Scripture Library

Narada Purana · Chapter 1.111

1.111.1

iti śrībṛhannanāradīyapurāṇe pūrvabhāge bṛhadupākhyāne caturthapāde dvādaśamāsapratipadvratanirūpaṇaṃ nāma daśottaraśatatamo 'dhyāyaḥ
sanātana uvāca
śṛṇu vipra pravakṣyāmi dvitīyāyā vratāni te /
yāni kṛtvā naro bhaktyā brahmaloke mahīyate

1.111.2

caitraśukladvitīyāyāṃ brahmaṇaṃ ca saśaktikam /
haviṣyānnena gandhādyaiḥ stoṣya sarvakratūdbhavam

1.111.3

phalaṃ labdhvākhilānkāmānante brahmapadaṃ labhet /
asminneva dine vipra bālendumuditaṃ pare

1.111.4

samabhyarcya niśāraṃbhe bhuktimuktiphalaṃ bhavet /
atha vāsmindine bhaktyā dasrāvabhyarcya yatnataḥ

1.111.5

suvarṇarajate netre pradadyācca dvijātaye /
pūrṇayātrāvrate hyasmindadhnā vāpi ghṛtena ca

1.111.6

netravrataṃ dvādaśa vatsarānvai kṛtyā bhavedbhūmipatirdvijendra /
surūparūpo 'rigaṇapratāpī dharmābhirāmo nṛpavargamukhyaḥ

1.111.7

rādhaśukladvitīyāyāṃ brahmaṇaṃ viṣṇurūpiṇam /
samarcya saptadhānyānyāḍhyakuṃbhopari vidhānataḥ

1.111.8

viṣṇulokamavāpnoti bhuktvā bhogānmanoramān /
jyeṣṭhaśukladvitīyāyāṃ bhāskaraṃ bhuvanādhipam

1.111.9

catuvaktrasvarūpaṃ ca samabhyarcya vidhānataḥ /
bhojayitvā dvijān bhaktyā bhāskaraṃ lokamāpnuyāt

1.111.10

āṣāḍhasya site pakṣe dvitīyā puṇyasaṃyutā /
tasyāṃ rathaṃ samāropya rāmaṃ saha subhadrayā

1.111.11

dvijādibhirvratī sārdhaṃ parikramya purādikam /
jalāśayāntikaṃ gatvā kārayecca mahotsavam

1.111.12

tadante devabhavane niveśya ca yathāvidhi /
brāhmaṇānbhojayeccaiva vratasyāsya prapūrtaye

1.111.13

nabhaḥ śukladvitīyāyāṃ viśvakarmā prajāpatiḥ /
svapitīti tithiḥ puṇyā hyaśokaśayanāhvayā

1.111.14

saśaktika tu śayyāsthaṃ pūjayitvā caturmukham /
imamuccārayenmantraṃ praṇamya jagatāṃ patim

1.111.15

śrīvatsadhāriñchrīkānta śrīvāsa śrīpate prabho /
gārhasthyaṃ mā praṇāśaṃ me yātu dharmārthakāmada

1.111.16

candrārddhadānamatroktaṃ sarvasiddhividhāyakam /
bhādraśukladvitīyāyāṃ śakrarūpaṃ jagadvidhim

1.111.17

pūjayitvā vidhānenana sarvakratuphalaṃ labhet /
āśvine māsi vai puṇyā dvitīyā śuklapakṣagā

1.111.18

dānaṃ pradattametasyāmanantaphalamucyate /
ūrjjaśukladvitīyāyāṃ yamo yamunayā purā

1.111.19

bhojitaḥ svagṛhe tena dvitīyaiṣā yamāhvayā /
puṣṭipravarddhanaṃ cātra bhaginyā bhojanaṃ gṛhe

1.111.20

vastrālaṅkārapūrvaṃ tu tasmai deyamataḥ param

1.111.21

yasyāṃ tithau yamunayā yamarājadevaḥ saṃbhojito nijakarātsvasṛsauhṛdena /
tasyāṃ svasuḥ karatalādiha yo bhunakti prāpnoti ratnadhanadhānyamanuttamaṃ saḥ

1.111.22

mārgaśukladvitīyāyāṃ śrāddhena pitṛpūjanam /
ārogyaṃ labhate cāpi putrapautrasamanvayaḥ

1.111.23

pauṣaśukladvitīyāyāṃ gośṛṅgodakamārjanam /
sarvakāmapradaṃ nṝṇāmāste bālendudarśanam

1.111.24

yor'ghyadānena bālenduṃ haviṣyāśī jitendriyaḥ /
pūjayetsājyasumanedharmakāmārthasiddhaye

1.111.25

māghaśukladvitīyāyāṃ bhānurūpaṃ prajāpatim /
samabhyarcya yathānyāyaṃ pūjayedraktapuṣpakaiḥ

1.111.26

raktairgaṃvaistathā svarṇamūrtiṃ nirmāya śaktitaḥ /
tataḥ pūrṇaṃ tāmrapātraṃ gāghṛmairvāpitaṇḍulaiḥ

1.111.27

samarpya deve bhaktyaiva sa mūrtiṃ pradadeddvije /
evaṃ kṛte vrate vipra sākṣātsūrya ivoditaḥ

1.111.28

durāsado durādharṣo jāyate bhuvimānavaḥ /
iha kāmānvarāmbhuktvā yātyante brahmaṇaḥ padam

1.111.29

sarvadevastuto 'bhīkṣṇaṃ vimānavaramāsthitaḥ /
atha phaālgunaśuklāyā dvitīyāyāṃ dvijottamaḥ

1.111.30

puṣpaiḥ śivaṃ samabhyarcya suśvetaiśca sugandhibhaḥ /
puṣpairvitānakaṃ kṛtvā puṣpālaṅkaraṇaiḥ śubhaiḥ

1.111.31

naivedyairvividhairdhūpairdīparnīrājanādibhiḥ /
prasādya praṇameccaiva sāṣṭāṅgaṃ patito bhuvi

1.111.32

evamabhyarcya deveśaṃ martyo vyādhivivarjitaḥ /
dhanadhānyasamāyukto jīvedvirṣaśataṃ dhruvam

1.111.33

yadvidhānaṃ dvitīyāsu śuklapakṣagatāsu vā /
proktaṃ tadeva kṛṣṇāsu karttavyaṃ vidhikovidaiḥ

1.111.34

vahnireva pṛthaṅmāḥsu nānārūpavapurddharaḥ /
pūjyate hi dvitīyāsu brahmacaryyādi pūrvavat

Original text: Nāradapurāṇa (or Nāradīyapurāṇa) · Data entry members of the Sansknet Project · GRETIL (Göttingen) · CC BY-NC-SA 4.0