Narada Purana · Chapter 1.75

iti śrībṛhannāradīyapurāṇe pūrvabhāge bṛhadupākhyāne sanatkumāravibhāge tṛtīyapāde hanumanmantrakathanaṃnāma catuḥsaptatitamo 'dhyāyaḥ
sanatkumāra uvāca
atha dīpavidhiṃ vakṣye sarahasyaṃ hanūmataḥ /
yasya vijñānamātreṇa siddho bhavati sādhakaḥ

dīpapātrapramāṇaṃ ca tailamānaṃ krameṇa tu /
dravyasya ca pramāṇaṃ vai tattu mānamanukramāt

sthānabhedaṃ ca mantraṃ ca dīpadānamanuṃ pṛthak /
puṣpavāsitatailena sarvakāmapradaṃ matam

tilatailaṃ śriyaḥ prāptyai pathikāgamanaṃ prati /
atasītailamuddiṣṭaṃ vaśyakarmaṇi niścitam

sārṣāpaṃ roganāśāya kathitaṃ karmakovidaiḥ /
māraṇe rājikotthaṃ vā vibhītakasamudbhavam

uñcāṭane karajotthaṃ vidveṣe madhuvṛkṣajam /
alābhe sarvatailānāṃ tilajaṃ tailamuttamam

godhūmāśca tilā māṣā mudgā vai taṇḍulāḥ kramāt /
pañcadhānyamidaṃ proktaṃ nityadīpaṃ tu māruteḥ

pañcadhānyasamudbhūtaṃ piṣṭamātraṃ suśobhanam /
sarvakāmapradaṃ proktaṃ sarvadā dīpadānake

vaśye taḍulapiṣṭotthaṃ māraṇe māṣapiṣṭajam /
uñcāṭane kṛṣṇatilapiṣṭajaṃ ca prakīrtitam

pathikāgamane proktaṃ godhūmotthaṃ sataṇḍulam /
mohane tvāḍhakījāta vidveṣe ca kulatthajam

saṃgrāme kevalā māṣāḥ proktā dīpasya pātrake /
saṃdhau tripiṣṭajaṃ lakṣmīhetoḥ kastūrikābhavam

elālavaṅgakarpūramṛganābhisamudbhavam /
kanyāprāptyai tathā rājavaṃśye sakhye tathaiva ca

alābhe sarvavastūnāṃ pañcadhānyaṃ varaṃ smṛtam /
aṣṭamuṣṭirbhavetkiñcitkiñcidaṣṭau caḥ puṣkalam

puṣkalānāṃ caturṇāṃ ca hyāḍhakaḥ parikīrtitaḥ /
caturāḍhako bhaveddroṇaḥ khārī droṇacatuṣṭayam

khārīcatuṣṭaya prasthasaṃjñā ca parikīrtitā /
athavānyaprakāreṇa mānamatra nigadyate

paladvayaṃ tu prasṛtaṃ dviguṇaṃ kuḍavaṃ matam /
caturbhiḥ kuḍavaiḥ prasthastaiścaturbhistathāḍhakaḥ

caturāḍhako bhaveddroṇaḥṛ khārī droṇacatuṣṭayam /
krameṇaitena te jñeyāḥ pātre ṣaṭkarmasaṃbhave

pañca sapta nava tathā pramāṇāste yathākramam /
saugandhe naiva mānaṃ syāttadyathāruci saṃmatam

nityapātre tu tailānāṃ niyamo vārtikodbhavaḥ /
somavāre gṛhītvātaddhvānyaṃ toyaplutaṃ dharet

paścātpramāṇato jñeyaṃ kumārīhastapeṣaṇam /
tatpiṣṭaṃ śuddhapātre tu nadītoyena piṇḍitam

dīpapātraṃ tataḥ kuryācchuddhaḥ prayatamānasaḥ /
dīpapātre jvālyamāne māruteḥ kavacaṃ paṭhet

śuddhabhūmau samāsthāpya bhaume dīpaṃ pradāpayet /
mālāmanūnāṃ ye varṇāḥ sādhyanāmasamanvitāḥ

vartikāyāṃ prakarttavyāstantavastatpramāṇakāḥ /
tattriṃśāṃśena vā grāhyā gurukārye 'khilāḍhyatā

kūṭatulyāḥ smṛtā nitye sāmānye 'tha viśeṣake /
rudrāḥ kūṭagaṇāḥ proktā na pātre niyamo mataḥ

ekaviṃśatisaṃkhyākāstantavo 'thādhvani smṛtāḥ /
raktasūtraṃ hanumato dīpadāne prakīrtitam

kṛṣṇamuñcāṭane dveṣe 'ruṇaṃ māraṇakarmaṇi /
kūṭatulyapalaṃ tailaṃ gurukārye śivairguṇam

nitye pañcapalaṃ proktamathavā mānasī ruciḥ

hanumatpratimāyāstu sannidhau dīpadāpanam /
śivālaye 'thavā kuryānnityanaimittike sthale

viśeṣo 'styatra yaḥ kaścinmārute rucyate mayā

pratimāgre pramodena grahabhūtagraheṣu ca /
catuṣpathe tathā proktaṃ ṣaṭsu dīpapradāpanam

sannidhau sphaāṭike liṅge śālagrāmasya sannidhau /
nānābhogaśriyai proktaṃ dīpadānaṃ hanūmataḥ

gaṇeśasannidhau vighnamahāsaṃkaṭanāśane /
viṣavyādhibhaye ghore hanumatsannidhau smṛtam

durgāyāḥ sannidhau proktaṃ saṃgrāme dīpadāpanam /
catuṣpathe vyādhinaṣṭau duṣṭadṛṣṭau tathaiva ca

rājadvāre bandhamuktau kārāgāre 'thavā matam /
aśvatthavaṭamūle tu sarvakāryaprasiddhaye

vaśye bhaye vivāde ca veśmasaṃgrāmasaṃkaṭe /
dyūte dṛṣṭistaṃbhane ca vidveṣe māraṇe tathā

mṛtakotthāpane caiva pratimācālane tathā /
viṣe vyādhau jvare bhūtagrahe krṛtyāvimocane

kṣatagranthau mahāraṇye durgevyāghne ca dantini /
krūrasattveṣu sarveṣu śaśvadūndhavimokṣaṇe

pathikāgamane caiva duḥsthāne rājamohane /
āgame nirgame caiva rājadvāre prakīrtitam

dīpadānaṃ hanumato nātra kāryā vicāraṇā

rudraikaviṃśapiṇḍāṃśca tridhā maṇḍalamānakam /
laghumānaṃ smṛtaṃ pañca sapta vā nava vā tathā

kṣīreṇa navanūtena dadhnā vā gomayena ca /
pratimākaraṇaṃ proktaṃ māruterdīpadāpane

dakṣiṇābhimukhaṃ vīraṃ kṛtvā kesarivikramam

ṛkṣavinyastapādaṃ ca kirīṭena virājitam /
likhedbhittau paṭe vāpi pīṭhe vā māruteḥ śubhe

mālāmantreṇa dātavyaṃ dīpadānaṃ hanūmataḥ /
nityadīpaḥ prakarttavyo dvādaśākṣaravidyayā

viśeṣastatra yastaṃ vai dīpadāne 'vadhāraya /
ṣaṣṭyādau ca dvitīyādāvimaṃ dīpamitīrayet

gṛhāṇeti padaṃ paścāccheṣaṃ pūrvavaduñcaret /
kūṭādau nityadīpe ca mantraṃ sūryākṣaraṃ vadet

tatra mālākhyamanunā tattatkāryeṣu kārayet /
gomayenopaliptāyāṃ bhūmau tadgatamānasaḥ

ṣaṭkoṇaṃ vasupatraṃ ca bhūmau rekhāsamanvitam /
kamalaṃ ca likhedbhadraṃ tatra dīpaṃ nidhāpayet

śaive vā vaiṣṇave pīṭhe pūjayedañjanāsutam /
kūṭaṣaṭkaṃ ca ṣaṭkoṇe antarāle paralikhet

ṣaṭkoṇeṣu ṣaḍaṅgāni bījayuktāni saṃlikhet /
saumyaṃ madhyagataṃ lekhyaṃ tatra saṃpūjya mārutim

ṣaṭkoṇeṣu ṣaḍaṅgāni nāmāni ca puroktavat /
vasupatre kramātpūjyā aṣṭāvete ca vānarāḥ

sugrīvāyāṅgadāyātha suṣeṇāya nalāya ca /
nīlāyātho jāṃbavate prahastāya tathaiva ca

suveṣāya tataḥ paścādyajetṣaḍaṅgadevatāḥ /
ādāvañjanāputrāya tataśca rudramūrtaye

tato vāyusutāyātha jānakījīvanāya ca /
rāmadūtāya brahmāstranivāraṇāya tatparam

pañcopacāraiḥ saṃpūjya deśakālau ca kīrtet /
kuśodakaṃ samādāya dīpamantraṃ samuñcaret

uttagabhimukho japtvā sādhayetsādhakottamaḥ /
taṃ mantraṃ kūṭadhā japtvā jalaṃ bhūmau vinikṣipet

tataḥ karapuṭaṃ kṛtvā yathāśakti japenmanum /
anena dīpavaryeṇa udaṅmukhagatena vai

tathā vidhehi hanumanyathā syurme manorathaāḥ /
trayodaśaivaṃ dravyāṇi gomayaṃ mṛttikā masī

alaktaṃ daradaṃ raktacandanaṃ candanaṃ madhu /
kastūrikā dadhi kṣīraṃ navanītaṃ ghaṛtaṃ tathā

gomayaṃ dvividhaṃ tatra proktaṃ gomahiṣībhavam /
paścādvinaṣṭadravyāptau māhiṣaṃ gomayaṃ smṛtam

pathikāgamane dūrānmahādurgasya rakṣaṇe /
bālādirakṣaṇe caiva caurādibhayanāśane

strīvaśyādiṣu kāryeṣu śastaṃ gogomayaṃ mane /
bhūmispṛṣṭaṃ na tadgrāhyamantarikṣāñca bhājane

caturvidhā mṛttikā tu śvetā pītāruṇāsitā /
tatra gopīcandanaṃ tu haritālaṃ ca gaurikam

maṣī lākṣārasodbhūtā sarvaṃ vānyatsphuṭaṃ matam /
kṛtvā gopīcadaṃnena caturasraṃ gṛhaṃ sudhīḥ

tanmadhye māhiṣeṇātha kuryānmūrtiṃ hanūmataḥ /
bījaṃ krodhāñca tatpucchaṃ likhenmantrī samāhitaḥ

tailena snāpayenmūrtiṃ guḍena tilakaṃ caret /
śatapatrasamo dhūpaḥ śālaniryāsasaṃbhavaḥ

kuryyāñca tailadīpaṃ tu vartipañcakasaṃyutam /
dadhyodanena naivedyaṃ dadyātsādhakasattamaḥ

vāratrayaṃ kaṇṭhadeśe saśeṣaviṣamuñcaran /
evaṃ kṛte tu naṣṭānāṃ mahiṣīṇāṃ gavāmapi

dāsīdāsādikānāṃ ca naṣṭānāṃ prāptirīritā /
caurādiduṣṭasattvānāṃ sarpādīnāṃ bhaye punaḥ

tālena ca caturdvāraṃ gṛhaṃ kṛtvā suśobhanam /
pūrvadvāre gajaḥ sthāpyo dakṣiṇe mahiṣastathā

sarpastu paścime dvāre vyāghraścaivottare tathā /
evaṃ krameṇa khaḍgaṃ ca kṣurikādaṇḍamudgarān

vilikhya madhye mūrtiṃ ca mahiṣīgomayena vai /
kṛtvā ḍamaruhastāṃ ca cakitākṣīṃ prayatnataḥ

payasā snāpanaṃ raktacandanenānulepanam /
jātīpuṣpaistu saṃpūjya śuddhadhūpa prakalpayet

ghṛtena dīpaṃ dattvātha pāyasānnaṃ nivedayet /
gaganaṃ dīpikendvāḍhyāṃ śāstraṃ ca purato japet

evaṃ saptadinaṃ kṛtvā mucyate mahato bhayāt /
anayorbhauṃmavāre tu kuryādāraṃbhamādarāt

śatrusenābhaye prāpte gairikeṇa tu maṇḍalam /
kṛtvā tadantare tālamīṣṭannamraṃ samālikhet

tatrāvalaṃbamānāṃ ca pratimāṃ gomayena tu /
vāmahastena tālāgraṃ dakṣiṇe jñānamudrikā

tālamūlātsvakāṣṭāyāṃ mārge hastamite gṛham /
caturasra vidhāyātha tanmadhye mūrtimālikhet

dakṣiṇābhamukhīṃ rimyāṃ hṛdaye vihitāñjalim /
toyena snānagandhādi yathāsaṃbhavamarpayet

kṛśārānnaṃ ca naivedyaṃ sājyaṃ tasyai nivedayet /
kilidvayaṃ japaṃ proktamevaṃ kuryāddine dine

evaṃ kṛte bhavecchīghraṃ pathikānāṃ samāgamaḥ /
śyāmapāṣāṇakhaṇḍena likhitvā bhūpatergṛham

prākāraṃ tu caturdvārayuktaṃ dvāreṣu tatra vai /
anyonyapuccha ridhitrayayuktāṃ hanūmataḥ

kuryānmūrtiṃ gomayena dhattūrakusumaiyajet /
jaṭāmāṃsībhavaṃ dhūpaṃ tailāktaghṛtadīpakam

naivedyaṃ tilatailāktasakṣārā māṣaroṭikā /
dhyeyo dakṣiṇahastena roṭikāṃ bhakṣayanhariḥ

vāmahastena pāṣāṇaistrāsayanparasainikān /
pnārayanbhrukuṭīṃ baddhvā bhīṣayanmathayansthitaḥ

japeñca bhugbhugiti vai sahasraṃ dhyānatatparaḥ /
evaṃ kṛtavidhānena parasainyaṃ vināśayet

rakṣā bhavati durgāṇāṃ satyaṃ satya na saṃśayaḥ /
prāyogā bahavastatra saṃkṣepādgaditā mayā

pratyahaṃ yo vidhānena dīpadānaṃ hanūmataḥ /
tasyāsādhyaṃ na vai kiñcidvidyate bhuvanatraye

na deyaṃ duṣṭahṛdaye duṣṭacintanabuddhaye /
avinītāya śiṣyāya piśunāya kadācana

kṛtaghnāya na dātavyaṃ dātavyaṃ ca parīkṣite /
bahunā kimihoktena sarvaṃ dadyātkapīśvaraḥ

atha mantrāntaraṃ vakṣye tattvajñānapradāyakam /
tāro namo hanumate jāṭharatrayamīrayet

danakṣobhaṃ samābhāṣya saṃharadvayamīrayet /
ātmatattvaṃ tataḥ paścātprakāśayayugaṃ tataḥ

varmāstravahnijāyāntaḥ sārddhūṣaḍviṃśadarṇavān /
vasiṣṭho 'sya muniśchando 'nuṣṭup ca devatāḥ punaḥ

hanumānmunisaptartuvedāṣṭanigamaiḥ kramāt /
mantrārṇaiśca ṣaḍaṅgāni kṛtvā dhyāyetkapīśvaram

jānusthāvāmabāhuṃ ca jñānamudrāparaṃ hṛdi /
adhyātmacittamāsīnaṃ kadalīvanamadhyagam

bālārkakoṭipratimaṃ dhyāyejjñānapradaṃ harim /
dhyātvaivaṃ prajapellakṣaṃ daśāṃśaṃ juhuyāttilaiḥ

sājyaiḥ saṃpūjayetpīṭhe pūrvokte pūrvavatprabhum /
japto 'yaṃ madanakṣobhaṃ nāśayatyeva niścitam

tattvajñānamavāpnoti kapīndrasya prasādataḥ /
atha mantrātaraṃ vākṣye bhūtavidrāvaṇaṃ param

tāraḥ kāśīṅkukṣiparavarāhaścāñjanāpadam /
pavano vanaputrānte āveśidvayamīrayet

tāraḥ śrīhanumatyaścādastraracabhujākṣaraḥ /
brahmā muniḥ syādgāyatrī chando 'tra devatā punaḥ

hanumānkamalā bījaṃ phaṭ śaktiḥ parikīrtitaḥ /
ṣaḍdīrghāḍhyena bījena ṣaḍaṅgāni samācaret

āñjaneya pāṭalāsyaṃ svarṇādrisamavigraham /
pārijātadrumūlasthaṃ cintayetsādhakottamaḥ

evaṃ dhyātvā japellakṣaṃ daśāṃśaṃ juhuyāttilaiḥ /
trimadhvaktairyañjatpīṭhe pūrvoktepūrvavatsudhīḥ

anena manunā mantrī grahagrastaṃ pramārjayet /
ākrandaṃstaṃ vimucyātha grahaḥ śīghraṃ palāyate

manavo 'mī sadāgopyā na prakāśyā yatastataḥ /
parīkṣitāya śiṣyāya deyā vā nijasūnave

hanumadbhajanāsaktaḥ kārtavīryārjunaṃ sudhīḥ /
viśeṣataḥ samārādhya yathoktaṃ phalamāpnuyāt