha samavarohaiḥ /
talaribhitahrādayutaiḥ karaṇairvistābhūyiṣṭhaiḥ

apacayayuktairdvistristathā nivṛttairdvirabhyastaiḥ /
ārambho 'pyavataraṇastriparvayuktaiśca kartavyaḥ

atha vaktrapāṇiḥ
gurūṇi pañca hrasvāni ṣaḍguruśca caturguṇaḥ /
guruṇī dve laghu tvekaṃ catvāryatha gurūṇi hi

catvāryatha laghūni syustrīṇi dīrghāṇi caiva hi /
laghūnyaṣṭau ca dīrghaṃ ca vaktrapāṇau bhavedvidhiḥ

atrodāharaṇam |
diṅgale jhaṇṭuṃ jambuka jagati ya jhaṇṭuṃ diṅgale |
ghendṛṃ gheṭo ghāṭo bhaṭṭunakiṭi inaṃ duṅ ||
ghadugadukiṭamaṭanam |
asya vādyam |
āviddhakaraṇayukto dvyaṅgaḥ syādekapravṛttau vā /
alpavyañjanadhāturvādyavidhirvaktrapāṇau tu

dvikale madrake yattu śamyātālādipātam /
tatsarvaṃ vaktrapāṇau tu kāryamaṣṭakalānvitam

tasyādhastāt punaḥ kāryaṃ pañcapāṇicatuṣṭayam /
vaktrapāṇerayaṃ tālo mukhapratimukhāśrayaḥ

atha saṅkhoṭanā
guruṇī laghūnyathāṣṭau dīrghaṃ dviguṇaṃ tathā ca kartavyam /
laghudīrghe laghu ca punaścaturguṇaṃ saṃprakartavyam

punaraṣṭau hrasvāni syuriha tathā naidhanaṃ ca kartavyam /
saṅkhoṭanavastuvidhau hrasvaguruvidhiḥ samuddiṣṭaḥ

saṅkhoṭanāyā udāharaṇaṃ prakalpya kṛtam |
diṅgale jagati ya valati katecāticātijha laghu cajhala paśupaticā |
asyā vādyavidhiḥ |
adhidaṇḍaṃ hastābhyāṃ vīṇāṃ vinigṛhya dakṣiṇāṅgulyā /
aṅguṣṭhābhyāṃ ca tathā kāryaṃ saṅkhoṭanāvādyam

saṅkhoṭayet svaraṃ vādinā tu saṃvādinā tathādhibalam /
samavāyibhiśca śeṣairanuvādibhiralpakaiścāṃśaiḥ

vistāracitrakaraṇairdvistrirvinivartitairdvirabhyastaiḥ |
upacayayuktaiḥ kramaśo vadanti saṅkhoṭanāvādyam /
tālo 'syā gaditastajjñaiḥ śīrṣavat pañcapāṇinā

atha parighaṭṭanā
dīrghāṇyādāvaṣṭau laghūni kuryāt punardviguṇitāni /
hrasvānyapi catvāri dviguṇāni syuḥ sadīrghāṇi

ṣoḍaśa laghūni ca syuḥ saha nidhane caiva kāryāṇi /
eṣa parighaṭṭanāyāṃ gurulaghuvastukramaḥ proktaḥ

etasyāmapyudāharaṇaṃ prakalpya kṛtam |
diṅgale diṅgale diṅgale diṅgale jagati ya valati ka |
titijhalakucajhaladiginigi gaṇapati cā |
calati ka gaṇapati paśupatisurapati cā |
vādyaṃ cāsyāstajjñaiḥ sodvahanaṃ hastalāghavāt kāryam /
vyañjanadhātusamutthaṃ nānākaraṇāśrayopetam

sampiṣṭakavaccāsyāstālaḥ karaṇaistu dhātusaṃyuktaiḥ /
gurulaghuyogādevaṃ vihitaḥ kāryo budhairnityam

mārgāsāritavādyaṃ vistārāviddhakaraṇasaṃyuktam /
sakalaiḥ satalaiḥ karaṇairatha gurulaghusañcayaścāyam

catvāri gurūṇi syurlaghūni catvāri ca dviguṇitāni /
guruṇī laghūnyathāṣṭau guruṇī cetyetat tridhā yojyam

athavā
catvāri tu gurūṇi syurhrasvānyaṣṭau bhavanti hi /
guruṇī nava hrasvāni dīrghamantyamathāpi ca // BhN_29.110*1 //
atrodāharaṇam |
diṅgale jhaṇṭuṃ jagati ya |
thalitaka jhaṇṭuṃ titi |
jhalakuca jhalatiticā |
bālāsāritavaccaiva tālo 'sya parikīrtitaḥ // BhN_29.110*2 //
śravaṇamadhurāṇi līlākṛtānyabhisṛtaparisṛtāntarakṛtāni /
tānyapyarthavaśādiha kartavyāni prayogavidhau

yathāsāritāni jyeṣṭhamadhyakaniṣṭhāni tālapramāṇanirdiṣṭāni tāni tālavidhāne vakṣyāmaḥ |
evametat svaragataṃ jñeyaṃ vīṇāśarīrajam /
vipañcīvādyayuktāni karaṇāni nibodhata

rūpaṃ kṛtaṃ pratikṛtaṃ pratibhedo rūpaśeṣamoghaśca /
ṣaṣṭhī vai pratiśuṣkā tvevaṃ jñeyaṃ karaṇajātam

vīṇāvādyadviguṇaṃ gurulāghavavādanaṃ bhavedrūpam /
rūpaṃ pratibhedakṛtaṃ pratikṛtamityucyate vādyam

yugapatkṛte 'nyakaraṇaṃ pratibhedo dīrghalāghavakṛtaḥ syāt /
kṛtamekasyāṃ tantryāṃ pratiśuṣkā nāma vijñeyā

vīṇāvādyavirāme 'pyaviratakaraṇaṃ tu rūpaśeṣaḥ syāt /
āviddhakaraṇayukto hyuparyuparipāṇikastvoghaḥ

kāryaṃ dhruvāvidhāne prāyeṇa hi koṇavādanaṃ tajjñaiḥ /
sthānaprāptyarthaṃ cedyattatra bhavedayaṃ niyamaḥ

taccaughatulyakaraṇaṃ vācyaṃ kāryaṃ vipañcyāstu /
saptatantrī bhaveccitrā vipañcī tu bhavennava /
koṇavādanā vipañcī syāccitrā cāṅgulivādanā

tatavādyavidhānamidaṃ sarvaṃ proktaṃ samāsayogena /
vakṣyāmyataśca bhūyaḥ suṣirātodyaprayogaṃ tu