Mokṣopāyaṭīkā · Chapter 3.8

kayaitaj jñāyate yuktyā katham etat prasidhyati /
nyāye 'nubhūta etasmin na jñeyam avaśiṣyate //

bahukālam iyaṃ rūḍhā mithyājñānaviṣūcikā /
jagannāmnī vicārākhyād ṛte mantrān na śāmyati //

vadāmy ākhyāyikā rāma yā imā bodhasiddhaye /
tāś cec chṛṇoṣi tat sādho mukta evāsi buddhimān //

no ced udvegaśīlatvād ardhād ar⟨th⟩[dh]ād utthāya gacchasi /
tat tiryagdharmiṇas te 'dya [']dya⟨ḥ⟩ kiñcin nāpi tu setsyati //

yo yam arthaṃ prārthayate tadarthaṃ yatate tathā /
so 'vaśyaṃ tad avāpnoti na cec chrānto nivartate //

sādhusaṅgamasacchāstraparo bhavasi rāma cet /
tad dinair eva vā māsaiḥ prāpnoṣi paramaṃ padam //

ātmajñānaprabodhāya śāstraṃ śāstravidāṃ vara /
kiṃnāma tatpradhānaṃ syād yasmiñ jñāte °⟨n⟩[t]e na śocyate //

ātmajñānapradhānānām idam eva mahāmate /
śāstrāṇāṃ paramaṃ śāstraṃ mahārāmāyaṇābhidham //

itihāsottamād asmāt paro bodhaḥ pravartate /
sarveṣām itihāsānām ayaṃ sāra udāhṛtaḥ //

śrute 'smin vāṅmaye yasmāj jīvanmuktatvam akṣatam /
udeti svayam evāta idam evātipāvanam //

sthitam evāstam āyāti jagaddṛśyaṃ vicāraṇāt /
yathā svapne parijñāte svapnārthād eva bhāvanā //

yad ihāsti tad anyatra yan nehāsti na tat kvacit /
idaṃ samastavijñānaśāstrakośaṃ vidur budhāḥ //

ya idaṃ śṛṇuyād nityaṃ tasyodāracamatkṛteḥ /
bālasyāpi paraṃ bodhaṃ buddhir eti na saṃśayaḥ //

yasmai nedaṃ tv abhavyāya rocate duṣkṛtodayāt /
vicārayatu yatkiñcit sa śāstraṃ jñānavāṅmayam //

jīvanmuktatvam °kt(i)a° asmiṃs tu śrute samanubhūyate /
svayam eva yathā pīte ⟨m⟩[p]ī⟨n⟩[t]e nīrogatvaṃ varauṣadhe //

śrūyamāṇe hi śāstre 'smiñ śrotā vetty etad ātmanā /
yathāvad idam asmābhir na tūktaṃ varaśāpavat //

śāmyati saṃsṛtiduḥkham idaṃ te svātmavicāramahākathayaiva /
no dhanadānatapaḥśrutavedais °śrut(e)a° tatkathanojjhitayatnaśatena //