Nāṭakacandrikā · Verses 208-227

asūcyaṃ tu śobhodāra-rasa-bhāva-nirantaram |
prārambhe yady asūcyaṃ syād aṅkam evātra kalpayet

asūcyaṃ tu dvidhā dṛśyaṃ śravyaṃ cādyaṃ tu darśayet |
dvedhā dvitīyaṃ svagataṃ prakāśaṃ ceti bhedataḥ

svagataṃ svaika-vijñeyaṃ prakāśaṃ tad dvidhā bhavet |
sarva-prakāśaṃ niyata-prakāśaṃ ceti bhedataḥ

sarva-prakāśaṃ sarveṣāṃ sthitānāṃ śravaṇocitam |
dvidhā vibhajyate tac ca janāntam apavāritam

tripatāka-kareṇānyān apavāryāntarā kathām |
yā mithaḥ kriyate dvābhyāṃ taj janāntikam ucyate

rahasyaṃ kathyate'nyasya parāvṛtyāpavāritam |
athāṅka-svarūpam -
pratyakṣanetṛ-caritaḥ kṣudra-cūrṇaka-saṃyutaḥ

nātīvagūḍha-śabdārtho nātipracura-padyavān |
ayuto bahubhiḥ kāryair bīja-saṃharaṇena ca

aneka-dina-nirvartyakathayā ca vivarjitaḥ |
dinārdha-dinayor yogya-vastunā parikalpitaḥ

vadhena dūrāhvānena yuddha-rājyādi-viplavaiḥ |
śāpotsarga-vihārābhyāṃ rata-bhojana-mṛtyubhiḥ

snānānulepa-nidrādyaiś cumbanāliṅganādibhiḥ |
vrīḍā-heturbhir anyaiś ca bībhataiś ca vinā kṛtaḥ

anta-niṣkrānta-nikhila-pātro'ṅka iti kīrtitaḥ |
atha garbhāṅkaḥ
aṅka-prasaṅgād garbhāṅka-lakṣaṇaṃ vakṣyate mayā

aṅkasya madhye yo'ṅkaḥ syād asau garbhāṅka īritaḥ |
vastu-sūcaka-nāndīko diṅ-mātra-mukha-saṅgataḥ

arthopakṣepakair hīno yutaḥ pātrais tu pañcaṣaiḥ |
anveṣya-vastu-viṣayaḥ svādhārāṅkānta-śobhitaḥ

nātiprapañcetivṛttaḥ prastutārthānubandhakaḥ|
prathamāṅke na kartavyaḥ so'yaṃ kāvya-viśāradaiḥ

caturthe'ṅke tu garbhāṅko yathā lalita-mādhave |
atha sāmānya-nirṇayaḥ -
nāṭake'ṅkā na kartavyā pañca-nyūnā daśādhikāḥ

viṣkambhakādyair api no vadho vācyo'dhikāriṇaḥ |
anyonyena tirodhānaṃ na kuryād rasa-vastunoḥ

yat syād anucitaṃ vastu nāyakasya rasasya vā |
viruddhaṃ tat parityājyam anyathā vā prakalpayet

aviruddhaṃ ca yad vṛttaṃ rasābhivyaktaye'dhikam |
tad apy anyathayed dhīmān na vaded vā kadācana

lāsyāṅgāni daśa tathā vīthy-aṅgāni trayodaśa |
aṅkeṣv api nibadhyāni kecid evaṃ pracaksate

prāyas tāny api santy eva tasmin lalita-mādhave |
kvacid atra viniṣpādyaṃ dhīrair ākāśa-bhāṣitam