Narada Purana · Chapter 1.74

iti śrībṛhannāradīyapurāṇe pūrvabhāge buhadupākhyāne sanatkumāravibhāge tṛtīyapāde rāmādyupāsanāvarṇanaṃ nāma trisaptatitamo 'dhyāyaḥ
sanatkumāra uvāca
athocyante hanumato mantrāḥ sarveṣṭadāyakāḥ /
yānsamārādhya viprendra tattulyācaraṇā narāḥ

manuḥ svaredusaṃyuktaṃ gaganaṃ ca bhagānvitāḥ /
hasaphaāgniniśādhīśāḥdvitīyaṃ bījamīritam

svaphaāgnayo bhagendvāḍhyāstṛtīyaṃ bījamīritam /
viyadbhṛgvagnimanvinduyuktaṃ syāñca caturthakam

pañcamaṃ bhagacandrāḍhyāviyadbhṛgusvakāgnayaḥ /
manvindvāḍhyau hasau ṣaṣṭaṃ ṅeṃtaḥ syāddhanumāṃstataḥ

hṛdayānto mahāmantrarājo 'yaṃ dvādaśākṣaraḥ /
rāmacandro muniścāsya jagatīchanda īritam

devatā hanumānbījaṃ ṣaṣṭaṃ śaktirdvatīyakam /
ṣaḍbījaiśca ṣaḍaṅgāni śirobhāle dṛśormukhe

galabāhudvaye caiva hṛdi kukṣau ca nābhitaḥ /
dhvaje jānudvaye pādadvaye varṇānkramānnyaset

ṣaḍbījāni padadvandvaṃ mūrdhni bhāle mukhe hṛdi /
nābhāvūrvorjaṅghayośca pādayorvinyasetkramāt

añjanīgarbhasaṃbhūtaṃ tato dhyāyetkapīśvaram /
udyatkoṭyarkasaṃkāśaṃ jagatprakṣobhakārakam

śrīrāmāṅghridhyānaniṣṭaṃ sugrīvapramukhārcitam /
vitrāsayantaṃ nādena rākṣasānmārutiṃ bhajet

dhyātvaivaṃ prajapedbhānusahasraṃ vijitaindriyaḥ /
daśāṃśaṃ juhuyādbīhīnpayodadhyājyamiśritān

pūrvokte vaiṣṇave pīṭhe mūrttiṃ saṃkalpya mūlataḥ /
āvāhya tatra saṃpūjya pādyādibhirupāyanaiḥ

keśareṣvaṅgapūjā syātpatreṣu ca tator'cayet /
rāmabhakto mahātejāḥ kapirājo mahābalaḥ

droṇādrihārako merupīṭhakārcanakārakaḥ /
dakṣiṇāśābhāskaraśca sarvavighnavināśakaḥ

itthaṃ sampūjya nāmāni dalāgreṣu tator'cayet /
sugrīvamaṅgada nīlaṃ jāṃbavantaṃ nalaṃ tathā

suṣeṇaṃ dvividaṃ maindaṃ lokapālastator'cayet /
vajrādyānapi saṃpūjya siddhaścaivaṃ manurbhavet

mantraṃ navaśataṃ rātrau japeddaśadināvadhi /
yo narastasya naśyanti rājaśatrūtthabhītayaḥ

mātuliṅgāmrakadalīphalairhutvā sahasrakam /
dvāviṃśatibrahmacāri viprānsaṃbhojayecchucīn

evaṅkṛte bhūtaviṣagraharogādyupadravāḥ /
naśyanti tatkṣaṇādeva vidveṣigrahadānavāḥ

aṣṭottaraśatenāṃbu mantritaṃ viṣanāśanam /
bhūtāpasmārakṛtyotthajvare tanmantramantritaiḥ

bhasmabhiḥ salilairvāpi tāḍayejjvariṇaṃ krudhā /
tridinājjvaramukto 'sau sukhaṃ ca labhate naraḥ

auṣadhaṃ vā jalaṃ vāpi bhuktvā tanmantramantritam /
sarvānrogānparābhūya sukhī bhavati tatkṣaṇāt

tajjaptabhasmaliptāṅgo bhuktvā tanmantritaṃ payaḥ /
yoddhuṃ gacchecca yo mantrī śastrasaṃghairṃna bādhyate

śaskṣataṃ vraṇasphoṭo lūtāsphoṭo 'pi bhasmanā /
trirjaptena ca saṃspṛṣṭāḥ śuṣyantyeva na saṃśayaḥ

japedarkāstamārabhya yāvadarkedayo bhavet /
mantraṃ saptadinaṃ yāvañcādāya bhasmakīlakau

nikhanedabhimantryāśuśatrūṇāṃ dvāryalakṣitaḥ /
vidveṣaṃ mitha āpannāḥ palāyante 'rayo 'cirāt

bhasmāṃbu candanaṃ mantrī mantreṇānena mantritam /
bhakṣyādiyojitaṃ yasmai dadāti sa tu dāsavat

krūrāśca jantavo 'pyevaṃ bhavanti vaśavartinaḥ /
gṛhītveśanadiskaṃsthaṃ karañjatarumūlakam

kṛtvā tenāṅguṣṭamātrāṃ pratimāṃ ca hanūmataḥ /
kṛtvā prāṇapratiṣṭāṃ ca siṃdūrādyaiḥ prapūjya ca

gṛhasyābhimukhī dvāre nikhanenmantramuñcaran /
grahābhicārarogāgniviṣacauranṛpodbhavāḥ

na jāyante gṛhe tasmin kadācidapyupadravāḥ /
tadgṛhaṃ dhanaputrādyairedhate pratyahaṃ ciram

niśi yatra vane bhasma mṛtsnayā vāpi yatnataḥ /
śatroḥ pratikṛtiṃ kṛtvā hṛdi nāma samālikhet

kṛtvā prāṇapratiṣṭāntaṃ bhindyācchastrairmanuṃ japan /
mantrānte proñcarecchatrornāma chindhi ca bhindhi ca

mārayeti ca tasyānte dantairoṣṭaṃ nipūḍya ca /
pāṇyostale prapīḍyātha tyaktvā taṃ svagṛhaṃ vrajet

kurvansaptadinaṃ caivaṃ hanyācchatruṃ na saṃśayaḥ /
rājikālavaṇairmuktacikuraḥ pitṛkānane

dhattūraphalapuṣpaiśca nakharomaviṣairapi /
dvika(kāka)kauśikagṛdhrāṇāṃ pakṣaiḥ śleṣmāntakākṣajaiḥ

samiddhistriśataṃ yāmayadiṅmukho juhuyānniśi /
evaṃ saptadinaṃ kurvanmārayeduddhataṃ ripun

vitrāsastridinaṃ rātrau śmaśāne ṣaṭśataṃ japet /
tato vetāla utthāya vadedbhāvi śubhāśubham

kiṅkarībhūya vartteta kurute sādhakoditam /
bhāsmāṃbumantritaṃ rātrau sahasrāvṛttikaṃ punaḥ

dinatrayaṃ ca tatpaścātprakṣipetpratimāsu ca /
yāsu kāsu ca sthūlāsu laghuṣvapi viśeṣataḥ

mantraprabhāvāñcalanaṃ bhavatyeva na saṃśayaḥ /
aṣṭamyāṃ vā caturdaśyāṃ kuje vā ravivāsare

hanumatpratimāṃ paṭṭe māṣaiḥ snehapariplutaiḥ /
kuryādramyāṃ viśuddhātmā sarvalakṣaṇalakṣitām

tailadīpaṃ vāmabhāge ghṛtadīpaṃ tu dakṣiṇe /
saṃsthāpyāvāhayetpaścānmūlamantreṇa mantravit

prāṇapratiṣṭāṃ kṛtvā ca pādyādīni samarpayet /
raktacandanapuṣpaiśca siṃdūrādyaiḥ samarcayet

dhūpaṃ dīpaṃ pradāyātha naivedyaṃ ca samarpayet /
apūpamodanaṃ śākamodakānvaṭakādikam

sājyaṃ ca tatsamarpyātha mūlamantreṇa mantravit /
akhaṇḍitānyahilatādalāni saptaviṃśatim

tridhā kṛtvā sapūgāni mūlenaiva samarpayet /
evaṃ saṃpūjya mantrajño japeddaśaśanta manum

karpūrārārtikaṃ kṛtvā stutvā ca bahudhā sudhīḥ /
nijepsitaṃ nivedyātha vidhivadvisṛjettataḥ

naivedyānnena saṃbhojya brāhmaṇānsaptasaṃkhyayā /
niveditāni parṇāni tebhyo dadyādvibhajya ca

dakṣiṇāṃ ca yathā śakti dattvā tān visṛjetsudhīḥ /
tata iṣṭagaṇaiḥ sārddhaṃ svayaṃ bhuñjīta vāgyataḥ

taddine bhūmiśayyāṃ ca brahmacaryyaṃ samācaret /
evaṃ yaḥ kurute martyaḥ so 'cirādeva niścitam

prāpnuyātsakalānkāmānkapīśasya prasādataḥ /
hanumatpratimāṃ bhūmau vilikhettatpuro manum

sādhyanāma dvitīyāntaṃ vimocaya vimocaya /
tatpūrvaṃ mārjayedvāmapāṇinātha punarlikhet /
evamaṣṭottaraśataṃ likhitvā mārjayetpunaḥ

evaṃ kṛte mahākārāgṛhācchīghraṃ vimucyate /
evamanyāni karmāṇi kuryyāntpallavamullikhan

sarṣapairvaśyakṛddhomo vidveṣe hayamārajaiḥ /
kuṅkumairidhmakāṣṭhairvā marīcairjīrakairapi

jvare dūrvāguḍūcībhirdadhnā kṣīreṇa vā ghṛtaiḥ /
śūle karañjavātārisamidbhistailalolitaiḥ

tailāktābhiśca nirguṇḍīsamidbhirvā prayatnataḥ /
saubhāgye candanaiścendralocanairvā lavaṅgakaiḥ

sugandhapuṣpairvastrāptyai tattaddhānyaistadāptaye /
ripupādarajobhiśca rājīlavaṇamiśritaiḥ

homayetsaptarātraṃ ca ripuryāti yamālayam /
dhānyaiḥ saṃprāpyate dhānyamannairannasamucchrayaḥ

tilājyakṣīramadhubhirmahiṣīgosamṛddhaye /
kiṃ bahūktairviṣe vyādhau śāntau mohe ca māraṇe

vivāde staṃbhane dyūte bhūtabhītau ca saṃkaṭe /
vaśye yuddhe kṣate divye bandhamokṣe mahāvane

sādhito 'yaṃ nṛṇāṃ dadyānmantraḥ śreyaḥ suniścitam /
vakṣye 'tha hanumadyantraṃ sarvasiddhipradāyakam

lāṅgūlākārasaṃyuktaṃ valayatritayaṃ likhet /
sādhyanāma likhenmadhye pāśibīja praveṣṭitam

uparyaṣṭacchadaṃ kṛtvā patreṣu kavacaṃ likhet /
tadbahirdaṃhamālikhya tadbahiścaturasrakam

caturasasrasya rekhāgre triśūlāni samālikhet /
saiṃ bījaṃ bhūpurasyāṣṭavajreṣu vilikhettataḥ

koṇeṣvakuṃśamālikhya mālāmantreṇa veṣṭayet /
tatsarvaṃ veṣṭayedyantravalayatritayena ca

śilāyāṃ phalake vastre tāmrapatre 'tha kuḍyake /
tāḍapatre 'tha bhūrje vā rocanānābhikuṅkubhaiḥ

yantrametatsamālikhya nirāhāro jitendriyaḥ /
kapeḥ prāṇānpratiṣṭāpya pūjayettadyathāvidhi

aśeṣaduḥkhaśāntyarthaḥ yantraṃ saṃdhārayed budhaḥ /
mārījvarābhicārādisarvopadravanāśanam

yoṣitāmapi bālānāṃ dhṛtaṃ janamanoharam /
bhūtakṛtyāpiśācānāṃ darśanādeva nāśanam

mālāmantramatho vakṣye tāro vāgviṣṇugehinī /
dīrghatrayānvitā māyā prāguktaṃ kūṭapañcakam

dhruvo hṛddhanumānṅeṃto 'tha prakaṭaparākramaḥ /
ākrāntadigmaṇḍalānte yaśovitānasaṃvadet

dhavalīkṛtavarṇānte jagattritayavajra ca /
dehajvaladagnisūrya koṭyante ca samaprabha

tanūruhapadānte tu rudrāvatāra saṃvadet /
laṅkāpurī tataḥ paścāddahanodadhilaṅghana

daśagrīvaśiraḥ paścātkṛtāntakapadaṃ vadet /
sītānte śvasanapadaṃ vāyvante sutamīrayet

añjanāgarbhasaṃbhūtaḥ śrīrāmalakṣmaṇānvitaḥ /
nandanti kara varṇānte sainyaprākāra īrayet

sugrīvasakhyakādūrṇādraṇavālinivarhaṇa /
kāraṇadroṇaśabdānte parvatotpāṭaneti ca

aśokavanavīthyante dāruṇākṣakumāraka /
chedanānte vanarakṣākarānte tu samūha ca

vibhañjanānte brahmāstrabrahmaśakti graseti ca /
lakṣmaṇānte śaktibhedanivāraṇapadaṃ vadet

viśalyoṣadhiśabdānte samānayana saṃpaṭhet /
bālodita tato bhānumaṇḍalagrasaneti ca

meghanādahomapadādvidhvaṃsanapadaṃ vadet /
indrajidūdhakārānte ṇasītāsakṣaketi ca

rākṣasīsaṃghaśabdānte vidāraṇapadaṃ vadet /
kuṃbhakarṇādisaṃkīrtyavadhānte ca parāyaṇa

śrīrāmabhaktivarṇānte tatpareti samudra ca /
vyomadrumalaṅghaneti mahāsāmarthya saṃvadet

mahātejaḥpuñjaśabdādvirājamānavoñcaret /
svāmivacanasaṃpāditārjunānte ca saṃyuga

sahāyānte kumāreti brahmacārinpadaṃvadet /
gaṃbhīraśabdodayānte dakṣiṇāpatha saṃvadet /
mārttāṇḍameru śabdānte vadetparvatapīṭikā

arcanānte tu sakalamantrānte mapadaṃ vadet /
ācāryamama śabdānte sarvagrahavināśana

sarvajvaroñcāṭanānte sarvaviṣavināśana /
sarvāpattinivāraṇa sarvaduṣṭanibarhaṇa

sarvavyādhyādi samprocya bhayānte ca nivāraṇa

sarvaśatrucchedaneti tato mama parasya ca

tatastribhuvanānte tu puṃstrīnapuṃsakātmakam /
sarvajīvapadānte tu jātaṃ vaśayayugmakam

mamājñākārakaṃ paścātsaṃpādaya yugaṃ punaḥ /
tato nānānāmadheyānsarvān rājñaḥ sa saṃpaṭhet

parivārānmametyante sevakān kuru yugmakam /
sarvaśastravītyante ṣāṇi vidhvaṃsaya dvayam

lajjādīrghatrayopetā hotrayaṃ caihi yugmakam /
vilomaṃ pañcakūṭāni sarvaśatrūnhanadvayam

parabalāni parānte sainyāni kṣobhayadvayam

mama sarvaṃ kāryajātaṃ sādhayeti dvayaṃ tataḥ

sarvaduṣṭadurjanānte mukhāni kīlayadvayam /
dhetrayaṃ varmatritayaṃ phaṭtrayaṃ hāntrayaṃ tataḥ

vahnipriyānto mantro 'yaṃ mālāsaṃjño 'khileṣṭadaḥ

vasvaṣṭabāṇavarṇo 'yaṃ mantraḥ sarveṣṭāsādhakaḥ

mahābhaye mahotpāte smṛto 'yaṃ duḥkhanāśanaḥ /
dvādaśārṇasya ṣaṭkūṭaṃ tyaktvā bījaṃ tathādimam

pañcakūṭātmako mantraḥ sarvakāmapradāyakaḥ /
rāmacandro muniścāsya gāyatrī chanda īritam

hanumāndevatā prokto viniyogo 'khilāptaye /
pañcabījaiḥ samastena ṣaḍaṅgāni samācaret

rāmadūto lakṣmaṇānte prāṇadātāñjanīsutaḥ /
sītāśokavināśo 'yaṃ laṅkāprāsādabhañjanaḥ

hanumadādyāḥ pañcaite bījādyā ṅeyutāḥ punaḥ /
ṣaḍaṅgamanavo hyete dhyānapūjādi pūrvavat

praṇavo vāgbhavaṃ padmā māyā dīrghatrayānvitā /
pañcakūṭāni mantro 'yaṃ rudrārṇaḥ sarvasiddhidaḥ

dhyānapūjādikaṃ sarvamasyāpi pūrvavanmatam /
ayamārādhito mantraḥ sarvābhīṣṭapradāyakaḥ

namo bhagavate paścādanantaścandraśekharāṃ /
janeyāya mahānte tu balāyānte 'gnivallabhā

aṣṭādaśārṇo mantro 'yaṃ sunirīśvarasaṃjñakaḥ /
chando 'nuṣṭupdevatā tu hanumānpavanātmajaḥ

haṃ bījaṃ vahnivanitā śaktiḥ proktā manīṣibhiḥ /
āñjaneyāya hṛdayaṃ śiraśca rudramūrtaye

śikhāyāṃ vāyuputrāyāgnigarbhāya varmaṇi /
rāmadūtāya netraṃ syādbahyāstrāyāstramīritam

tatpacāmīkaranibhaṃ bhīghnasaṃvihitāñjalim /
calatkuṇḍaladīptāsyaṃ padmakṣaṃ mārutiṃ smaret

dhyātvaivamayutaṃ japtvā daśāṃśaṃ juhuyāttilaiḥ /
vaiṣṇave pūjayetpīṭhe prāguddiṣṭena vartmanā

aṣṭottaraśataṃ nityaṃ naktabhojī jitendriyaḥ /
japitvā kṣudrarogebhyo mucyate nātra saṃśayaḥ

mahāroganivṛttyai tu sahasraṃ pratyahaṃ japet /
rākṣasaughaṃ vinighnantaṃ kapiṃ dhyātvādhanāśanam

ayutaṃ prajapennityamacirājja yati dviṣam /
sugrīveṇa samaṃ rāmaṃ saṃdadhānaṃ kapiṃ smaran

prajapedayutaṃ yastu saṃdhiṃ kuryāddvipadvayoḥ /
dhyātvā laṅkāṃ dahṝntaṃ tamayutaṃ prajapenmanum

acirādeva śatrūṇāṃ grāmānsaṃpradahetsudhīḥ /
dhyātvā prayāṇasamaye hanumantaṃ japenmanum

yo yāti so 'cirātsveṣṭaṃ sādhayitvā gṛhe vrajet /
hanumantaṃ sadā gehe yor'cayejjapatatparaḥ

ārogyaṃ ca śriyaṃ kāntiṃ labhate nirupadravam /
kānane vyāghracaurebhyo rakṣenmanurayaṃ smṛtaḥ

prasvāpakāle śayyāyāṃ smarenmantramananyadhīḥ /
tasya duḥsvapnacaurādibhayaṃ naiva bhavetkvacit

viyatseṃdurhanumate tato rudrātmakāya ca /
varmāstrānto mahāmantro dvādaśārṇo 'ṣṭasiddhikṛt

rāmacandro muniścāsya jagatī chanda īritam /
hanumāndevatāṃ bījamādyaṃ śaktirhumīritā

ṣaḍdīrghabhājā bījena ṣaḍaṅgāni samācaret /
mahāśailaṃ samutpāṭya dhāvantaṃ rāvaṇaṃ prati

lākṣāraktāruṇaṃ raudraṃ kālāntakayamopamam /
jvaladagnisamaṃ jaitraṃ sūryakoṭisamaprabham

aṅgadādyairmahāvīrairveṣṭitaṃ rudrarūpiṇam /
tiṣṭha tiṣṭha raṇe duṣṭa sṛjantaṃ ghoraniḥ svanam

śaivarūpiṇamabhyarcya dhyātvā lakṣa japenmanum /
daśāṃśaṃ juhuyādvīhīnpayodadhyājyamiśritān

pūrvokte vaiṣṇave pīṭhe vimalādisamanvite /
mūrtiṃ saṃkalpya mūlena pūjā kāryā hanūmataḥ

dhyānaikamātro 'pi nṛṇāṃ siddhireva na saṃśayaḥ /
athāsya sādhanaṃ vakṣye lokānāṃ hitakāmyayā

hanumatsādhanaṃ puṇyaṃ mahāpātakanāśanam /
etadguhyatamaṃ loke śīghrasiddhikaraṃ param

mantrī yasya prasādena trailokyavijayī bhavet /
prātaḥ snātvā nadītīre upaviśya kuśāsane

prāṇāyāmaṣaḍaṅge ca mūlena sakalaṃ caret /
puṣpāñjalyaṣṭakaṃ datvā dhyātvā rāmaṃ sasītakam

tāmrapātre tataḥ padmamaṣṭapatraṃ sakeśaram /
kucandanena ghṛṣṭena saṃlikhettacchalākayā

karmikāyāṃ likhenmantraṃ tatrāvāhya kapīśvaram /
mūrtiṃ mūlena saṃkalpya dhyātvā pādyādikaṃ caret

gandhapuṣpādikaṃ sarvaṃ nivedya mūlamantrataḥ /
kesareṣu ṣaḍaṅgāni daleṣu ca tator'cayet

sugrīvaṃ lakṣmaṇaṃ caiva hyaṅgadaṃ nalanīlakau /
jāṃbavantaṃ ca kumudaṃ kesarīśaṃ daler'cayet

dikpālāṃścāpi vajrādīnpūjayettadanantaram /
evaṃ siddhe manau mantrī sādhayetsveṣṭamātmani

nadītīre kānane vā parvate vijane 'thavā /
sādhayetsādhaka śreṣṭho bhūmigrahaṇapūrvakam

jitāhāro jitaśvāso jitavākca jitendriyaḥ /
digbandha nādikaṃ kṛtvā nyāsadhyānādipūrvakam

lakṣaṃ japenmantrarājaṃ pūjayitvā tu pūrvavat /
lakṣānti divasaṃ prāpya kuryyāñca pūjanaṃ mahat

ekāgramanasā samyagdhyātvā pavananandanam /
divārātrau japaṃ kuryādyāvatsaṃdarśanaṃ bhavet

sudṛḍhaṃ sādhakaṃ matvā niśīthe pavanātmajaḥ /
suprasannastato bhūtvā prayāti sādhakāgrataḥ

yathepsitaṃ varaṃ datvā sādhakāya kapīśvaraḥ /
varaṃ labdhvā sādhakandro viharedātmanaḥ sukhaiḥ

etaddhi sādhanaṃ puṇyaṃ lokānāṃ hitakāmyayā /
prakāśitaṃ rahasyaṃ vai devānāmapi durlabham

anyānapiprayogāṃśca sādhayedātmano hitān /
viyadinduyutaṃ paścānṅeṃtaṃ pavananandanam

vahnipriyānto mantro 'yaṃ daśārṇaḥ sarvakāmadaḥ /
munyādikaṃ ca pūrvoktaṃ ṣaḍaṅgānyapi pūrvavat

dhyāyedraṇe hanūmantaṃ sūryakoṭisamaprabham /
dhāvantaṃ rāvaṇaṃ jetuṃ dṛṣṭvā satvaramutthitam

lakṣmaṇaṃ ca mahāvīraṃ patitaṃ raṇabhūtale /
guruṃ ca krodhamutpādya grahotuṃ guruparvatam

hāhākāraiḥ sadarpaiśca kaṃpayantaṃ jagattrayam /
ābrahmāṇḍaṃ samākhyāpya kṛtvā bhīmaṃ kalevaram

lakṣaṃ japeddaśāṃśena juhuyātpūrvavatsudhīḥ /
pūrvavatpūjanaṃ proktaṃ mantra syāsya vidhānataḥ

evaṃ siddhe manau mantrī sādhayedātmano hitam /
asyāpi mantravaryasya rahasyaṃ sādhanaṃ tu vai

sugopyaṃ sarvatantreṣu na deyaṃ yasya kasyacit /
brāhme muhūrte cotthāya kṛtanityakriyaḥ śuciḥ

gatvā nadīṃ taḥ snātvā tīrthamāvāhya cāṣṭadhā /
mūlamantraṃ tato japtvā siṃcedādityasaṃkhyayā

evaṃ snānādikaṃ kṛtvā gaṅgātīre 'thavā punaḥ /
parvate vā vane vāpi bhūmigrahaṇapūrvakam

ādyavarṇaiḥ pūrakaṃ syātpañcavargaiśca kumbhakam /
recakaṃ ca punaryādyairevaṃ prāṇānniyanya ca

vidhāya bhūtaśuddhyādi pīṭhanyāsāvadhi punaḥ /
dhyātvā pūrvoktavidhinā saṃpūjya ca kapīśvaram

tadagre prajapennityaṃ sādhako 'yutamādarāt /
saptame divase prāpte kuryāñca pūjanaṃ mahat

ekāgramanasā mantrī divārātraṃ japenmanum /
mahābhayaṃ pradatvā tribhāgaśeṣāsu niścitam

yāminīṣu samāyāti niyataṃ pavanātmajaḥ /
yathepsitaṃ varaṃ dadyātsādhakāya kapīśvaraḥ

vidyāṃ vāpi dhanaṃ vāpi rājyaṃ vā śatrunigraham /
tatkṣaṇādeva cāpnoti satyaṃ satyaṃ na saṃśayaḥ

iha loke 'khilānkāmānbhuktvānte muktimāpnuyāt /
sadyācitaṃ vāyuyugmaṃ hanūmanteti coddharet

phalānte phakriyānetrayuktā ca kāmikā tataḥ /
dhaggante dhagitetyuktvā āyurāsva padaṃ tataḥ

lohito garuḍo hetibāṇanetrākṣaro manuḥ /
munyādikaṃ tu pūrvoktaṃ plīharogaharo hariḥ

devatā ca samuddiṣṭā plīhayuktodare punaḥ /
nāgavallīdalaṃ sthāpyamuparyācchādayettataḥ

vastraṃ caivāṣṭaguṇitaṃ tataḥ sādhakasattamaḥ /
śakalaṃ vaṃśajaṃ tasyopari muñcetkapiṃ smaret

āraṇyasāṇakotpanne vahnau yaṣṭiṃ pratāpayet /
badarībhūruhotthāṃ tāṃ mantreṇānena saptadhā

tayā saṃtāḍayedvaṃśaśakalaṃ jaṭharasthitam /
saptakṛtvaḥ plīharogo nāśamāyāti niścitam

tāro namo bhagavate āñjaneyāya coñcaret /
amukasya śṛṅkhalāṃ troṭayadvitayamīrayet

bandhamokṣaṃ kuruyugaṃ svāhānto 'yaṃ manurmataḥ /
īśvaro 'sya muniśchando 'nuṣṭupca devatā punaḥ

śṛṅkhalāmocaraḥ śrīmānhanūmānpavanātmajaḥ /
haṃ bījaṃ ṭhadvayaṃ śaktirbandhamokṣe niyogatā

ṣaḍdīrghavahriyuktena bījenāṅgāni kalpayet /
vāme śailaṃ vairibhidaṃ viśuddhaṃ ṭaṅkamanyataḥ

dadhānaṃ svarṇavarṇaṃ ca dhyāyetkuṇḍalinaṃ harim /
evaṃ dhyātvā japellakṣadaśāṃśaṃ cūtapallavaiḥ

juhuyātpūrvavatproktaṃ yajanaṃ vāsya sūribhiḥ /
mahākārāgṛhe prāpto hyayutaṃ prajapennaraḥ

śīghraṃ kārāgṛhānmuktaḥ sukhī bhavati niścitam /
yantraṃ cāsya pravakṣyāmi bandhamokṣakaraṃ śubham

aṣṭacchadāntaḥ ṣaṭkoṇaṃ sādhyanāmasamanvitam /
ṣaṭkoṇeṣu dhruvaṃ ṅeṃtamāñjaneyapadaṃ likhet

aṣṭacchadeṣu vilikhetpraṇavo vātuvātviti /
gorocanākuṅkumena likhitvā yantramuttamam

dhṛtvā mūrdhni japenmantramayutaṃ bandhamuktaye /
yantrametallikhitvā tu mṛttikopari mārjayet

dakṣahastena mantrajñaḥ pratyahaṃ maṇḍalā vadhi /
evaṃ kṛte mahākārāgṛhānmantrī vimucyate

gaganaṃ jvalanaḥ sākṣī markaṭeti dvayaṃ tataḥ /
toyaṃ śaśeṣe makare parimuñcati muñcati

tataḥ śṛṅkhalikāṃ ceti vedanetrākṣaro manuḥ /
imaṃ mantraṃ dakṣakare likhitvā vāmahastataḥ

dūrikṛtya japenmantramaṣṭottaraśataṃ budhaḥ /
trisaptāhātprabaddho 'sau mucyate nātra saṃśayaḥ

munyādyarcādikaṃ sarvamasya pūrvavadācaret /
lakṣaṃ japo daśāṃśena śubhairdravyaiśca homayet

pucchākāre suvastre ca lekhanyā kṣurakotthayā /
gandhāṣṭakairlikhedvūpaṃ kapirājasya sundaram

tanmadhye 'ṣṭadaśārṇaṃ tu śatrunāmānvitaṃ likhet /
tena mantrābhijaptena śirobaddhvena bhūmipaḥ

jayatyarigaṇaṃ sarvaṃ darśanādeva niścitam /
candrasūryo parāgādau pūrvoktaṃ lekhayeddhvaje

dhvajamādāya mantrajñaḥ saṃsparśānmokṣaṇāvadhi /
mātṛkāṃ jāpayetpaścāddaśāṃśena ca homayet

tilaiḥ sarṣapasaṃmiśraiḥ saṃskṛte havyavāhane /
gaje dhvajaṃ samāropya gacchedyuddhvāya bhūpatiḥ

gajasthaṃ taṃ dhvajaṃ dṛṣṭvā palāyante 'rayo dhruvam /
mahārakṣākaraṃ yantraṃ vakṣye samyagdhanūmataḥ

likhedvasudalaṃ padmaṃ sādhyākhyāyutakarṇikam /
dale 'ṣṭakoṇamālikhya mālāmantreṇa veṣṭayet

tadbahir māyayāveṣṭya prāṇasthāpanamācaret /
likhitaṃ svarṇalekhanyā bhūrjapatre suśobhane

kāśmīrarocanābhyāṃ tu trilohena ca veṣṭitam /
sampātasādhitaṃ yantraṃ bhuje vā mūrdhni dhārayet

raṇe durodare vāde vyavahāre jayaṃ labhet /
grahairvighnairviṣaiḥ śastraiścaurairnaivābhibhūyate

sarvānro gānapākṛtya ciraṃ jīvecchataṃ samāḥ /
ṣaḍdīrghayuktaṃ gagana vahnyākhyaṃ tārasaṃpuṭam

aṣṭārṇo 'yaṃ mahāmantro mālāmantro 'tha kathyate /
praṇavo vajrakāyeti vajratuṇḍeti saṃpaṭhet

kapilānte piṅgaleti urddhvakeśamahāpadam /
balaraktamukhānte tu taḍijjihva mahā tataḥ

raudradaṃṣṭrotkaṭaṃ paścātkahadvandvaṃ karāliti /
mahadṛḍhaprahāreṇa laṅkeśvaravadhāttataḥ

vāyurmahāsetupadaṃ bandhānte ca mahā punaḥ /
śailapravāha gaganecara ehyehi saṃvadet

bhagavanmahābalānte parākramapadaṃ vadet /
bhairavājñāpayaihyehi mahāraudrapadaṃ tataḥ

dīrghapucchena varṇānte vadedveṣṭaya vairiṇam /
jaṃbhayadvayamābhāṣya varmāstrānto manurmataḥ

mālāhvayo dvijaśreṣṭha śaranetradharākṣaraḥ /
mālāmantrāṣṭārṇayośca munyādyarcā tu pūrvavat

japto yuddhe jayaṃ dadyādvyādhau vyādhivināśanaḥ /
evaṃ yo bhajate mantrī vāyuputraṃ kapīśvaram

sarvānsa labhate kāmānde vairapi sudurlabhān /
dhanaṃ dhānyaṃ sutānpautrānsaubhāgyamatulaṃ yaśaḥ

medhāṃ vidyāṃ prabhāṃ rājyaṃ vivāde vijayaṃ tathā /
vaśyādyāni ca karmāṇi saṃgare vijayaṃ tathā

upāsitoṃ'janāgarbhasaṃbhūtaḥ pradadātyalam