Narada Purana · Chapter 1.112

iti śrībṛhannāradīyapurāṇe pūrvabhāge bṛhadupākhyāne caturthapāde dvādaśamāsadvitīyāvratanirūpaṇaṃ nāmaikādaśādhikaśatatamo 'dhyāyaḥ
sanātana uvāca
śṛṇu nārada vakṣyāmi tṛtīyāyā vratāni te /
yāni samyagvidhāyāśu nārī saubhāgyamāpnuyāt

caitraśuklatṛtīyāyāṃ gaurīṃ kṛtvā sabhartṛkām /
sauvarṇā rājatīṃ vāpi tāmnīṃ vā mṛṇyayīṃ dvija

abhyarcya gandhapuṣpādyairvastrairābharaṇaiḥ śubhaiḥ /
dūrvākāṇḍaiśca vidhivatsopavāsā tu kanyakā

varārthinī ca saubhāgyaputrabhartrarthinī tathā /
dvijabhāryā bhartṛmatīḥ kanyakāṃ vā sulakṣaṇāḥ

siṃdūrāñjanavastrādyaiḥ pratoṣya prītamānasā /
rātrau jāgaraṇaṃ kuryādvratasaṃpūrtikāmyayā

tatastāṃ pratimāṃ vipra gurave pratipādayet /
dhātujāṃ mṛnmayīṃ vā tu nikṣipecca jalāśaye

evaṃ dvādaśavarṣāṇi kṛtvā gaurīvrataṃ śubham /
dhenudvādaśasaṃkalpaṃ dadyādutsargasiddhaye

kimatra bahunoktena gaurī saubhāgyadāyinī /
strīṇāṃ yathā tathā nānyā vidyate bhuvanatraye

dhanaṃ putrānpatiṃ vidyāmājñāsiddhiṃ yaśaḥ sukham /
labhate sarvameveṣṭaṃ gaurīmabhyarcya bhaktitaḥ

rādhaśuklatṛtīyā yā sākṣayā parikīrtitā /
tithistrotāyugādyā sā kṛtasyākṣayakāriṇī

dve śukle dve tathā kṛṣṇe yugādī kavayo viduḥ /
śukle pūrvāhnike grāhye kṛṣṇe caiva tapastatha

dvāparaṃ hi kalirbhādre pravṛttāni yugāni vai /
tatra rādhatṛtīyāyāṃ śrīsametaṃ jagadgurum

nārāyaṇaṃ samabhyarcetpuṣpadhūpavilepanaiḥ /
yadvā gaṅgāṃbhasi snāto mucyate sarvakilbiṣaiḥ

akṣatnaiḥ pūjayedviṣṇuṃ snāyādapyakṣatairnaraḥ /
saktūnsaṃbhojayedviprānsvayamabhyavaharecca tān

evaṃ kṛtavidhirvipra naro viṣṇuparāyaṇaḥ /
viṣṇulokamavāpnoti sarvadevanamaskṛtaḥ

atha jyeṣṭhatṛtīyā tu śuklā raṃbheti nāmataḥ /
tasyāṃ sabhāryaṃ vidhivatpūjayedvāhmaṇottamam

gandhapuṣpāṃśukādyaistu nārī saubhāgyakāmyayā /
raṃbhāvratamidaṃ vipra vidhivatsamupāśritam

dadāti vittaṃ putrāṃśca matiṃ dharme śubhāvahām /
athāṣāḍhatṛtīyāyāṃ śuklāyāṃ śuklavāsasā

keśavaṃ tu salakṣmīkaṃ sastrīke tu dvijer'cayet /
bhojanaiḥ surabhīdānairvastraiścāpi vibhūṣaṇaiḥ

priyervākyairbhṛśaṃ prītā nārī saubhāgyavāñchayā /
samupāsya vrataṃ caitaddhanadhānyasamanvitā

devadevaprasādena viṣṇulokamavāpnuyāt /
nabhaḥ śuklatṛtīyāyāṃ svarṇagaurīvrataṃ caret

upacāraiḥ ṣoḍaśabhirbhavānīmabhipūjayet /
putrāndehi dhanaṃ dehi saubhāgyaṃ dehi suvrate

anyāṃśca sarvakāmānme dehi dehi namo 'stu te /
evaṃ saṃprārthya deveśīṃ bhavānīṃ bhavasaṃyutām

vratasaṃpūrtikāmā tu vāyanaṃ dāpayettathā /
evaṃ ṣoḍaśavarṣāṇi kṛtvā nārī vrataṃ śubham

udyāpanaṃ caredbhaktyā vittaśāṭhyavivarjitā /
maṇḍape maṇḍale śuddhe gaṇeśādisurārcanam

kṛtvā tāmramayaṃ pātraṃ kalaśoparivinyaset /
sauvarṇīṃ pratimāṃ tatra bhavānyāḥ pratipūjayet

gandhapuṣpādibhiḥ samyak tato homaṃ samācaret /
veṇupātraiḥ ṣoḍaśabhiḥ pakvānnaparipūritaiḥ

samarpya devyai naivedyaṃ dvijeṣvetannivedayet /
vāyanaṃ ca tataḥ paścāddadyātsaṃbandhibandhuṣu

pratimāṃ gurave dattvā dvijebhyo dakṣiṇāṃ tathā /
pūrṇaṃ labhetphalaṃ nārī vratācaraṇatatparā

bhādraśuklatṛtīyāyāṃ vrataṃ vai hāritālakam /
kuryādbhaktyā vidhānena pādyārdhyārcana pūrvakam

tatastu kāñcane pātre rājate cāpi tāmrake /
vaiṇave mṛnmaye vāpi vinyasyānnaṃ sadakṣiṇam

saphalaṃ ca savastraṃ ca dvijāya pratipādayet /
tadante pāraṇaṃ kuryādiṣṭabandhujanaiḥ saha

evaṃ kṛtavratā nārī bhuktvā bhogānmanoramān /
vratasyāsya prabhāveṇa gaurīsahacarībhavet

saubhāgyadravyavastrāṇi vaṃśapātrāṇi ṣoḍaśa /
dātavyāni prayatnena brāhmaṇebhyo yathāvidhi

anyebhyo vipravaryebhyo dakṣiṇāṃ ca prayatnataḥ /
bhūyasīṃ ca tato dadyādviprebhyo devituṣṭaye

evaṃ yā kurute nārī vrataṃ saubhāgyavarddhanam /
sā tu devīprasādena saubhāgyaṃ labhate dhruvam

yadā tṛtīyā bhādre tu hastarkṣasahitā bhavet /
hastagaurīvrataṃ nāma taduddiṣṭaṃ hi śauriṇā

tathā koṭīśvarī nāma vrataṃ proktaṃ pinākinā /
lakṣeśvarī caiva tathā tadvidhānamudīryate

asyāṃ vrataṃ tu saṃgrāhyaṃ yāvadvarṣacatuṣṭayam /
upavāsena kartavyaṃ varṣe varṣe tu nārada

akhaṇḍānāṃ taṇḍulānāṃ tilānāṃ vā munīsvara /
lakṣamekaṃ viśodhyātha kṣipetpayasi saṃsṛte

tatpakkena tu nirmāya devyā mūrtiṃ suśomanām /
prakare gandhapuṣpāṇāṃ puṣpamālāvibhūṣitām

saṃsthāpya pārvatīṃ tatra pūjayedbhaktibhāvitaḥ /
gandhaiḥ puṣpaistathā dhūpairdīpairnaivedyavistaraiḥ

vividhaiśca phalairvipra namaskṛtya kṣamāpayet /
tato visarjayaddevīṃ jalamadhye 'tha dakṣiṇām

dattvā vidhijñaviprebhyo bhuñjīyācca pare dine /
iti te kathitaṃ vipra koṭilakṣeśvarīvratam

gaurīlokaṃ prayātyante vratasyāsya prabhāvataḥ /
iṣaśuklatṛtīyāyāṃ bṛbadgaurīvrataṃ caret

pañcavarṣaṃ vidhānena pūrvoktenaiva nārada /
ācāryaṃ pūjayedante viprānanyāndhanādibhiḥ

suvāsinīḥ pañca pūjyā vastrālaṅkāracandanaiḥ /
kañcukaiścaiva tāṭaṅkaiḥ kaṇṭhasūtrairharipriyāḥ

vaṃśapātrāṇi pañcaiva sūtraiḥ saṃveṣṭitāni ca /
siṃdūraṃ jīrakaṃ caiva saubhāgyadravyasaṃyutam

godhīmapiṣṭajātaṃ ca navāpūpaṃ phalā dikam /
vāyanāni ca pañcaiva tābhyo dadyācca bhojayet

arghaṃ dattvā vāyanāni paścādbhuñjīta vāgyatā /
tatphalaṃ dhārayetkaṇṭhe sarvakāmasamṛddhaye

tataḥ prātaḥ samutthāya sālaṅkārā sakhījanaiḥ /
gītavādyayutā nadyāṃ gaurīṃ tāṃ tu visarjayet

āhūtāsi mayābhadre pūjitā ca yathā vidhi /
mama saubhāgyadānāya yatheṣṭaṃ gamyatāṃ tvayā

evaṃ kṛtvā vrataṃ bhaktyā dvija devīprasādataḥ /
bhuktvā bhogāṃstu dehānte gaurīlokamavāpnuyāt

ūrjaśuklatṛtīyāyāṃ viṣṇugaurīvrataṃ caret /
pūjayitvā jagadvandyāmupacāraiḥ pṛthagvidhaiḥ

suvāsinīṃ bhojayitvā maṅgaladravyapūjitām /
visarjayetpraṇamyaināṃ viṣṇugaurīpratuṣṭaye

mārgaśuklatṛtīyāyāṃ haragaurīvrataṃ śubham /
kṛtvā pūrvavidhānena pūjayejjagadaṃbikām

etadvrataprabhāveṇa bhuktvā bhogānmanoramān /
devīlokaṃ samāsādya modate ca tayā saha

pauṣaśuklatṛtīyāyāṃ brahmagaurīvrataṃ caret /
pūrvoktena vidhānena pūjitāpi dvijottama

brahmagaurīprasādena modate tatra saṃgatā /
māghaśuklatṛtīyāyāṃ pūjyā saubhāgyasuṃdarī

pūrvoktena vidhānena nālikerārghyadānataḥ /
prasannā diśati svīyaṃ lokaṃ tu vratatoṣitā

phaālgunasya site pakṣe tṛtīyā kulasaukhyadā /
pūjitā gandhapuṣpādyaiḥ sarvamaṅgaladā bhavet

sarvāsu ca tṛtīyāsu vidhiḥ sādhāraṇo mune /
devīpūjā viprapūjā dānaṃ homo visarjanam

ityevaṃ kathitānīha tṛtīyāyā vratāni te /
bhaktyā kṛtāni ceṣṭāṃstu kāmāndardyumanogatān